1 तीहया दाड़ा मे अळी एक माणहु नो मोट्‌लो मेळो ईसुन्‌तां भेळो हयो। अने तीहया माणहु पांह खावा वाटु कंय नी हतु। तां ईसु आह़फा ना चेला ने ह़ाते बोलावीन केदो, 2 "मने आहया माणहु ना मेळा पोर दया आवे, काहाके आहया तीन दाड़ा गेथा मारी ह़ाते री र्‌या, अने खावा वाटु ईमनी पांह कंय बी नी हय। 3 ईमनी मे गेथा काना घणा नाम्‌बे गेथा आवला से। कदी ईमने मे भुकला घोर मोकलही, ता आहया थाक जहे, अने वाट्‌येत झामा खाय्‌न पड़ जहे।" 4 तीना चेला जपाप आप्‌या, "आञे उजाड़ी बड़ा मे आहया माणहु ने आफरीन खवाड़वा करीन एतरा ढेरका रोट्‌ला कां गेथा लावया?"

5 ईसु चेला ने पुछ्‌यो "तमारी पांह केतरा रोट्‌ला से?" तीहया केदा, "ह़ात रोट्‌ला।"

6 तत्‌यार ईसु माणहु ने भोयमे बह जावो करीन हुकम आप्‌यो, अने तीहयो ह़ात रोट्‌ला हात मे लीन रोट्‌ला वाटु भगवान ने तु घणो वारु से, केदो अने रोट्‌ला ढेरका हय ज्‌या। अने तीहयो माणहु ने वाट देवो करीन रोट्‌ला भांगीन आह़फा ना चेला ने आप्‌तो ज्‌यो, अने चेला माणहु ने वाट्‌ता ज्‌या। 7 तीमनी पांह थोड़ाक झीन्‌ला माछला बी हता; माछला वाटु बी ईसु भगवान ने तु घणो वारु से केदो। अने माछला बी ढेरका हयता ज्‌या। अने आहया माछला बी माणहु ने वाट देवो करीन तीहयो आह़फा ना चेला ने हुकम आपीन केदो। 8 ता आखा माणहु खायलीन आफरी ज्‌या, अने चेला बचला रोट्‌ला ना कटका भेळा कर्‌या, ता ह़ात चार्‌या भराय ज्‌या। 9 अदमड़ा-अदमड़ा तां ह़ारीक च्‌यारेक हजार हता, अने अळतेण ईसु माणहुम ने वळाय देदो। 10 अने तीहयो सोटो आह़फा ना चेला ह़ाते ढुंड्‌या मे बहीन दलमनुता मुलक मे जत र्‌यो।

11 ✝अळतेण फरीसी दलवाळा ईसु ह़ाते वात मे जखड़ी पड़वा बाज ज्‌या, अने तीने पारखवा करीन तीनी पांह ईसम वीन्‌ती कर्‌या "ए ईसु आमने एक एवी जुदा काम नी सेलाणी देखाड़।"✝ 12 ✝ईसु तीमना ढोंगड़ा देखीन आह़फा ना जीव मे डहकाय्‌न केदो, "तमारी ह़रका आहयी पीड़ी ना माणहु हमणे बी जुदा-काम नी सेलाणी काहा ह़ोद र्‌या? मे तमने ह़ाचली केम, तमारी ह़रका आहयी पीड़ी ना माणहु ने कंय बी सेलाणी नी जड़े।"✝

13 अने ईसु फरीसी दलवाळा ने सोड़ीन अळी पासो ढुंड्‌या मे बह ज्‌यो, अने ह़ेली धेड़े जवा बाज ज्‌यो।

14 ईसु अने तीना चेला ढुंड्‌या मे जवा बाज रेला अने तीहया चेला रोट्‌ला लाव्‌वा भुली जेला हता, अने ढुंड्‌या मे तीमनी पांह एकीत रोट्‌लो हतो। 15 ✝अने ईसु आह़फा ना चेला ने दाखलान लारे आहयु कीन चेतायो, "फरीसी माणहु ना खमीर अने राजा हेरोद ना खमीर गेथा चेतीन रेवो।"✝

16 एतरे चेला आंबा-सांबा वीच्‌यारीन केदा, "आपणु रोट्‌ला नी लाया, करीन ईसु ईसम की र्‌यो।"

17 अने ईसु तीमनी आहयी वात जाणीन तीमने केदो, "तमु आंबा-सांबा अमारी पांह रोट्‌ला नी हय करीन काहा वीच्‌यार करवा बाज र्‌या? हजु बी तमु वण-अकल्‌या से ह़ु? तमने हजु बी आहयी वात नी ह़मजाती ह़ु? 18 ✝तमारा डोळा से, ते बी देखायतु नी ह़ु? अने कान्‌टा हय्‌न बी ह़मळायतु नी ह़ु?✝ अने तमने आहयी वीतली वात फोम नी हय ह़ु? 19 जत्‌यार मे पांच हजार माणहु वाटु पांच रोट्‌ला भांगीन आप्‌लो, ता तमु रोट्‌ला ना टुकड़ा चुटीन केतरा टोपल्‌या भरला?" तीहया केदा, "बारे टोपल्‌या।"

20 जत्‌यार च्‌यार हजार माणहु जुगु ह़ात रोट्‌ला भांगीन आप्‌लो, ता तमु भांगला रोट्‌ला ना टुकड़ा केतरा चार्‌या भरला? तीहया ईसु ने केदा, "ह़ात चार्‌या।"

21 अळतेण ईसु तीमने केदो, "जीवाय नु मतलब तमु हजु तक नी ह़मज्‌या ह़ु?"

22 अने अळतेण ईसु अने तीना चेला बेतसेदा गाम मे पुग्‌या; अने माणहु एक आंदळु ने ईसुन्‌तां लाया, अने ईसु सी वीन्‌ती कर्‌या के "आंदळु ने सीमीन वारु कर दे।" 23 अने ईसु आंदळु नो हात धरीन तीने फळ्‌या मे गेथो बारो ली ज्‌यो, अने तीना डोळा मे थुप्‌यो अने आह़फा ना हात तीना डोळा पोर मेक्‌यो, अने तीने पुछ्‌यो, "तने देखाय ह़ु?"

24 तीहयो उपर भाळीन केदो, "माणहु ने देख र्‌यो पण तीहया मने आसम देखाय जीसम झाटवा चालवा बाज र्‌या हय।"

25 तत्‌यार ईसु अळी तीना डोळा पोर हात मेक्‌यो, अने तीहयो आंदळो आह़फा ना डोळा उगाड़ीन देखवा बाज ज्‌यो। तीहयो पासो आखु आसुझण देखवा बाज ज्‌यो। 26 "अने आहया ह़ेर ना फळ्‌या मे पासो ना जाय, आसम कीन ईसु तीने तीना घोर मोकल्‌यो।"

27 ईसु अने तीना चेला केसर्‌या फीलीपुस ह़ेर धेड़्‌ये वाळा फळ्‌या-फळ्‌या मे हय्‌न जवा बाज रेला; अने वाट्‌ये ईसु चेला ने पुछ्‌यो, "माणहु मारा बारा मे ह़ु की र्‌या?"

28 ✝तीहया केदा, "काना केय, आहयो ते बपतीस्‌मा आपण्‌यो युहन्‌नो से" पण काना भगवान वगे गेथी वात केण्‌यो एलीया से केय, अने काना भगवान ना वात केण्‌या माणहु मे गेथो कानो बीजो से केय।✝

29 ✝ईसु तीमने पुछ्‌यो, "पण तमु मने ह़ु केवो?" पतरस केदो, "ह़ाचलीन तु भगवान नो मोकल्‌लो बचाड़न्‌यो मसी से।"✝

30 तत्‌यार तीहयो तीमने आहयु कीन चेतायो, "मारा बारा मे आहयी वात कोयने नी केजो।"

31 अने तीहयो चेला ने ह़ीकाड़्‌यो, "मे मनख्‌यान सोरो से, मार वाटु नक्‌खी से, के तीहयो घणो जबर वेला करहे, अने पुडार्‌या अने मंदीर ना डायला पुंजारा अने युहदी-धरम ह़ीकाड़न्‌या तीने हेटो ह़मजीन नीकारो करीन मार नाखहे, पण तीने तीन दाड़ा मे पासो जीवतो हय्‌न बठो हयवु से।" 32 तीहयो आहयी वात चोखीझण आह़फा ना चेला ने उजन्‌ती की देदो। आहयु ह़मळीन पतरस ईसु ने सेटो ली जाय्‌न वडवा बाज ज्‌यो। 33 पण ईसु पासो वळीन बीजा चेला भणी भाळ्‌यो अने तीमनी अगळ पतरस ने वडीन केदो, "ए भुतड़ा मारीन्‌तां गेथो सेटो जत रे; तु ते भगवान नी वात पोर नी, पण माणहु नी वात पोर मन लगाड़ीन केवा बाज र्‌यो।"

34 ✝अने तीहयो माणहु ना मेळा अने चेला ने ह़ाते बोलावीन केदो, "जे कोय मारो चेलो बणीन मारी ह़ाते आव्‌वा हीन्‌डे" तीहयो आह़फा नी मरजी नी पण मारी मरजी पुरी करतो जाय्‌न आह़फा नु कुरुस उचलीन मारी ह़ाते आव्‌वा जोवे।✝ 35 ✝काहाके जे कोय आह़फा ना जीव ने बचाड़वा हीन्‌डे, तीहयो आह़फा ना जीव ने खोवहे; पण जे कोय मारी वाटु अने मारी खुस-खबर वाटु आह़फा ना जीव ने खोवहे, तीहयो आह़फा ना जीव ने बचाड़हे।✝ 36 कदी माणहु आखी कळजुग ने हात कर लेय, अने ते बी आह़फा नो जीव खोय देय, ता तीने ह़ु फायदो से? 37 अने तीहयो आह़फा नो जीव पासो लाव्‌वा करीन आह़फा ना जीव नी अवजी पोर ह़ु आपहे? 38 एक दाड़े मे जे मनख्‌या नो सोरो से, ह़रग वाळा चोखला ह़रगदुत ह़ाते अने मारा बाह नी बड़ाय भेळो आवही। तीहयी टेमे मे तीहया माणेह सी हुकारीन मानवा मे लजवाहे, जे आहयी पीड़ीन छीनाळ्‌या अने पापी माणहु नी अगळ मने अने मारी ह़ीकापण ने हुकारीन मानवा मे लजवायहे।