1 अने ईसु चेला ने अने माणहु ना मेळा ने आहयु बी केदो, "मे तमने ह़ाचलीन केम, जे आञे उबा हय र्‌या, तीमनी मे कोय ईसम से, तीहया तत्‌यार लग नी मरे, जत्‌यार लग भगवान ना राज ने सक्‌ती भेळ आवत्‌लो नी देख लेय।"

2 ✝छोव दाड़ा हय ज्‌या अने अळतेण ईसु पतरस अने याकुब अने युहन्‌ना ने ह़ाते लीन एक उचला बड़ा पोर ज्‌यो✝। तां तीहया एखला हता; अने तां ह़ारीक चेला नी अगळ ईसु नो सीक्‌को बदली ज्‌यो। 3 अने तीना लुगड़ा उजळा हय्‌न जोगो-जोगो पपलवा बाज ज्‌या अने एतरा जबर उजळा हय ज्‌या, के धरती पोर कानो बी धोबी एतरा जबर उजळा नी कर सके। 4 अने तीहया चेला ने एलीयो अने मुसो देखाव पड़्‌या; जे पेल्‌ना वारा मे भगवान ना वात केण्‌या हता; अने तीहया ईसु ह़ाते वात करवा बाज ज्‌या। 5 पतरस, ईसु ने केदो, "ए गुरु, आञे रेवा ते आपणी वाटु घण वारु से। आमु आञे ह़ारीक तीन तम्‌बु बणावये। एक तारी वाटु एक मुसा वाटु अने एक एलीया वाटु।" 6 पतरस नी जाणतो हतो के तीहयो ह़ु केय ईनीन करते तीहया घणा बीही ज्‌या।

7 ✝तत्‌यार एक वादळु आवीन तीमने टोप लेदु, अने तीहया वादळा मे गेथो आहयो बोल ह़मळायो, "आहयोत मारो मोंगाळ्‌ळो सोरो से; आनी वात मानो।"✝ 8 ता चेला तत्‌यारुत च्‌यारो-मेर भाळ्‌या, ता तां ह़ारीक ईसु ने सोड़ीन कोय नी देखाव पड़्‌यु।

9 बड़ा पोर गेथो उतरतो जीन ईसु तीहया चेला ने आहयो हुकम आप्‌यो, "जत्‌यार लग मे मनख्‌यान सोरो मरला मे गेथो जीवतो हय्‌न बठो नी हये, तत्‌यार लग जे कंय तमु देखला से, तीहयु कोयने नी केजो।"

10 अने तीहया चेला ईसु नी वात मानीन आहयी वात ने आह़फा ना मन मे राख्‌या; ते बी तीहया आंबा-सांबा वीच्‌यार कर्‌या, के "मरला मे गेथो जीवतो हय्‌न बठो हयवान मतलब ह़ु से?" 11 ✝अने मरवा नी वात काटवा करीन चेला ईसु ने आहयु पुछ्‌या, "ईसम हय ता युहदी-धरम ह़ीकाड़न्‌या काहा केय के पेले एलीया नु आव्‌वा टकायलु से?"✝

12 ईसु तीमने केदो, "होव, खरीत एमेत लीखलु से के एलीया पेले आवीन आखु कंय ह़ुदारीन तीयार करहे। पण मनख्‌या ना सोरा ना बारा मे ईसम काहा खरला सास्‌तर मे लीखलु✝ से? के तीने घण-जबर दुख झेलवा पड़हे, अने माणहु तीने हेटो ह़मजीन तीनु नामबद्‌दी करहे। 13 पण मे तमने केम, एलीया ते आय लागलो से, अने जत्‌यार तीहयो आयो तत्‌यार माणहु ने जेम पट्‌यु तेमेत तीनी ह़ाते वण-दयाळो वेहवार कर्‌या।✝ अने तीना बारा मे भगवान ना बोल मे एमेत लीखलु से।✝"

14 ईसु तीहया तीन चेला ने लीन बड़े गेथो बीजा चेलान्‌तां पासो ज्‌यो, ता तीहया देख्‌या के बीजा चेला ना च्‌यारो-मेर घणो मोटो मेळो, भेळो हय र्‌यो, अने युहदी-धरम ह़ीकाड़न्‌या तीमनी ह़ाते वात मे जखड़ी पड़ र्‌या। 15 अने उचकाहला ईसु ने देखीन आखा माणहु घणा जबर वहराय ज्‌या। अने तीनु आव-भाव करवा करीन दवड़ीन आया। 16 अने ईसु चेलाम ने पुछ्‌यो, "तमु ईमनी ह़ाते कानी वात मे जखड़ी पड़ र्‌या?"

17 मेळा मे गेथो एक जणो जपाप आप्‌यो, "ए मास्‌तर, मे मारा सोरा ने, तारीन्‌तां लाव्‌वा करीन लावलो, आनी मे भुत भराय र्‌यो, तीहयो बोबड़ो से। 18 अने जा आने भुत चोटी जत्‌लो, तां ह़ारीक आने आहटी देत्‌लो, अने आहया सोरा ना मोडा मे फेह्‌टु आय लागत्‌लु, अने दातु बी ककड़ावतलो, अने अकड़ाय जत्‌लो: अने जत्‌यार मे तारा चेला ने, आनी मे गेथो भुत काड देवो, करीन केदो, तत्‌यार तीमने नी कडायो।"

19 अने तीमने एम केतलो ह़मळीन ईसु तीमने केदो, "ए वण-भरहाय पीड़ी ना माणहु मे कत्‌यार लग तमारी ह़ाते रेही? अने कत्‌यार लग तमारी वेठतो रेही? हीय्‌यु सोरु ने मारीन्‌तां लावो।" 20 तीहया ते सोरु ने ईसुन्‌तां लाया; अने जत्‌यार ईसु तीमने देख्‌यो, ता तेमेत तीहयो भुत ते सोरु ने छोटोत मड़ी देदो, अने तीहयु सोरु भोयमे पड़ ज्‌यु, अने मोडा मे गेथु फेह्‌टु नीकाळ्‌तो जीन गबड़वा बाज ज्‌यो। 21 तत्‌यार ईसु तीहयु सोरु ना बाह ने पुछ्‌यो, "आहयो एवो हयलो, केतरा दाड़ा हय ज्‌या?" अने तीहयो केदो, "नान्‌लो हतो, ता गेथोत से। 22 भुत आने मारवा करीन कंखर आक्‌ठीम अने कंखर पाणी मे नाख देय: कदी तने बणे, ता अमारी पोर गीण करीन अमारु भलु कर।"

23 अने ईसु तीने केदो, "कदीम तने बणे, ता एम मने ह़ु करवा केय? भरहो करवा वाळा वाटु आखु कंय हय सके।"

24 तत्‌यारुत तीहयु सोरु नो बाह कलपतो जीन केदो, "मे भरहो ते करु, ते बी भरहो करवा करीन मारी मदत कर।"

25 माणहु दवड़ीन आवीन गड़दी करवा बाज र्‌या, ईसु आहयु देख्‌यो, ता तीहयो, तीहया वीटळ्‌ळा भुत ने वडीन केदो, "ए बेरा अने गुंगा भुत, मे तने हुकम आपु, आहयु सोरु मे गेथो नकळी जा, अने पासो आनी मे नी भरायजे।"

26 तत्‌यार भुत आड़ीन, अने तीहया सोरा ने घण-जबर मड़ीन नकळी ज्‌यो; अने तीहयु सोरु मरलान तेवु हय ज्‌यु; एतरे ढेरेत माणहु केवा बाज ज्‌या, "आहयु सोरु मर ज्‌यु।" 27 पण ईसु सोरु नो हात धरीन उठाड़्‌यो अने सोरु उबु हय ज्‌यु।

28 अळतेण ईसु घोर आयो, ता ईसु एखलो हतो, ता तीना चेला तीने पुछ्‌या, "आमने तीहयो भुत ह़ु करवा नी नीकळ्‌यो?"

29 अने तीहयो चेला ने केदो, "एवी भुत नी जात भगवान सी वीन्‌ती कर्‌या वगर नी नीकळे।"

30 अळतेण ईसु अने चेला तां गेथो गलील जीला मे हय्‌न जवा बाज र्‌या हता। तीहयो 31 अने चेलाम ने ह़ीकाड़वा नी टेमे कोय बी अड़चन नी नाखवा जोवे करीन ईसु आह़फा ना चेला ने मनेन आहयी खास वात ह़ीकाड़तो ज्‌यो, "मे मनख्‌यान सोरो मनख्‌यान हात लाग जाय्‌न धरायवा वाळो से अने तीहया माणहु तीने मार नाखहे, पण तीन दाड़ा मे तीहयो पासो जीवतो हय जहे।"

32 पण चेला आहयी वात ने ह़मज्‌या नी, ते बी तीहया, ईसु ने आहयी वात पुसवा बीहता हता।

33 अळतेण तीहया कफरनहुम ह़ेर मे ज्‌या। जत्‌यार ईसु घोर मे हतो, ता तीहयो तीमने पुछ्‌यो "वाट्‌ये तमु कानी वात मे जखड़ी पड़ र्‌या हता?"

34 ✝तीहया आखा होगात हय र्‌या हता, काहाके वाट्‌ये तीहया आहयी वात मे जखड़ी पड़ रेला के अमारी मे कोय मोटु से?* 35 ✝तत्‌यार ईसु बहीन बारे चेला ने बोलायो अने तीमने केदो, "कदीम कोय मोटु बणवा हींडे, ता तीने आखा गेथो नानो अने आखा नो पावर्‌यो बणवा पड़हे।"✝ 36 अने तीहयो एक नान्‌लु सोरु ने बोलावीन तीमनी वच मे उबो कर्‌यो, अने तीने खोळा मे बहाड़ीन तीमने केदो, 37 ✝"जे कोय मारा नाम सी, एवा नान्‌ला सोरा माय्‌न काना एक नो बी आव-भाव करे; तीहयो मारी आव-भाव कर र्‌यो, अने जे कोय मारी आव-भाव करे, तीहयो मारी एतरो ते नी, पण मने मोकलवा वाळा नो आव-भाव कर र्‌यो।"✝

38 युहन्‌नो ईसु ने केदो, "ए मास्‌तर, आमु एक माणेह ने तार नामे भुत ने काडत्‌ला देख्‌या अने तीहयो मारी ह़ाते आव्‌वा नी हींडतो हतो, एतरे ता तीने आमु केदा, ईसु ना नामे भुत ने ना काडे।"

39 पण ईसु हुकम आपीन केदो, "तीने ईसु ना नामे भुत ने ना काडे ईसम करीन ना केवो" काहाके एवु कोय नी हय जे मारा नामे जुदा-कामु करीन थोड़ीक वार मे मारो वाक काडतो हय। 40 ✝काहाके जे कोय आपणी वीरोद मे नी हय, तीहयो आपणी वगो से।✝ 41 ✝तमु ईसु मसी ना चेला से करीन जे कोय तमने एक गीलास पाणी पीवाड़े ता मे ह़ाचलीन केम, तीहयो ईना काम ना बदले भगवान गेथो संयबरकत हात करहेन करहे।✝

42 पण जे कोय मारी पोर भरहो करन्‌या आहया नान्‌ला माय्‌न काना वाटु पाप करावे, तीनी वाटु आहयुत वारु से के तीना गळा मे घट्‌टी नो पोड़ बांदीन तीने दर्‌या मे नाख देवा जोवे। 43 ✝कदी तारो हात तने ठोकर खवाड़े, ता तीने वाडीन नाख देवो! काहाके बेम हात भेळ ओलाये नी एवी नरक नी आक्‌ठी मे जवा गेथो, हातटुटो हय्‌न अमरकाय जीवाय हात करीन ह़रग मे जवा वारु से।✝ 44 काहाके नरक-आक्‌ठी मे वाळो कीड़ो कदी नी मरे, अने तां वाळु आक्‌ठु कदी नी ओलाये।* 45 कदी तारो पोग पाप नो जपाप बणीन तने पाप करावे ता, तीहया पोग ने तोड़ीन नाख देवा जोवे। 46 काहाके बे पोगु भेळो नरक मे नखायवा गेथो, लंगड़ो हय्‌न अमरकाय जीवाय हात करीन ह़रग मे जवा वारु से। काहाके नरक-आक्‌ठी मे वाळो कीड़ो कदी नी मरे, अने तां वाळु आक्‌ठु कदी नी ओलाये। 47 ✝अने कदीम तारो डोळो पाप नो जपाप बणीन तने पाप करावे, ता तीहया डोळा ने नीकाळीन नाख दे, काहाके बे डोळा भेळे नरक-आक्‌ठी मे नखायवा गेथो, बाडो बणीन भगवान ना राज मे जवा वारु से।✝ 48 काहाके "नरक-आक्‌ठी मे वाळो कीड़ो कदी नी मरे अने तां वाळु आक्‌ठु कदी नी ओलाये।"✝

49 काहाके आखा ने आक्‌ठे करीन खारला बणावहे।

50 ✝खारलु मीठु ते वारलु चीज से, बाखीन कदी मे खारलु मीठु मोळ्‌ळु हय जाय अने खारुपण ने खोय देय, ता तीहयु पासु केम करीन खारु हयहे? एतरे तमु आंबा-सांबा हेळी-मेळीन रीन आह़फा नु खारलु मीठु नो ह़वाद ह़माळीन राखो।✝