1 अगा भाऊ एना गोस्टी को जरुरी नही से। का यो बेरा या जुग्ग को बिसय मा तुमला काही लिखयो जाहे। 2 काहेकि तुमी खुदच भली-भाती जानासेव का जसो रात मा चोर आवासे वसोच पिरभू को दिवस भी आहे। 3 जबा लोक कहेत "सान्ती अना सब साजरो से" तबा जसी पेट लक रव्हन वालो आई-माई पर एकदम लक दुख आवासे। वसोच उनको पर एकाएक नास आय जाहे अना वय बच नही सकन का। 4 पर भाऊ तुमी इंधारो मा नही सेव, का उ दिवस तुमरो पर चोर को जसो आय जाहे। 5 काहेकि तुमी सब उजाडो की आवलाद अखीन दिवस की आवलाद सेव हमी न त रात का सेजन अना नही इंधारो का सेजन। 6 अना हमी दुसरो को जसो नोको सोवनो पर जागतो अना चालु रव्हना। 7 काहेकि जोन सोवासेत वय रात मा सोवासेत अना जोन नसा मा रहवसेत वय रात मा नसा मा होवासेत। 8 पर एकोलाय का हमी दिवस का सेजन आव हमी भरोसा अना पिरेम को कवच* अना सूटकारा की आस को टोप पहेर के तैय्यार रव्हबिन। 9 काहेकि परमेस्वर न हमला कोप लाई नही पर हमरो पिरभू यीसु मसीह को कन लक सूटकारा पावन लाई ठहराईसेस। 10 उ हमरो लाई एने कारन लक मारयो गयो का चाव्ह हमी जागता या सोता रव्हबिन, हमी सब मिलके ओको संग जित्तो रव्हबिन। 11 एको लाई एक दुसरो ला सान्ती देवो। अना एक दुसरो की तरक्की करहो जसो का तुमी कर भी रहिसेव।

12 पर भाऊ गीन हमी तुमरो लक बिनती करासेजन का उनको मान-भाव करो। जोन तुमरो बीच मोठी महेनत करासेत अना जोन पिरभू मा तुमरो ओरिया अगवा राखीसेस अना तुमला सिक्सा देवसेत। 13 अखीन उनको काम को कारन पिरेम लक उन को संग साजरो सान्ती लक रव्हो।

14 अगा भाऊ तुमरो लक बिनती करासेजन का आलसी गीन ला चेताय देव। निरास गीन ला हिम्मत देवो। कमजोर गीन की मदद करो सब को संग मा धीरज राखो। 15 ध्यान राखो का, कोनी बुराई को बदला बुराई नोको करो पर हमेसा एक दुसरो ला अना सब लोक गीन ला भला करन मा कोसीस करतो रहेयो।

16 हमेसा खुसी लक रहवो। 17 लगातर पिराथना करता रहवो। 18 हर एक हाल मा धनयवाद देवो। काहेकी मसीह यीसु मा तुमरो लाई परमेस्वर की याच मरजी से।

19 आतमा ला नोको बुझावो। 20 दरसन की गोस्टी गीन ला नाहनो नोको जानो। 21 सब गोस्टी गीन ला साजरो लक परिक्सा करो, जोन साजरी से वोला पक्को लक सम्हाल राखने। 22 सब पिरकार की बुराई लक बचया रहवना।

23 अबा सान्ती को परमेस्वर आतमा आपच तुमला पूरो पवीतर करहे। अखीन तुमरो आतमा, परान अना देह हमरो पिरभू यीसु मसीह को आवन तकन पूरो रिती लक निरदोस अखीन साजरी रह। 24 तुमरो बुलावन वालो बिस्वास को काबील से अना उ असोच करहे।

25 अगो भाऊ, हमरो लाई पिराथना करने।

26 सब भाऊ गीन ला पवीतर चुम्मा लक नमस्ते लेवने।

27 मी पिरभू की किरया देवसु का एना चिठ्ठी ला सब भाऊ गीन ला वाच के आयकावो जाहे।

28 आमरो पिरभू यीसु मसीह को दया तुमरो संग होवती रव्हे।