1 एको लाई अरे मोरो टूरा तु वोना किरपा लक सेस जोन मसीह यीसु मा से ताकतवर होय जाहे। 2 अना जोन गोस्टी तु न लगत सा गवाह गीन को पुड़ा मोरो लक आयकिसेस वय बिस्वासी मानूस गीन ला सोप दे जोन दुसरो ला सिकावन कबील होहेत।
3 मसीह यीसु ला साजरो योध्दा को जसो मोरो संग दुख उठाव। 4 जबा कोनी योध्दा लड़ाई पर जासे त एको लाई का अपरी भरती करवावन वालो ला खुस करके अपरो जिंदगी ला संसार को काम गीन मा नही फसावासेत। 5 मंग अखाडा मा लड़नवारा अदी जसो नेम लक लड़े त मुकुट नही पाहे। 6 जोन कासतकार महेनत करासे फर को पहेल हिस्सा वोला च मिलनो चाव्हसे। 7 जेव मी कव्हसू वोको पर ध्यान देवो अना पिरभू तोला सबरी गोस्टी की समझ देहे।
8 यीसु मसीह ला हेत राखो जोन दाऊद को खानदान मा भईसे अखीन मरयो हुयो मा लक जित्तो भईसे अना या मोरो साजरो बारता को अनुसार सेत। 9 जेनको लाई मी बुरो काम करन वारा को जसो दुख उठावासेव अना बन्धन भी सेउ पर परमेस्वर को बचन बंधन मा नाहाती। 10 एना कारन मी बेचयो हुया लोक गीन को लाई सबच काही सहन करासू का वय भी वोनच मुकती ला जोन मसीह यीसु मा से अमर महिमा को संग पाहेत। 11 या गोस्टी सही से का,
अदी हमी उनको संग मर गईसे त
उनको संग जीवबीन भी।
12 अदी हमी धीरो लक सहतो रह त
उनको संग राज भी करेहेत।
अदी हमी उनला मुकरेत
त उ भी हमरो मुकर करेहेत।
13 अदी हमी अबिस्वासी भी होय
तबा भी उ बिस्वास कबील बनायो रह
काहेकी उ आप अपरो मुकर नही कर सकासे।
14 एना गोस्टी की उनला हेत कराओ अना पिरभू को पुड़ा चेताय देना का सबद गीन पर टिका-टिप्पनी नोको करो जेनको लक काही लाभ नही होतो वरन आयकान वालो बिगड जासे। 15 अपरो आप ला परमेस्वर ला पावनो काबील अना असो काम करन वालो ठहरानो को जतन कर जोन लज्जित होवन नही पाहे अना जोन खरो बचन ला सही रीती लक काम मा आनासेत। 16 पर बुरी सबद लक बचया रव्हो काहेकी असो लोक अखीन भी अभक्ती मा बढता जासेत। 17 अना उनका बचन केन्सर को जसो फैलता जाहेत हुमिनयुस अना फिलेतुस उनको च मा लक से। 18 जोन यो कहेके का मरके जित्तो भयो से खरो-खर भटक गयो अना केतरा गीन को बिस्वास ला उलट पुलट कर देवासे। 19 "तबा भी परमेस्वर की पक्की नींव बनी रहवासे अखीन वोको पर यो छाप लगीसे पिरभू अपरो ला चिन्हासे अना जोन कोनी पिरभू को नाव लेवासे उ अन्याय लक बचयो रह।"
20 मोठो घर मा नही बल्कि सोनो-चांदी च का पर काड़ी अना माटी का बरतन भी होवासे कोनी-कोनी आदर अखीन कोनी-कोनी अनादर को लाई। 21 अदी कोनी अपरो आप ला इनको लक सूद करेहे त उ आदर को बरतन अना पवीतर ठहरायो अना मालिक को काम आहे अखीन हर साजरो काम को लाई तैय्यार होहेत। 22 जुवानी को मन मरजी आस लक परावो, अना जोन सुध्द मन लक पिरभू को नाव लेवसेत, उनको संग धरम अना बिस्वास अखीन पिरेम अखीन मेल मिलाप को पीछा करो। 23 पर बेअक्कल अना कम अक्ल को झगड़ा लक अगल रहवो काहेकी तु जाना से का इनको झगड़ा पैदा होवासे। 24 पिरभू को दास झगड़ालु नही होवनो चाव्हसे पर उ सब को संग नरम अना सिक्सा मा महीर अखीन सहन करन वालो होहे। 25 उ बिरोधी गीन ला नरमता लक समझयो का जानो परमेस्वर उनला पाप लक मन हटाव। का आतमा देहे का वय भी खराई ला ओरखेत। 26 अना इनको कन लक उनकी आस पूरी करनो को लाई सचेत होयके सैतान को जाल लक छुट जाहे।