1 पर यो हेत राखो का आखरी दिवस गीन मा कठीन बेरा आहे। 2 काहेकी मानूस सुवारथी, धन दौलत लक माया करनवारा डींगमार, गरबिला, बिरोध करनवारा, माय-बाप को हुकूम नही मानन वालो बिरोधी, अपवीतर। 3 दया रहित, छमारहित लान-छान लगावन वालो असंयमी कठोर साजरो को बैयरी। 4 बिसवासघाती ढीठ घंमडी अना परमेस्वर लक पिरेम नही, तरी सूक सुबिता का चाव्हवन वारा होहेत। 5 वय भक्ती को हुलीया त धरेहेत पर वोकी ताकत ला नही मानहेत असा गीन लक दुहुर रव्हना। 6 इनको च मा लक वय लोक सेत जोन घर मा चोरी लक धसावसेत अना वोना कमजोर आई-माई गीन ला बस मा कर लेसेत जोन पाप लक दबी अना हर पिरकार की आस को बस मा से। 7 अना हमेसा सिकावता रहवासेत पर खराई की पहिचान तकन कबच नही पहुचा सेत। 8 जसो यत्रेस अना यम्ब्रेस न मोसे को बिरोध करीस होतीस वसोच यो खराई को बिरोध करासे यो मानूस से जेकी अक्ल चली गईसे अना वय बिस्वास को बारे मा निकामा से। 9 पर वय एकोलक पुड़ा नही बढ सकासेत काहेकी जसो उनकी कम अक्ल सबच मानूस गीन पर परगट भय गई होती वसोच इनकी भी भय जाहे।
तीमुथियुस का खास निरदेस
10 पर तु न सिक्सा चालचलन मनसा बिस्वास सहन करन को ताकत पिरेम धीरज अना सताय जानो अना दुख उठावन मा मोरो संग देइस। 11 अना असो दुख गीन मा भी जोन अन्ताकिया अना इकुनियुम अखीन लुस्तरा मा मोरो पर पडया होतो अना कई दुख गीन मा भी जोन मीना उठाइसेस पर पिरभू न मोला उन सब लक छुड़ाय लेईस। 12 पर जेतरा मसीह यीसु मा भक्ती को संग जित्तो रव्हनो चाहवसे वय सब सताय जाहे। 13 पर पापी अना बहकावन वालो धोखा देवासे अना धोखा खाता हुयो बिगडता चली जाहे। 14 पर तु एना गोस्टी गीन पर जोन तु सीको सेस अना बिस्वास करीसेस यो समझके पक्को बनया रहवो का तु न उनला कोनता लोक गीन ला सीकाइसेस। 15 अना बचपन लक पवीतर गीरंथ तोरो दिल मा लिख्यो सेत जोन तोला मसीह यीसु मा बिस्वास करन लक मुकती पावन लाई अक्कलवर बनाय सकासे। 16 पूरो पवितर गीरंथ परमेस्वर की पिरेना लक रचयो गयो से अना सिक्सा अना समझावन अखीन सुधारन वालो अना धरमिपन की सिक्सा को लाई लाभ दायकसे। 17 ताकी परमेस्वर को जन सिध्द बननो अना हर एक भला काम को लाई पक्को होय जाहे।