1 पौलुस कन लक, जोन परमेस्वर को मनसा लक मसीह यीसु को धाडयो गयो पेरीत सेत। अना आमरो भाऊ तीमुथियुस को कन लक यो चिठ्ठी 2 मसीह मा वोना पवीतर अना बिस्वासी भाऊ गीन को नाव जोन कुलुस्से नगर मा रव्हसेत। आमरो अजी परमेस्वर को कन लक तुमला किरपा अना सान्ती भेटत रव्हे।

3 जब हमी तुमरो लाय पिराथना करसेजन, तो हमी सदा हमारो पिरभु यीसु मसीह को बाबूजी परमेस्वर ला धन्यवाद देसेजन। 4 काहेकि हमीना यीसु मसीह मा तुमरो परमेस्वर को पवीतर लोकगीन काजी माया अना भरोसा को बारे मा आयकु सेत। 5 जबा खरो साजरा बारता पयले तुमरो कठा आयो, तो तुमीना आस लक आयकीस। अना तुमरो भरोसा अना पिरेम वोना चीज़ मा नीव पडयो सेत जोन तुमी आस करासेव। जोन सरग मा तुमरो लाय सुरक्सित ठेवो जावासेत। 6 साजरा बारता आसीरवाद आनासेत। अना पूरो दुनिया मा फर-फुल रहयो से। जसो का तुमीना पयलो बार परमेस्वर को किरपा को बारे मा आयकयासेव। अना खरो खर यो पता चलयो होतो। 7 तुमीना हमारो चहेतो संगी चाकर एपफ्रास लक परमेस्वर को किरपा को बारे मा सीखयासेव, जोन आमरो कन लक मसीह को वफादार बिस्वासी काम करनवारा सेत। 8 ओना आमला बेखटका वोना माया को बारे मा सांगिसेस। जोन ला आतमा न तुम्हीला दियो सेत।

9 एना कारन लक हमी न लगातार तुमरो लाई पिराथना करता रहया, जब लक हमीना तुमरो बारे मा आयका सेत। हमी परमेस्वर लक तुमरो मरजी को लक सबा गियान अना समझ को आतमा लक भरन लाय कव्हसू, जोन वोको आतमा देवासेत। 10 तब जब तुमी पिरभू को रूप मा जिंदगी बितान काबिल होवजोस अना हमेसा आपरो चाल चलन लक वोला खुस करजोस ता तुमरो जिंदगी मा सबा परकार को साजरो करम पैदा करबीन, अना तुमी परमेस्वर को गियान मा बढ़बिन। 11 ओको बड़ाई को ताकत को जसो सबच परकार की ताकत लक ताकतवर होत जावने, यहान तकन की खुसहाली को सँग हर परकार लक धीरज अना सहनसीलता दिसाय सकोह, 12 अना खुसी-खुसी परमेस्वर बाबजी को धन्यवाद, जेना आमला यो काबिल बनायीसेस की जोनना तुमिला उजाड़ को राज मा आपरो पवीतर लोक गीन काजी राखिसेत, वोमा आपरो वारसाना हिस्सादारी राखन काजी साजरा बना दियो सेत। 13 वोना हमला इंधार को अधिकारी को ताकत लक छुड़ाय अखीन हमला अपरो चहेतो टूरा को राज मा सुरक्सित कर दियो सेत। 14 जोन लक आमी ला सूटकारा मिलिसेत। मजे, हमारो पाप छिमा भई सेत।

15 मसीह नही चोवनवारा परमेस्वर को चोवनवारा रूप सेत। उ पहलोटा टूरा से। जोन सबा बनायो गयो चीज लक साजरा सेत। 16 काहेका वोच मा सबा चीजगीन बनायो गयो सेत, चाहे वा सरग को होहे अना भूई को, चोवयो, अना बिनो चोवन वारा, का सिघासन, का सरकार, का राजा को अधिकार, सबचीज वोकोच लक वोको लाय बनायो गयो सेत। 17 मसीह सप्पा चीजहुन लक पयले होतो, अना वोको संग सब चीजहुन वोमा सही जघा मा होती। 18 उ आपरो देह, कलीसिया को मुखिया से; उ देह को जिंदगी को जरिया से। उ पयले पैदा हुया टूरा सेत, जोनला मरन लक जित्तो करयो गयो सेत। जोनलक वा एकलोच सबा चीजगिन मा पयलो जघा हो सकेत। 19 काहेका यो परमेस्वर को खुद को फैसला होतो, का टूरा खुद पूरो जनमन परमेस्वर सेत। 20 टूरा लक, परमेस्वर ना पूरो बिरह्मांड ला आपरो आप लवटान को फैसला करीसेस। परमेस्वर ना आपरो टूरा को रकत लक कूरूस मा मेल मिलाप बनाय अखीन यो काजी सरग मा अना धरती मा, सबा चीजगिन ला लवटा के आनेत।

21 एक बार जबा तुमी परमेस्वर लक लगत दूहुर होतो। अना तुम मन लक बैरी होतो, जोन आपरो कियो गयो खोटो काम अना बिचार को कारन लक होतो। 22 पर अब, आपरो टूरा की देह को मरनो लक, परमेस्वर ना तुमला, पवीतर, सूद्ध अखीन बेकसूर होवन लाय अपरो पुढ़ा आनन काजी, तुमला मेल मिलाप कर आपरो संगी बना लियो सेत। 23 अदी तुम भरोसा को नीव मा पक्को रूप लक बनो रव्हो अना वा साजरा बारता को आस ला जोन तुमी आयकु सेव, नही छोड़यो, जोनको परचार बादल को खाल्या, सारो दुनिया मा कव्हयो गयो अना वोको दास मी पौलुस बनीसेव।

24 अना अब मी तुमरो काजी आपरो दुख को बारे मा खुससेव, काहेका मोरो देह को दुख को बीचमा मी आपरो देह, कलीसिया को कन लक मसीह को दुख ला पूरो करन मा मदद कर रहयो सेव। 25 अना मोला परमेस्वर लक कलीसिया को दास बना दियो गयो सेत। जोनना मोला यो काम करन को लाय आपरो काम दियो सेत। यो पूरो रीत लक अपरो खबर साँगन को काम सेत। 26 जूनो जमाना लक वा लुकयो गोस्टी सेत, जोन वोना सबा मानुसगिन लक सबा लोकगीन लक छिपायो गयो होती, सेत। पर अब आपरो पवीतर लोकगीन ला पता चलयो सेत। 27 परमेस्वर को योजना आपरो लोकगीन को लाय आपरो लुकयो बारता मालूम करानो सेत। यो धन अना गौरव दिलान वालो भेद से जोन वोको कठा सब परजात लोकगीन को लाय आस सेत। अखीन वा राज यो सेत का मसीह तुमरो मा सेत। मजे तुमी परमेस्वर को महिमा मा हिस्सा लेवन वारा सेव। 28 एकोलाय हमी सबला मसीह यीसु को परचार कर सेजन। आमी मसीह मा सबा सम्बव गियान को संग आमी उनला चिताय देवा सेत, अना उनला सिकावसेत। जोनलक हरेक मानूस ला मसीह को संग एक पक्को मानूस को रूप मा परमेस्वर को पुड़ा लायो जा सकेत। 29 असो करन काजी, मी मसीह यीसु को ताकतवर ताकत ला काम मा आनके अखीन जोन काम करासू। वोको लाय मी मेहनत भी करासू।