1 अरे लेकरागीन, पिरभु मा आपरो माय-बाबूजी को हुकूम ला मानोह, काहेकि योच बेस से। 2 "आपरो माय बाबूजी को आदर करो", यो पयली हुकूम से, जोको सँग परन भी से। 3 "जोको लक तोरो सँग साजरो होय अना तु धरती पर लगत दिवस जित्तो रव्हजोस।" 4 अगो बाबूजी गीन, तुमी आपरो लेकरागीन ला गुस्सा नोको दिलाने, पर पिरभु को सिक्सा अना दियो गयो हुकूम मा उनको पालन पोसन करहो।

5 हे नौकर गीन जसो तुमी मसीह को हुकूम मानसो, ओनो रिती लक डरात अना कापत बिनकपट को सच्चो मन लक उनको भी हुकूम मानोह जोन आँग को रितीलक तुमरो मालिक सेत। 6 मानूस ला खुस करन जसो नही, पर मसीह को नौकर को जसो हिरदय लक परमेस्वर को मरजी ला पूरी करहो। 7 जोस को संगा एक नौकर को रूप मा असो काम करोह मानोह जसो यो सेवा ला मानूस की नही पर, पिरभु को जानके साजरी मरजी लक करहो। 8 असो जानके क, चाहे नौकर होय, छुट्टो होय, अदि कोनी साजरो काम करासे, उ पिरभु लक वसोच ईनाम पाहे।

9 हे मालिक गीन, तुमी भी धमकी देवनो छोड़ो अना उनको सँग असो बेवहार करने। हेत राखो, काहेका तुमी जानसो, का उनको अना तुमरो दुई को मालिक सरग मा सेत, अना उ कोनी को पक्स नही करासेत।

10 मतलब यो से का पिरभु मा रव्ह के ओकी लगत च ताकत को संग आपरो आपला ताकतवर बनावो। 11 परमेस्वर को पुरोच हतियार ला धर लेवो। ताकि तुमी सैतान को योजना ला सामना कर सकोह। 12 काहेकि आमरो लड़ाई ता तन को लक नहाय, बल्कि सब लक मोठो मुखिया, अधिकारी अँधियारो को संसारिक ताकत अना दुस्टता राखन वालो आतमिक सेना लक से, जोन बादल मा रव्हसेत। 13 एकोलाय परमेस्वर को सबच हतियार डाक लेवने, जोको लक तुमी बुरो दिवस मा सामना कर सकहो अना सबच काही पूरो करके पक्को रव्ह सकने।रोमन सिपाही

14 ऐना रिती लक खराई लक नोको चुकने अना धरमी बनयो रव्हने, 15 पाय मा मेल मिलाप को साजरो बारता को तैय्यारी को पनही डाकके पक्को रव्हने। 16 एने सबलक मोठी गोस्टी यो से का भरोसा को ढाल को रूप मा ले लेवो। जोको लक तुमी ओनो सबच जलतो हुयो तीर हुन ला बुझाय सको, जो बदी को कनलक छोड़यो गयी सेत। 17 अना सूटकारा को टोप अना आतमा को तलवार, जोन को परमेस्वर गोस्टी जो की आतमा को तलवार से, लेव लेने। 18 हरेक बिनती अना बिनती लक पवीतर आतमा मा सदा पिराथना करत रव्हने। अना यो मन मा हेत राखके सतरक रव्हने की कोसिस लक सबच पवीतर लोकगीन को साठी सदा पिराथना करतो रवहने। 19 अना मोरो लाई भी पिराथना करने की बोलतो बेरा मोला असो ताकत को गोस्टी दियो जाय की मि हिम्मत लक साजरो बारता को छुपयो गोस्टी ला दिखाय सकुह। 20 जोको लाई मि साकल लक बँधयो हुयो राजदुत जसो सेवा कर रही सेउ। पिराथना करने की मि जेना रीती लक मोला बोलनो से, ओनोच रिती लक बगैर डर को संगा साजरो बारता को पिरवचन कर सकू।

21 तुखिकुस, जोन माया वालो भाऊ से अना पिरभु मा बिस्वास लायक दास से, तुमला मोरो हाल को बारे मा सांगेह की तुमी जान सकोह की मि कोन सो हाल मा सेव। 22 मि ओला यो मतलब लक तुमरो कठा धाड़ रही सेव की तुमी आमरो बारे मा जान सकोह अना उ तुमरो दिल मा सान्ती दे सके।

23 अगो भाऊहुन, तुमी सब ला मोठो परमेस्वर बाबूजी अना पिरभु यीसु मसीह कन लक सान्ती अना भरोसा सकट माया मिलेह। 24 जोन आमरो पिरभु यीसु मसीह लक खरो माया राखासे; उन पर परमेस्वर को किरपा होवती रह।