1 यो चिठ्ठी पौलुस को कन लक, जोन परमेस्वर को मरजी लक मसीह यीसु को पेरीत से, इफिसुस का रव्हनवारा सन्तगिन अना मसीह यीसु मा बिस्वासी गिन को नाव से। 2 तुमला आमरो बाबूजी परमेस्वर अना पिरभु यीसु मसीह को कन दया अना सान्ती भेटयो जाय।

3 आमरो पिरभु यीसु मसीह को बाबूजी अना परमेस्वर धन्य होय। जेना आमीला मसीह मा सरगीय जघा मा सप्पा परकार की आतमिक आसिरवाद देईसेस। 4 परमेस्वर आमी ला संसार को पैदा होवनो लक पयले मसीह मा, ओको पुड़ा पवीतर अना बेकसूर होवन लाय निवाड़ी सेस। 5 आमरो पुढ़ा ओको जो पिरेम से ओकोच काजी ओना यीसु मसीह को कन लक आमीला आपरो लेकरा को रूप मा आपनायो जान को लाई ठहरायीसेस। योच ओको मरजी होती अना योच ओको मकसद भी होतो। 6 ओना असो एकोलाई करीस की उ आपरी महिमा वालो किरपा को काजी खुदच ला खुस करे। ओना आमीला जोन ओको चहेतो लेकरा मा से, छुट्टो भाव लक देयीसेस। 7 ओको चढ़ावा मिरतु को कन लक अब आमी आपरो पाप हुन लक सूटकारा को मजा ले रही सेजन। ओको भरपुर किरपा को काजी आमीला आपरो पापहुन को माफी मिलसेत। आपरो वोच पिरेम को जसो जेनला उ मसीह को कन लक आमी पर दिसान चाव्हत होतो। 8 ओना आमीला आपरी मरजी को भेद ला सांगीसेस। 9 जसो की मसीह को कन लक उ हमला दिसानो चाव्हत होतो। 10 परमेस्वर की असी योजना होती की सही बेरा आवनो पर सरग मा अना धरती मा को सबच चीजहुन ला मसीह मा संगरो जाहेत।

11 सबच गोस्टी परमेस्वर को नियाव अना योजना को कन लक कियो जावसे। परमेस्वर ना आपरो निजि मकसद को काजी च हमला ओनोच मसीह मा संत बनन लाई बेचयो से। यो ओकोच कन लक भयो जेनला परमेस्वर ना सब लक सूरू लक पयलेच लक ठहरायीसेस। 12 जेकोलक आमी ओकी महिमा को तारीफ को काजी बन सकबिन। आमी मनजे जिनना आपरी सबच आसा मसीह पर निसान ला कर दियासेजन।

13 जबा तुमना ओनो सत्य को खबर ला आयकियात जो तुमरो मोक्स को साजरो बारता होतो, अना जेने मसीह पर तुमना बिस्वास करिया होता, ता जेने पवितर आतमा को बचन दियो होतो, मसीह को जरीया लक ओको छाप परमेस्वर को कन लक तुमी लोकहून पर लगायी गयी होती। 14 उ आतमा आमरो वारिसपन को छुड़ोती को रूप मा ओनो बेरा तक को लाई हमला देयि गयी से, जब तक का उ हमला जो ओको आपरो सेत, सप्पा परकार लक सूटकारा नही दे देहे। ऐको काजी लोक ओकी महिमा को बड़ाई करेहेत।

15 एकोलाई जबा लक मीना पिरभु यीसु मा तुमरो ओना भरोसा को खबर तुमरो माया को बारे मा जोन सबच पवीतर लोकगीन लाई से, आयकीसेऊ 16 मी तुमरो लाई परमेस्वर को सदा धनवाद कर रही सेउ। आपरी बिनती गीन मा तुमला हेत करूसेव, 17 मि पिराथना कियो करुसेउ की हमरो पिरभु यीसु मसीह को परमेस्वर तुमला विवेक अना दैवीय दरसन की असी आतमा को ताकत देवासे जेकोलक तुमी ओनो महिमा वान मोठो बाबूजी ला जान सको। 18 मि बिनती करूसेव की तुमरो मन को डोरा उघड़ जाहेत अना तुमी उजाड़ को दरसन कर सकने ताकि तुमला मालुम चल जाहे की उ आसा काजक से जेनको लाई तुमला ओना हाकलीसे। अना जेने उतराधिकार ला उ आपरो सबच लोकहुन ला देहे, उ केतरो बलवानना भरपुर से। 19 आमी बिस्वासी गीन लाई ओकी ताकत बिन तुलना रूप लक केतरी महान से। यो ताकत आपरी महान ताकत को ओनो काम को जसो से, 20 जेनला ओना मसीह मा पूरी करीसेस, जबा ओना ओला मरयो हुयो मा लक जित्तो करके आपरी जेवनो कना सरगीय जघा मा 21 परमेस्वर ना उनला हरेक अधिकार पन, हक, ताकत, पिरभुपन अना नामी पद लक लगत वरता जघा देवासे चाव्ह यो ऐना जमाना का होय अना आवन वार जमाना को, 22 ओना सबच काही मसीह को पाय को खाल्या डाक देइस, अना उनच को सब पर हक देयके कलीसिया को वरता ठहरायीसेस। 23 कलीसिया मसीह की तन से, मसीह को सबरो रूप से, जोन सब काही सब तरीका लक पूरो रूप तक धाड़ देसे।