1 भाऊगीन अना बहिनगीन। अदी यो मालुम चलतो का कोनी ना कोनी गलत काम करीसेस तो तुमी लोक जोन आतमिक सेव, ओला नरम* तरीका लक साजरो करबीन। तुमी खुदच सतरक रव्हने कहिं असो न होय की तुमी भी परिक्सा मा पड़ जाहो। 2 असो बोझ लक मोसे को नियम मा एक दुसरो की मदद करबीन अना येने रिती लक मसीह को हुकूम पूरो करबीन। 3 काहेकि अदी कोनी समझसे की मि काही सेव। जबकि काही नही से तो उ आपरो आप ला ठगसे। 4 हर कोनी आपरो काम ला परख लेहे, तबा ओको पड़ोसी को काम मा नही पर आपरो पर गरब करन को बेस कारन होव्हे। 5 काहेकि हरएक मानूस ला आपरो बीड़ा खुदच उठानो पड़हे।

6 जोन मानूस गोस्टी को सिक्सा पावसे, उ आपरी सबच साजरो चीज मा आपरो सिक्सक ला सामिल करे।

7 धोखा नोको खावने। परमेस्वर को ठठ्ठा नही करयो जाय सका। मानूस जोन बोवासे। वाच कापासे। 8 जोन आपरी आँग की आदत को लाई बोवासे, उ आँग की माटी मा विनास की फसल कापासे; पर जोन पवीतर आतमा को लाई बोवासे, उ पवीतर आतमा की माटी मा अमर जीवन की फसल कापासे। 9 आमी भलाई करत-करत हिम्मत न हारबिन काहेकि अदी आमी पक्को बनी रहबिन तो बेरा आवनो पर जरुर फसल कापबिन। 10 एकोलाय जबा तकन आमी ला डाव मिलसे, आमी सबको भला करसेजन। मुख रूप लक उन लोकगीन की जोन भरोसा को कारन आमरो परिवार का सेत।

11 चोवो, मीना कसो मोठो-मोठो सबद मा तुमला आपरो हात लक लिखिसेव। 12 जोन लोक दिखावा को काम लक झुठी बड़ाई पावनो चाव्हसेत। वय देह को खतना करवान को साठी तुमला रोकासेति यो एकोलाय की मसीह को कूरूस को कारन उन पर जुरुम नही कियो जाय। 13 काहेकि सुध्द कियो हुया लोक खुदच मोसे को नियम पालन नही करासेत, बलकि वय तुमरो खतना करन चाव्हसेत जेनको लक वय यो गोस्टी कर सकबिन की आपरो-आपरो आँग मा यो धरम नियम अपनाय लियो से। 14 पर असो नही होहे की मि आमरो पिरभु यीसु मसीह को कूरूस को अलावा कोनी अना गोस्टी पर गरब करुह, जेनको कन लक दुनिया मोरी नजर मा अना मि दुनिया को नजर मा कूरूस मा चघायो जाय चुकयो। 15 कोनी को खतना भयो अना नही एको कोनी मानता नही से, मानता यो गोस्टी को से की आमी पूरो रूप लक नयो संसार बन जाबोन। 16 यो नियम को लक चलनवारो पर अना परमेस्वर को इसरायल पर सान्ती अना तरस होय।

17 अबा लक कोनी मोला तँग नोको करने। मि यीसु को धब्बा ला आपरो बदन मा राखके रव्ह रही सेव।

18 भाऊ अना बहिन गीन। हमरो पिरभु यीसु मसीह की आतमिक दया तुमी लोकगीन पर बनी रहये। आमेन।