1 मोरो कव्हन को मतलब यो से जबा तकन वारिस नाबालिग से, उ सप्पा जायदाद को पिरभु होतो हुयो भी दास लक कोनी तरिको लक बेगरो से। 2 उ बाबूजी कन लक नियत बेरा तकन पालक अना घर रखवालो को बस मा रव्हसे। 3 एने रिति, जब तकन आमी नाबालिग होता तबा तकन दुनिया को उसुल गीन* को कब्जा मा दास बनयो हुयो होतो; 4 पर बेरा पूरो भय जावन पर परमेस्वर ना मोसे को नियम लाई आपरो टूरा ला धाड़िसेस उ एक बायका लक पैदा भयो, 5 जोन लक उ मोसे को नियम लक कब्जा मा रव्हनवालो ला सुड़ाय सकेह अना आमी परमेस्वर की गोद लिया सँतान बन जावबिन।

6 तुमी लोक सँतान ही सेव। एको पुरुप यो से की परमेस्वर ना आमरो मन मा आपरो टूरा को आतमा ला धाड़िस। जोन पुकार के यो कव्हसे, "बाबूजी, अजी।" 7 एकोलाय अब तुमी दास नही, सँतान सेव अना संतान होवन को नातो लक तुमी परमेस्वर की दया लक वारिस* भी सेव।

8 तुमी लोक पुढ़ा, जबा तुमला परमेस्वर को अक्ल नही मिलयो होतो, असो देवतागीन की सेवा-जापता करत होतो, जिनको करनो वाकई मा साजरो नाहाती। 9 पर अबा तुमी परमेस्वर ला वोरख लियो सेव या असो कव्हबिन की परमेस्वर ना तुमला अपनाय लेइसेस, तो तुम्ही कसो मंग उन बेजोर अना बेसार उसुल गीन की आसरा ले सकासेव? का तुमी एक गन मंग उनकी सेवा अपनावन चाव्हसो? 10 तुमी लोक मुख दिवस, माह, मौसम अना बरस मनासेव। 11 मोला भेव से, कहीं असो न होयहेत की मीना तुमी लोकगीन को बीच मा बेकार मेहनत करीसेव।

12 भाऊ अना बहिनगीन। तुमी मोरो जसो बनों, जेने रिति लक मि तुमरो जसो बन गयो सेव, योच तुमरो लक मोरो बिनती से। तुमी लोकगीन ना मोरो सँगा कोनी गलती अन्याव नही करी सो। 13 तुमी जानासो की मोरो देह बीमार होवनो को काजी मोला तुमला पयलो गन साजरो बारता आयकवानो को मौका मिलिसे। 14 ऐना रिती लक मि आपरो आँग की हिनो होवनो को काजी तुमी लोकगीन को साठी परीक्सा बनीसे, मंग भी तुमीना न तो मोरो गुस्सा करीसेव, अना न मोरो बारे मा घिरना चोवाईसेव, एको सिवा तुमना मोरो असो सेवा-सत्कार करीसेव, मानो जसो मि परमेस्वर को दूत या खुदच यीसु मसीह सेव। 15 ओना बेरा तुमी लोक आपरो ला साजरो समजत होतो, अता तुमी लोकगीन को उ गवाही किता गयो? मि तुमी लोकगीन को बारे मा यो तो कव्ह सकत होतो। की अदी होय सकतो तो तुमी आपरी डोरा भी हेड़ के दे दिया रव्हतत। 16 का मि तुमरो दुस्मन एकोसाठी बन गयी सेव की मि लोकगीन लक खरो-खरो कव्हसू।

17 जोन लोक तुमरो पर दया करके मिलान चाव्हसेत। पर वय साजरो मकसद लक असो नही कर रही सेत। वय तुमला मोरोलक अलग करनो चाव्हसेत, जोकोलक तुमी उनला आपरो पर हुकुमत करन देव। 18 यो साजरो गोस्टी से की लोक तुमरी दया चाव्हसेत पर यो साजरो मकसद लक होय अना सदा रह, केवल ओनो बेरा तकन नही जबा तकन मि तुमरो बीच पायो जावासू। 19 मोरो चहेतो लेकरा। जबा तकन तुममा मसीह को स्वरुप नही बन जावा। तबा तकन मि तुमरो लाई मंग जच्चा की पीड़ा सह रही सेव। 20 मि कितरो चाव्हसु की अबा तुमरो बीच रव्हतो जेनको लक मि सही भासा को उपयोग कर सकू, काहेकि मोरी समझ मा नही आवा की मि तुमला काजक कहुँ।

21 तुमी जोन मोसे को नियम को बस मा रव्हन चाव्हसो, मोला यो साँगो, का तुमी यो नही आयको की कानुन तुमला का कव्हसे? 22 ओमा लिखीसे की अबराहम को दुई टूरा होतीन एक सेविका लक अना दुजो आजाद बायको लक। 23 सेविका को टूरा को पैदा होवनो प्रकति को कन लक भयो। पर छुट्टो बायको को टूरा को पैदा होवनो परन कन लक। 24 ऐना गोस्टी को एक दिखयो मायना से। या दुई बायको दुई वायदा को नामना सेति। एक सीनय परवत को, जेनको लक दास पैदा होवासेत अना वा हाजिरा से। 25 हाजिरा अरब देस को सीनय परवत मानो जासे, जोन अबा को यरुसलेम को जसो से, काहे की वा आपरी संतानगीन को सकट सेवा मा से। 26 पर वरता को यरुसलेम आजाद से, अना वा आमरी माय से। 27 काहेकि लिखीसे,

"ओ बँझलु, तु जोन नही जानासेस,

पिरभु मा खुस रव्ह। तु जोन जनन को दुख नही जानस, खुसी लक झुम उचल,

काहेकि तजी हुई की लेकरा,

बयाही हुयी की लेकरा* लक लगत सेत।"

28 "ओ भाऊ गीन, तुमी इसहाक को जसो परन को लेकरा सेव। 29 पर जसो ओनो बेरा आँग को कनलक पैदा हुयो ता आतमा को कनलक जनमो हुयो ला सतावत होतो, वसोच अबा भी होवासे। 30 पर पवितर गिरंथ मा काजक लिखीसे? दासी अना ओको टूरा ला हेड़ देव, काहेकि दासी को टूरा तो खुल्लो बायको को टूरा को सँग हक रखन वालो नही होहे।" 31 एको साठी हे भाऊ गीन, आमी दासी का नई सेजन पर खुल्लो बायको को लेकरा सेजन।