1 चौदह बरस बीतन को मंगा मि बरनबास को संगा यरुसलेम गयो। अना तीतुस ला संगा ले गयो। 2 मि परमेस्वर को सांगयो लक उता गयो। अना जोन साजरो बारता मि परजात गीन * मा सांगिसेउ। वाच मीना उनला सांग दियो, पुड़ा पेस कियो। पर एकलो मा उनला जोन मोठो समजो जावत होतीन। की कहीं मोरी यो बेरा की या पिछलो दौड़ धुप अकारत न होय जाय। 3 पर कोनी ना तीतुस ला जोन मोरो संगा होतो अना यूनानी से, खतना करान को साठी मजबुर नही करीन। 4 यो उन दोगला भाऊगीन लक भयो। जोन चोरी लक धस आया होतीन की हमारो ओनो सुट की जोन यीसु मसीह मा हमला मिलीसे। भेद आन के ना हमला दास बनाऐत। 5 आमी ना जरा सो देर लाय भी उनको कब्जा मा रव्हनो ला नही मानया। पर एकोलाय की साजरो बारता को खराई तुममा बनी रव्हे।

6 पर वय लोक जो मान महातम को समजो जावत होतिन, वय कसा होतीन मोला एकोलक काही काम नाहाति; परमेस्वर कोनी को पक्स नही करा-उनलक जोन काही समझो जावत होतीन, मोला काही भी नही मिलीसे। 7 पर एको बदला मा जबा उनना चोवयो की जसो लक पतरस ला खतना कियो हुयो लोकगीन को भरोसा साठी, साजरो बारता को काम सौपयो गई से, वसोच मोला बिन खतना कियो परजात लोकगीन को साठी साजरो बारता को काम सौपयो गयो से। 8 काहेकि जोन परमेस्वर ना पेरीत पतरस लक खतना करनवालो मा अगुवाई को काम मोठो असरदार तरीको लक करवाइ, ओनाच मोरो लक भी परजात गीन मा असरदार काम करवाइसेस। 9 जबा उनना ओना दया ला चिन्हिन जोन मोला मिली होतो ता याकूब, कैफा अना योहन ना जो कलीसिया को खम्बा समजो जावत होतीन, मोला अना बरनबास को संगती को उज्जो हात दियो की आमी परजात जातिगीन मा अना वय खतना करन वालो मा, काम करयेत। 10 उनना आमी लक केवल योच बिनती करीन की गरीबगीन की हेत लेहेत। यो काम ला करन को साठी मि भी जोस मा रहयो। 11 पर जबा कैफा अन्ताकिया आयो तो मीना ओको पुढ़ा ओको बिरोध कियो। काहेका उ दोसी होतो।

12 काहेकि याकूब को यहान लक काही लोकगीन को आवन लक पुढ़ा, उ परजात गीन को संग जेवन करत होतो। पर जबा वय आइन ता खतना वालो को भेव लक उन लक हट गयो अना एक कना करन लगयो। 13 सुटयो यहूदिगीन ना भी यो छल मा ओको संग देइन, यहान तकन की बरनबास भी उन लोकगीन को छल को कारन बहक गयो। 14 पर यो चोय के की वय लोक साजरो बारता को खराई को लक जिंदगी नही कर रही होतीन ता सब को पुढ़ा मीना पतरस लक कव्हयो, "जबा तु यहूदी भयके परजात गीन की जसो जिंदगी करसेस। ता तु गैरयहुदिगीन ला यहुदी को जसो चलन ला काय साठी कव्हसेस?"

15 आमी ता जलम लक यहूदी जाति सेजन, "पापी परजात" गीन मा लक नही। 16 आमी जानसेजन से की मानूस मोसे को नियम लक नही पर मसीह यीसु पर भरोसा करनो लक धरमी ठहरायो जासे। यो काजी आमी ना भी मसिहा यीसु पर भरोसा करीसेजन की आमी मोसे को नियम को लक नही पर मसीह पर भरोसा करन लक धरमी ठहरबोन। काहेकि मोसे को नियम लक कोनी भी मानूस देह धरमी * नही ठहरायो जाहे। 17 आमी जो मसीह मा धरमी ठहरायो जावन, अदी खुदच पापी हिटबोन ता का मसीह पाप को दास से? कभीच नही। 18 जेनला मि एक बार नास कर चुकीसेव, अदी ओला मंग बनासु तो खुदच ला दोसी ठहरासू। 19 काहेकि मोसे को नियम को काम कन लक मि नियम को साठी कूरूस मा चघायो गयो की परमेस्वर मसीह को लाई जित्तो रह सकू। 20 मि मसीह को सँग सुली पर टाँगयो गयो सेव। अता मि जित्तो नही रहयो, पर मसिहा मोरो मा जित्तो से, अना अबा मि जोन तन मा जित्तो सेउ, तो केवल ओनो भरोसा लक जित्तो सेउ जोन परमेस्वर को टूरा पर से, जेने मोरो लक माया करीस अना मोरो साठी आपरो आप ला दे देइस। 21 मि परमेस्वर को दया ला अकारत नही ठहराउ। काहेकि अदी नेकीपन मोसे को नियम को काम कन लक मिल सकसे तो मसीह को मरनो अकारत से।