1 तब फरिसी अना मोसे को नियम को गुरू, जोन येरुसलेम नगर लक आयो होतीन ओको आखा-पाखा जुमला भईन। 2 अना ओको चेला गीनला बिना हात धोये के* जेवन जेवत चोइन।

3 काहे का फरिसी अना सब यहूदी अना मुखिया बिना हात धोवन को नेम कियो जेवत नही होतीन, काहेकि बाप दादो की रिवाज मा चलत होतीन, 4 अना बाजार लक आयके, पानी लक आपरो आप ला सुध्द * करत होतीन तबच जेवत होतीन। असो बेजा सारो रिवाज ला मानके चलत होतीन, जसो कटोरा करसा ताँबा को भाँडो ला धोवनो अना माँजनो।

5 फरिसी मुखिया अना मोसे को नियम को गुरू गिन ओको लक पुसिन "असो काय बात से? का तोरो चेला गीन बापदादा को रिती रिवाज नही चला सेत अखीन बिना हात धोये जेवासेत?"

6 यीसु ना उन लक कहीस,

"यसायाह भविस्यवक्ता ना तुम्हि कपटीगीन को लाय सहीच लिख्योसे"

"वय लोक गीन टोन्ड लक मोरो आदर करासेत,

पर इनको दिल मोरो लक लगत दूहुर सेत।

7 वय फालतू मा मोरो भगती करासेत,

अना मानूस को सिक्सा ला धारमिक नियम को रुपमा सबला सिकावासेत*।"

8 "तुमी परमेस्वर को हुकूम ला टालासो अना मानूस को रीती रिवाज ला पालन करोसो।"

9 यीसु ना उनलक कहीस, "तुम्हि लोक बेजा चलाक सेव, परमेस्वर की हुकूम ला तोड़के खुदच की रिति रिवाज ला मानासेव।" 10 तुमहि ला मोसे ना सांगयो होतो, "आपरो माय-बाप को आदर करने, अना जोन कोनी माय-बाप ला बुरो कहे, उ मार दियो जाय" 11 पर तुम्हि सांगासो कोनी मानूस आपरो माय-बाप कहेत का, जोन काही पालन को खरचा से, ओला मि परमेस्वर ला भेट * करासेऊ। 12 ता वोला आपरो माय-बाप को लाय काही नही करन देसो। 13 "यो तरीका लक तुम्हि आपरो रीत लक परमेस्वर को हुकूम ला टाल के ना आपरी रीती रिवाज ला मानासो।"

14 यीसु ना जनता ला आपरो कठा बुलाके उन ला साँगीस, "तुमी सब मोरी गोस्टी ला आयको अना समजो। 15 असी कोनी बाहरी चीज नहात जोन मानूस को भीतर जायके वोला असुद करे। जोन भीतर लक बाहेर आवासे ता वा च असुद करासे। 16 जोको कठा कान से, उ मोरी आयको*।"

17 जबा उ जनता को कठा लक घर मा गयो, त चेला गीन वोको लक हाना को बारे मा पुसन लगीन, 18 यीसु ना कहीस "का तुमी एतरो नासमज सेउ का? तुम्हिला एतरो समज नहात? का जोन चीज बाहेर लक मानूस को भीतर जासे वा मानूस ला असुद नही करासे। 19 काहे की उ मन मा नही पर सीध्दो पोट मा जावासे, अना हगतबेरा बाहेर हीट जासे," असो परकार यीसु ना सब जेवन को चीज ला पवीतर ठयरायो।

20 यीसु ना मंग साँगयो, "जोन मानूस मा लक हिटासे वोच, ओला असुद करासे। 21 काहेका भीतर मन लक खोटो बिचार, मजे छिनालापन, चोरी, जान लक मारनो, 22 लोभ, खोटो गोस्टी, छल, लुचपन, खोटो नजर, निन्दा, अहम अना मुरखता हिटसे, 23 यो सब खोटो गोस्टी मानूस को भीतर लक हिटासे, यो मानूस ला असुध्द करासे।"

24 मंग यीसु उता लक सुर अना सैदा देस को सीवमेढ मा आयो अना एक घर मा गयो। उ चाहत होतो की कोनीला पता नोको चले, पर उ लुक नहि सकयो। 25 एक बायको, जोकि लहान टूरी, एक भूत को कब्जा मा होती वा यीसु को बारे मा आयक के आई। अना यीसु को पाय पडन लगी, 26 वा बायको गैरयहूदी होती। जोन सीरिया देस की रव्हनवारी होती। वोना यीसु लक बिनती करी का मोरी टूरी लक भूत ला हेड़ दे। 27 यीसु ना वा बायको लक कहीस, "पुढा टुरागीन ला अघान दे, काहे का टूरा को भाकर कुतरा को पुढा डाकनो साजरो नहाय।"

28 "वोना जवाब देइस।" पिरभु या बात खरो से, "पर कुतरा जुठन-जाठन जेवासेत।"

29 यीसु ना वोको लक कहीस, "तोरो भरोसा को कारन, भूत तोरी टूरी मा लक हिट गयो।"

30 जबा वा बायको आपरो घर मा जायके चोयी, टूरी खाट मा सोयी होती, अना भूत हिट गयो होतो।

31 मंग सुर सैदा को देस लक हिटके, दिकापुलिस* मजे दहा नगर लक होतो, गलील को सागर कठा पहुचयो। 32 अना लोकगीन एक बावरो ला जो हकलात होतो, ओको जवर आनीन अना बिनती करीन की ओको पर हात राख 33 तबा वा बावरो ला भीड़ कन लक अलग ले गयो, अना आपरो बोट ला ओको कान मा डाकीस अना थुक के ओकी जुबान ला छुईस 34 अना सरग कना देखके ओना पोट भर सांस लेके कहीस, "इप्फत्तह" मजे "उघड जाय।"

35 अना ओको कान उघड़ गईन अना जुबान को बंधन भी उघड़ गई मंग उ सप्पा-सप्पा बोलन लगयो। 36 तबा ओना उनला कहीस, यो गोस्टी को कोनी ला परचार नोको सांगने, पर मना करनो पर वय अखीन ओको बारे मा सांगन लगीन, 37 अना वय लगत चकित भयके कव्हत होतीन, "वोना जोन काही भी करीसेस, साजरोसे। उ मुक्कोपन ला बोलन अना भैरागीन ला आयकन को ताकत देसे।"