1 ता यहूदी होवन को काजक फयदा सेत, अना खतना को काजक हेलु सेत? 2 नही फायदा तो सेत। काहेका सब लक पयले तो कानून उनला च भेटयो होतो।✝3:2 रोमियो 9:4; भजनसंहिता 147:19-20; 103:7 3 यदि यहुदी मा लक काही अबिस्वासी हिटयो तो काजक फरक पडसे। का उनको हुकूम तोडनो परमेस्वर को हुकूम ला बिगाड देहेत। 4 पक्को नही! अदि हरेक मानूस खोटो सेत ता का भयव, परमेस्वर तो खरो से। जसो गीरंथ मा लिख्यो से,

"जबा तू सांगेत, तबा तु सही मनो जाहेत,

अना जबा तोरो फैसला होयेत, तोरो जीत होयेत।"

5 तरी का होयेत? अदी आमरो खोटो काम करनो लका परमेस्वर को अधिकार अखिन लगत रूप लक चोवासेत। का अमी कव्ह सका सेत का परमेस्वर अमीला सजा देवा सेत वा खोटो सेत? यदि आमरो अधरम परमेस्वर को न्यायीपन दिसावसे तो आमी काय सांगबिन? 6 असो पुसनो सुभाविक सवाल सेत। तरी यो सवाल को कोनी मतलब नाहोती। यदि परमेस्वर अन्यायी होतो, तो उ जग को न्याय कसो कर सकेत।

7 लेकिन का होयेत अगर मोरो खोटो वोको खराई ला अखिन सफा-सफा रुपलक उभो करके परमेस्वर को महीमा को काम करा सेत? मोला अबा भी पापी को रूपमा काहे धिक्कारो जानो पायजे? 8 काहे नही कव्हबीन? "अमिला बुराई करन देव, जोन लक साजरो भय जाय।" काही लोकहुन, सहीमा असो आरोप लगाय के मोरो बेइज्जती करयो सेत। उनको भी निन्दा होयेत, जसो होवनो पायजे।

9 मंग का अमी यहुदी गैरयहुदी को संग तखड़ी मा तौलन मा बजनदार सेत? बिलकुल नाही। मीना पयलेच समजायो सेत का, यहुदी अना गैरयहुदी दुयी पाप को ताकत को भितर च सेत। 10 जसो लिख्यो से

"कोनी भी असो नाहोति जोन न्यायी होय,

11 कोनी अक्लवर नाहोति,

जोन परमेस्वर को अराधना करतत।

12 सबा परमेस्वर लक दूहुर भयो सेत।

वय सबच वाईट सेत। कोनी असो काम करासेत नाही।

जोन परमेस्वर को नजर मा सही सेत। एकच नाही।

13 उनको गरो उघाड़ो हुवो मठ को जसो सेत। उनको गोस्टी मा छल कपट सेत।

अना उनको ओठ मा सरप को जहर सेत।

14 उनको भासा कड़ु बिक अना सराप लक भरयो सेत।

15 उनला मारपीट करनो अना जान लक मारन को घायी सेत।

16 उनको रस्ता सत्यानास, अना बिपत लक भरयो सेत।

17 ओन्हीसीन सान्ती को रास्ता नही जान पाईन।

18 अना उनको डोरामा परमेस्वर को भेव नाहती।"

19 आमी जान सेजन का मोसे को नियम जोन काही सांगा सेत, वा वय लोकगीन ला सांगा सेत, जोन कायदा को अधिन सेत। जोन को लक हरेक मानूस को जुबान मा ताला लगी जाय। अना परमेस्वर को पूढा सारो जग सजा को काबील मानो जाय। 20 काहे का मोसे को नियम को लक कोनी भी मानूस तन परमेस्वर को पूढा धरमी ठहरायो नही जाहेती। मोसे को नियम केवल पाप को गियान करासेत।

21 तरी अबा परमेस्वर ना लोकगिन को संगा रव्हन को एक असो तरकीब हेड़यो सेत। जोनको कानून लक कोनी मतलब नाहोती। जबकि मोसे अना सबा भविस्यवक्ता गिन ना कानून को पक्स मा गोस्टी कियो सेत। 22 बिना भेद-भाव को परमेस्वर ना सबा बिस्वासी गिनको लाय, यीसु मसीह मा भरोसा ठेवनो लका परमेस्वर को न्यायीपन दरसायो गयो सेत। 23 हरेक मानूस ना पाप करयो सेत। अना परमेस्वर कन लक दियो तेज बचाव लक लगत दुहूर सेत। 24 पर परमेस्वर को किरपा लक फुकट मा दियो, भेट सबला पिरभू यीसु कन लक सूटकारा देयके सहीमा धरमी बनयो गयो सेत। 25 परमेस्वर ना यीसु मसीह ला लोकहुन को लाय बली को रूपमा दे दियो। जोन लक वोको बोहायो गयो रकत लक वा साधन बन जाय। जेनको लक लोकहुन को पाप ला, वोको मा भरोसा राखन लका माफी कर दियो जाय। परमेस्वर आपरो न्यायीपन दिसावन लाय, जुनो बेरा मा धिरज धरयो। अना लोकगिन को पाप ला अनदेखयो कर देत होता। 26 पर परमेस्वर अबा को बेरामा पाप ला अनदेखयो नही करतत। पर उ पाप ला हटाय के आपरो धरमी पन दिसावा सेत। अना यीसु मा बिस्वास करन वालो ला साजरो राखा सेत।

27 एकोलाय कोनी ला आपरो उपर घमंड करन को अधिकार नही रहयो, वोको तो कोनी जघा नाहती, कोनतो नियम को कारन लक, का मोसे को नियम को कारन लक, नही पर भरोसा को नियम को कारन लक, 28 काहे का आमी मान सेजन का मानूस मोसे को नियम को करमकांड लक अलग, भरोसा लक धरमी ठहरायो जावासेत। 29 का परमेस्वर केवल यहूदी गीन को परमेस्वर से? का उ गैरयहुदी को परमेस्वर नही सेत। उ सचमूच मा गैरयहुदी को भी परमेस्वर सेत। 30 काहेका केवल एकच परमेस्वर से। जोन खतना कियो यहूदी गीन ला उनको भरोसा लक नेक ठहरायेति वसोच गैरयहुदी ला उनको भरोसा लक नेक ठहरायो सेत। 31 तो का हमी यो भरोसा लक मोसे को नियम ला रद्द करासे? कभी नही पर हमी मोसे को नियम ला खरो ठहरावसेजन।