1 राजा नबूकदनेस्सर ना सोन्नो को एक लगत मोठो मूरत बनवासेस। वा साठ हात ऊच्चो अना छय हात चवडो* होति। वोना मुरत ला बेबीलोन देस को दूरा नावको बर्रा मा मडवायो। 2 अना अधिकारी गिन, राज्‍यपाल गीन, मंतरि गिन, खजांचि गिन, न्‍यायीगिन, सजा देवन वालो, अना परदेस को सप्पा उच्चो अधिकारी गीनला मूरती को उदघाटन मा जवर खबर धाड़यो, का वय महाराज नबूकदनेस्सर को लक मडायो सोन्नो को मूरती को उदघाटन को मौका मा उभा होहे। 3 तबा राजा नबूकदनेस्सर को हुकुम को अनुसार सबरी अधिकारी लोक उदघाटन मा जमा भयीन, अना मंडायो सोन्नो को मूरती को पूढा एकसंग उभा होतिन।

4 तबा घोसना करन वालो ना उच्‍चो सबद मा कह्यो "ओ जगत का बेगरो-बेगरो राज, बेगरो-बेगरो कुल अना बोली बोलन वालो लोखहुन! तुम्हिला यो हुकुम दियो जासे 5 का जोन बेरा तुम्हि नरसिंगा, बांसुरी, वीना, सारंगी, सितार, पेपारी अना अवर सबच परकार को बाजा-ढप्पली को आवाज ला आयको, तबा तुम्हि वोच बेरा राजा नबूकदनेस्सर लक मडायो सोन्नो को मूरती को सामुर भुयी मा पड़के वोला परनाम करो। 6 जोन मानूस मूरत को सामुर पड़के वोको मान नहि करहे, वोय वोना बेरा धधकतो हुयो स्तो को भट्ठी मा फेंक दियो जाहे।"✝

7 अता जगत का बेगरो-बेगरो राज, अना बोली को बोलन वाला लोगहुन ना असो च करिन। जोन बेरा तुर्रा, बांसुरी, वीना, सारंगी, सितार, पेपारी अना सबच परकार का बाजा को सबद आयको, वय गदने राजा नबूकदनेस्सर लक मडायो सोना को मूरत को सामुर पड़ के पाय पड़ीन।

8 पर वोना च बेरा काही कसदी पंडित राजा नबूकदनेस्‍सर को जवर गयिन, अना उन ना यहूदि गिनको लाय इरसा को कारन राजा लक चुगली खायिन। 9 उनना वोको लक कहिन, महाराज नबूकदनेस्सर लाखों साल जीव! 10 महाराज तुम्हि ना राज्य ला हुकुम दियो होतो, का जसोच बाजा सूरू होय सोन्नो को मूरत को पाय पड़े अना अराधना करे । 11 अखीन जोन मानूस मुरती को मोहरा पड़कर ओको अराधना नही करहेत, ओला धधकतो हुयो स्तो की भट्ठी मा फेंक दियो जाहे।

12 महाराज, तूना जोन यहूदि गिनला बेबीलोन देस को राज-काज को बेवस्ता को लाय ठयरायो से, वय तोरो कन लक हुकुम ला पालन नही करा सेत। उनको नाव सदरक, मेसक अखीन अबेदनगो सेत वय तोरी गोस्टी नही मानासेत अना तोला दुरियावा सेत।

13 यो आयकत च नबूकदनेस्सर को गुस्सा भड़क उठायो। वोना हिजड के हुकुम दियो, सदरक मेसक अना अबेदनगो ला आनो! तबा सिपाई गिन वय तीनो ला राजा को मोहरा आनीन। 14 नबूकदनेस्सर ना उनको लक पूसयो "ओ सदरक, मेसक अखीन अबेदनगो, का यो गोस्टि खरो से का तुम्हि ना मोरो मडायो देवता को मान नही करयो सेव? 15 अता अदि तुम्हि नरसिंगा, बांसुरी, वीना, सारंगी, सितार, पेपारी अखीन सब परकार को बाजा को अवाज आयक के मोरो लक मढायो मूरती को समोर पड़ के परनाम करने ता साजरो से नही ता तुम्हरो नास भयी जाहेत। अना तुम्हिला गदने धधकतो हुयो स्तो को भट्टा मा डाक दियो जाहेत। तबा मी चोहु तुम्हिला कोनतो देवता बचावा से?"

16 सदरक, मेसक अखीन अबेदनगो ना राजा नबूकदनेस्सर ला जवाब दियो "महराज एको बारेमा जवाब देवनो काही जरूरी नहात।" 17 काहेका यदि तुम्हि आमरो संग असो बरताव करहेत ता जोन परमेस्वर को अमी सेवा करासेजन वोच अमीला स्तो को भट्टी अना महाराज तोरो हात लक भी सोड़ा लेहेत। 18 अदि असो नही भयो ता भी अमी महाराज तोरो मंडायो सोन्नो को मूरती को नवके मान नही राखबीन। *

19 नबूकदनेस्सर गुस्सा लक भन्ना गयो, अना वोको चेहेरा सदरक, मेसक, अबेदनगो को लाय लाल पिवरो होवन लगयो। अना वोना हुकुम दियो भट्ठी को स्तो ला सात गूना अखीन तेज करो। 20 त वोको बाद सेना गिनला सदरक, मेसक अखीन अबेदनगो ला हात पाय बान्ध के स्तो मा फेकन को आदेस दियो। 21 सैनीक गीनना राजा को हुकुम को अनुसार तीनो ला उनको कपरा समेत बान्धके धधकतो स्तो को भट्टी मा डाक देयीन।

22 वा भट्ठा तो राजा को पिक्को हुकूम होवन को कारन लगत धधकायो गयो होतो, यो कारन लक जोन मानूसगिन ना सदरक, मेसक अना अबेदनगो ला उठायो पर वोच स्तो को आँच लक मर गयीन, 23 अखीन यो तीन मानूस सदरक, मेसक अखीन अबेदनगो बन्‍धे-बंधाव वोना धधकतो हुयो इस्तो की भट्ठी मा डाक दियो गयो। *

24 राजा नबूकदनेस्सर ला अचरज भयो। उ गदने उठयो, अना आपरो सलाकार गिनला पुसयो, का अमीना तीन च मानूस ला भट्टी मे नही डाकयो होतो ?

उन ना जवाब दियो हव महराज यो सहीसे!

25 तबा राजा ना कह्यो , मी ता चार मानूस ला इस्तो पर हिन्डतो चोवासू। वय बन्धो नहात उनको तन ला काही नही भयो वय जसोको तसोच सेत। अना चवथो मानूस परमेस्वर को टूरा जसो से।

26 नबूकदनेस्सर धधकतो हुयो इस्तो की भट्ठी को दरवाजा को जवर आयो। अना हाकलयो, ओ सबलक वरता परमेस्वर को सेवक हुन सदरक, मेसक अखीन अबेदनगो, बाहेर हिटो, इता आव!

तबा सदरक, मेसक अखीन अबेदनगो स्तो लक बाहेर हिटिन। 27 अधिपती, हाकिम, राज्‍यपाल अखीन राजा को सलाकार जमा होय गइन। उनना चोयो का उन तिन्हि मानूस को तनमा स्तो को काही असर नही होतो। उनको एक चुन्दि भी नही जलयो होतो। उनको कपरा जसो को तसो च होतो, उनको तन लक जलन को बास तकन नही आवत होतो।

28 तबा नबूकदनेस्सर राजा ना कह्यो, धन्‍य सेत सदरक, मेसक अखीन अबेदनगो को परमेस्वर, जोनना आपरो दूत धाड़के आपरो बिस्वासी सेवक ला बचायो, जोन मोरो हुकुम टाल के अखीन अपरो तनला इस्तो मा जलन काजी दे दियो का वय आपरो परमेस्वर को सिवाय दूसरो देव को पूजा नोको करेत। 29 एकोलाय अबा मी यो राज हुकुम देवासू का यदि कोनी रास्ट अखीन भासा को मानूस सदरक मेसक अखीन अबेदनगो को परमेस्वर को बिरोध मा काही सांगेत ता वोको तन तुकड़ा-तुकड़ा कियो जाहेत, अखीन ओको घर तोड़ दियो जाहे, काहेका उनको परमेस्वर को सिवाय अखीन कोनि देव नहात जो असो परकार लक आपरो सेवक गिनला बचा सकेत।

30 तबा राजा नबूकदनेस्‍सर ना बेबीलोन देस मा सदरक, मेसक अखीन अबेदनगो को पद ऊच्चो करयो। *