1 राजा बेलसस्सर ना एक हजार मोठो अमीर गिनला मोठो जेवन मा नेवता दियो। अना उनको संग अंगूर को रस पियो। 2 जबा वय अंगूर को रस पिबत होतिन, तबा बेलसस्सर राजा ना हुकुम दियो का, सोन्नो अना खुरो का कप अना बटकी जोन भान्डो वोको बाप नबूकदनेस्सर ना यरूसलेम को मन्‍दिर लक हेडके आनीस होति, उनला आनो का उन मोठो अमीर गिन अना वोकी बयका गिन अना रखेल उनमा अंगूर को रस पिये। 3 तबा झट सोन्नो का बटका अना कप जोन यरूसलेम मन्‍दिर लक लूट कर लायो गयो होतो उनला काम करन वाला लेयके आनयो अना उनमा अधिकारी अना उनकि मोठो अमीर बयका गिन, रखैल , अंगूर को रस पीवन लगीन। 4 वय अंगूर रस ला पीयके सोन्नो-खुरो, पीतल लोहा लकड़ी अना गोटा को देवता गिनला पुजन करत होतिन। 5 तबा अचानक मानूस को हात पिरकट हुयो अना चूनो पोतो भीट मा लिखन लगयो। जिता दिवो लक तेज उजाड़ होति अना राजा ना हात ला लिखतो चोयो। 6 वोला चोयके राजा भेव लक भर गयो, अना उ मन च मन मा घबरा गयो। अना वोको कम्मर को जोड़ ढिल्लो भयी गयो। अना कपकपात वोको टोघरा एकमेक लक टकरान लग्यो। 7 वोना तांतरिक कसदी पंडित अना सकून बतावन वालो ला बुलायो, अना राजा उच्चो अवाज लक कह्यो जोन कोनी च यो लेख वाच के मोला आयकाव अना अरथ सांगेत वोला मी लाल भट्टा रंग को कपरा गरो मा सोन्नो को माला पहना कर अखीन उ बेबीलोन राज मा ताकत मा तिसरो होहेत। 8 तबा राजा को सलाकार सामुर आयीन पर वोमा लक कोन्हि भी ऊ लेख ला वाच के अरथ नहि सांग सकिन तबा 9 तबा राजा बेलसस्सर बेजा घबरा गयो अना वोको टोन्ड पीवरो होय गयो। वोका मोठो अमीर लोग भी अता काजक करनो से? उनला काहि समज मा नहि आय रहयो होतो का अता काजक करबीन? अना काजक नोको करबोन। 10 राजा अना मोठो अमीर गिन को आयक के राजा की माय जेवन खोली आयी। अना वोना आपरो टुरा ला कहि, महाराज तुम्ही जूग-जूग जियो! तू नोको घबराव, ना दुखी नोको होय! 11 तोरो राज्‍य मा दानियल नाव को मानूस से, जोनको नाव तोरो अजी ना बेलतसस्सर राख्यो होतो, वोमा पवितर देवता गिनको आत्मा रव्हासेत। अखीन वोना राजा के दिवस गिनमा वोमा उजाड़, कुसलता अना देवता गिन को बरोबर अक्कल पायो गयो। हे राजा, तोरो बाप नबूकदनेस्सर राजा होतो, वोना वोला सबरी ज्‍योतिसि गिन, तांतरिक, कसदी पंडित, अना दूसरो सगून बिचारन वालो गिन को मुखिया ठयरायो होतो। 12 काहेका वोमा एक साजरो लक साजरो आत्‍मा, गियान अना समज से। अना सपन को फर सांगन , अना उलझो सवाल ला सुलजा के सक दुहुर करन को ताकत वोमा पायो गयो , एकोलाय अबा दानिय्येल मजे बेलतसस्‍सर ला बुलायो जाय अना वोच एको अरथ सांगेत असो राजा कह्यो।

13 तब राजा दानिय्येल लक भीतर बुलावाय के पूसयो का तू वोच यहूदी हेड़यो गयो आस, जोनला मोरो अजी राजा ना तुम्हिला यहूदा लक आनयो होतो? 14 मी ना तोरो बारेमा आयकी सेऊ का पवितर देव को आत्मा तोरो भितर रव्हसे। अना तोरो मा उजाड़ समज अना बेजा मोठो किसम को गियान से। 15 चोय अबा पन्डित अना तांतरिक लोगहुन मोरो कठा एकोलाय आनयो गयो होतिन का लिख्यो हुयो ला वाच के अना वोका अरथ मोरो लक सांगेत पर वय वोना गोस्टि को अरथ नहि समजा सकिन। 16 पर मी ना तोरो बारे मा आयकी सेऊ का दानिय्येल राज ला खोल सकासेत। अना मोरी संका ला दूहुर कर सकासेत। एकोलाय अबा अदि तु वोन लेख ला वाच सकेत, अना वोको अरथ मोला समजाय सकेत, ता तोला लाल भटाई रंग को कपरा, अना गरो मा सोन्नो का हार घालयो जाहेत अना राज्‍य मा तीसरो सासक बनके तूच सासन करजोस। 17 दानिय्येल ना राजा लक कह्यो आपरो दान आपरो जवर ठेव अना जोन ईनाम तू देवनो चाव्हसेत, वो दुसरो ला देय, वा लिख्यो हुयो गोस्टि मी राजा ला वाच के आयकवाहु अना वोको अरथ ला भी तोला समजाहूँ। 18 ओ राजा, सब लक वरता को परधान परमेस्वर ना तोरो बाप नबूकदनेस्सर ला राज बडाई, मान अना परताप दियो होतो। 19 अना वोकी परसंसा को कारन लक जोन वोला दियो गयो होतो। व देस-देस अना राज-राज को लोग, अना बेगरो-बेगरो बोली बोलन वाला वोको मोहोरा थरथर कपत होतिन। जेला वोना चाह्यो वोला मार डाकत होतो, अना जोनला चाह्यो वोला जित्तो राखत होतो, अना जेला चाह्यो वोला मोठो पद ला देय देत होतो, अना जोनला चाव्हे वोला पाड़ देत होतो। 20 पर जबा वोको हिरदय फूल गयो होतो अना वोकी आत्मा कठोर होय गयी, यो तकन का घंमड करन लगयो तबा वोय आपरो राज्‍य सिघासन लक उतर गयो अना वोको मान उतर गयो। 21 ऊ मानूस को बीच मा लक हेड़यो गयो अना वोको हिरदय जनावर ढोर जसो, अना वोको रव्हन को जघा जंगल का गधा गिनको बीच मा होय गयो। ऊ बइल जसो गवथ ला चरन लगयो होतो अखिन वोको तन बादल कि ओस लक ओदो होत होतो। जबा तकन का वोना नहि जान लेयिस का सब लक वरता परधान परमेस्वर मानूस को राज्‍य मा सासन कर से। जेला चाव्हसे वोको वरता अधिकारी ठहरावसे। 22 ता भी, ओ बेलसस्सर, तू जोन वोको टूरा अना यो गोस्टी तू जानत होतो। ता भी तोरो हिरदय नरम नहि हुयो। 23 बल्‍कि तूना सरग को पिरभू को बिरोध करके वोको मन्‍दिर को भान्डो बुला के आपरो समोर राख लियो। अखीन आपरो परधान आपरो अधिकारी अखीन रानीगीन, रखेल को संग तूना ओको मा दारू पियो सेस। अखीन खूरो-सोन्नो, पितर, लोहा लकड़ी अखीन गोटा को देव, जोन ना ता, चोवासे, ना काही आयकत, ना काही जानासे, उनको तूना स्‍तुति करयोस, पर परमेस्वर जेको हात मा तोरो पिरान से अखीन जेको बस मा सब तोरो हिन्डनो फिरनो से वोको तूना मान नही करयो सेत।✝

24 तबच "यो हात को एक हिस्सा ओको कन परगट भयो, अना यो लिखयो गयो सेत। 25 अखीन जोन सबद लिखयो गयो वा यो से।" मने, मने, तकेल, ऊपर्सीन*। 26 यो लाईन को अरथ यो से, "मने" मजे परमेस्वर ना तोरो राज को दिवस गीनको आखीर कर दियो। 27 तकेल, तू मानो तराजू मा तवलो गयो अखीन लगत हलको हिटयो। 28 "परेस" अता "तोरो राज्‍य ला बेगरो करके मादी अना फारसी ला देय दियो जाहे।"

29 तबा बेलसस्सर ना हुकुम दियो अना दानिय्येल ला बैंजनी रंग को कपरा अना वोको गरो मा सोन्नो को माला घालीन✝। अना ढिंढोरा करके चिल्लावन लगीन का राज्‍य को तीसरो नम्बर को सासक दानिएल से।

30 वोना रात बेबीलोन कसदी को राजा बेलसस्सर मार डाक्यो गयो। 31 अना वोको जघा मा अखीन दारा मादी जोन 62 साल को होतो गद्दी मा बस्य गयो।