1 पौलुस को कन लक जोन ला

परमेस्वर को बेचयो गयो दास लोकहुन ला उनको बिस्वास मा सहायता देवन लाई अना आमरी नेकी को काम अना खराई को पुरो गियान सिकावन साठी धाड़यो गयो से। 2 अमर जीवन की ओना आसा मा जेकी परन परमेस्वर ना जोन झुठो नाहती जुनो जमाना लक करीसेस, 3 अबा सही बेरा मा, वोना आपरो मतलब की गोस्टी वोना सन्देसा लक साप कर दियो। जोन को परचार आमरो बचावन वालो परमेस्वर को हुकूम अना भरोसा लक मोला सोपो गयो सेत।

4 तीतुस को नाव जोन भरोसा को भागी होवन लक मोरो खरो टूरा से। परमेस्वर बाबूजी अना आमरो बचावन वालो मसीह यीसु को कन लक तुमला दया अना सान्ती मिलत रव्हे।

5 मि यो साठी तोला क्रेत मा छोड़ आयो होतो की तु बचयो गोस्टीहुन ला सुधारजोस, अना मोरो हुकूम को कन लक नगर-नगर मुखिया गीन लक ला ठहराजोस। 6 जोन निरदोस अना एकच बायको को नौरा होय, जिनको लेकरा बिस्वास करनवालो होहेत। अना उनमा लुच्चापन अना बे लगाम नोको होय। 7 काहेका मुखिया ला परमेस्वर को खजांची होवन को कारन कलिसीया को मुखिया ला निरदोस होवनो चाव्हसे। न ता जिद्दी, न ता गुस्सा करनवालो, न ता पियक्कड़, न मारपीट करन वालो, न ता नीच कमाई को लोभी होय, 8 पर मिजवानी करन मा मान महत्तम करन वालो होय, भलाई चाव्हन वालो होय, धीरज राखन वालो, न्याय करनवालो, पवीतर अना आपरो मन ला कब्जा मा करनवालो होय। 9 अना उ बिस्वास लायक बचन मा जोन धरम को सिक्सा को लक सेत, ओमा, अडिग रव्हके खरी सिक्सा लक बढ़ावा देय सके, अना बिरोध करनवारा को टोंड बंद कर सकेत।

10 काहेका लगत सा लोकगीन बेलगाम, बकवादी अना धोखा देवनवारा सेती; खास करके खतना वारा मा लक सेत। 11 इनको टोंड बंद करनो चाव्हसे। यो लोकगीन नीच कमाई को साठी बेकार गोस्टी सिखायके घर को घर बिगाड़ासेति। 12 उनमा लक एक मानूस ना जो उनको च भविस्यवक्ता से कहिसेस, "क्रेती टापु को लोक सदा झुठो, दुस्ट जनावर अना अलाल अघोरी होवासेत।" 13 या गवाही खरो से, एकोसाठी उनला कड़ाई लक चेताव का वय भरोसा मा पक्को होय जाहेत। 14 अना यहुदिगिन को कथा बारता मा अना उन मानूस की हुकूम गीन पर मन न लगाहेत, जोन खराई लक भटक जासेत। 15 सुध्द लोकगीन को लाई सबच चीजगीन सुध्द से, पर असुध्द अना अबिस्वासी गीन साठी काही भी सुध्द नाहती लेकिन उनकी मन अना डिमाक दुही असुध्द सेत। 16 वय परमेस्वर ला जानन को दावा करासेत पर उनको काम असो चोवसे जसो ओला नही जानासेत। वय घिरना को काम करनवालो, अना हुकूम नही मानन वालो सेत। अना कोनी भी नेक काम करन को काबिल नही सेत।