1 Dešutrito đes ando dešudujto čhon Adar, kana trubuja te izvršil pe e caroši zapovest, isto godova đes kana e Židovenđe dušmaja nadisajle kaj dobina vlast pe lende, ali sas averčhande: E Židovurja dobisardine vlast pe okola save len mrzanas.

2 E Židovurja ćidine pe ande pire gava ande svako carošći Kserksošći pokrajina, te napadnin okolen save len kamenas te uništin. Thaj khonik našti ačhelas lenđe po drom, kaj e dar lendar astarda sa e themen. 3 Sa e poglavarja ande pokrajine, e upraviteljurja, namesnikurja thaj e carošće službenikurja pomožinas e Židovenđe zato kaj astarda len e dar katar o Mordehaj. 4 A sar e Mordehaje sas baro uticaj pe carsko dvoro, o glaso pala leste buljilo pe svako pokrajina thaj vo sas sa majmoćno.

5 Gajda e Židovurja e mačesa dine dab pe sa pire dušmaja, mudarenas thaj uništinas len, ćerenas so sas lenđe drago okolenca save mrzanas len. 6 E Židovurja samo ando gav Suza mudardine thaj uništisardine pandž šela muškarconen. 7 Mudardine vi e Paršandates, e Dalfones, e Aspates, 8 e Porates, e Adalijes, e Aridates, 9 e Parmaštes, e Arisajes, e Aridajes thaj e Vajzates, 10 deše čhaven katar o Haman, e Hamedatinesko čhavo, dušmano e Židovengo. Ali katar lengo barvalipe či line khanči.

11 E carošće isto godova đes javisardine o brojo e mudarde dženengo ando gav Suza, 12 a vo phendas e caricaće e Jestiraće: "E Židovurja ando gav Suza mudardine thaj uništisardine pandž šela manušen thaj deš Hamanošće čhaven. So tek askal ćerdine ande aver carošće pokrajine? Dakle, savi si ćiri želja? Avela tuće uslišime. Thaj savi si ćiri molba? Avela tuće ispunime."

13 E Jestira phendas e carošće: "Ako si e carošće pe volja, neka mućel još thejara e Židovenđe, save si ando gav Suza, te ćeren prema ađesći zapovest, thaj te pe vešala unglaven e deše Hamanošće čhavenđe telurja."

14 Askal o caro zapovedisarda te baš gajda ćerel pe. Dine zapovest ande Suza thaj ungladine e deš Hamanošće čhavenđe telurja. 15 E Židovurja andar o gav Suza ćidine pe zajedno thaj dešuštarto đes ando čhon Adar mudardine trin šela muškarconen. Ali katar lengo barvalipe či line khanči.

16 Thaj vi aver Židovurja andar aver carošće pokrajine, ćidine pe te katar e dušmaja branin pire trajurja thaj piro miro. Mudardine eftavardeš thaj pandž milje dušmajen, ali katar lengo barvalipe či line khanči. 17 Sas godova dešutrito đes ando čhon Adar. Dešuštarto đes odmorinas pe thaj godova đes proglasisardine o đes pale gozba thaj o veselje. 18 Ali e Židovurja andar o gav Suza ćidine po dešutrito thaj dešuštarto đes, a dešupandžto đes odmorinas pe thaj godova đes proglasisardine đes pale gozba thaj veselje. 19 Zbog godova e Židovske seljakurja, save trajinas ande gava, slavin dešuštarto đes ando čhon Adar sago đes te gostin pe, veselin pe, thaj jek avrešće den darurja o hamasko.

20 O Mordehaj ramosardas sa akava so dogodisajlo, thaj bičhaldas lila sa e Židovenđe save sas paše ili dur ande svako pokrajine e carošći Kserksošći. Poručisardas lenđe 21 te svako brš slavin dešuštarto thaj dešupandžto đes ando čhon Adar 22 sago đes kana e Židovurja odmorisajle katar pire dušmaja, thaj sago čhon kana lenđi tuga boldili ande radost, a e žalost ando bahtalipe. Ramosardas te godola đesa slavin sago đesa te gostin pe thaj veselin pe, te den darurja o hamasko jek avrešće thaj vi e čore manušenđe. 23 E Židovurja prihvatisardine te nastavin gajda te slavin svako brš, gajda sago kaj ramosardas lenđe o Mordehaj.

24 Kaj o Agagovco o Haman e Hamedatinesko čhavo, o dušmano sa e Židovengo, ćerda zavera te mudarel e Židoven, čhuda kocka te odredil o đes pala lenđi propast thaj lengo uništenje. 25 Ali e Jestira inkljisti anglo caro thaj o caro po nagovor e caricako, bolda e Hamanosko bilačho plano savo kamlas te ćerel e Židovenđe pe lesko šoro, pa ungladine les thaj lešće čhaven pe vešala. 26 Zato godola đesa si akharde Purim, po alav "pur".

Zbog sa so ramolas ande Mordehajesko lil thaj sa so dikhline thaj so dogodisajlo lenđe, 27 e Židovurja odlučisardine te na prekinin akava običaj, gajda te von thaj lenđe čhavra thaj sa save si pridružime lenđe, svako brš slavin akala duj đesa ando čhon Adar gajda sar sas odredime. 28 Godola đes ando čhon Adar, ande svako pokrajina, ande svako gav, svako familija thaj ando svako naraštaj, trubul te del pe gođi thaj te slavil len. E Židovurja či troman te ačhen te slavin o Purim, niti te bistren pe godola đesa maškar lenđe potomkurja.

29 E carica Jestira e čhori katar o Avihajil thaj o Mordehaj o Židovo ramosardine te potvrdin okova prvo lil pale zapovest Purim. 30 O Mordehaj bičhaldas lil sa e Židovenđe ande šel thaj biš thaj efta pokrajine e carošće Kserksošće, e porukasa palo miro thaj pale sigurnost, 31 e poruka te proglasil pe o prazniko Purim thaj te slavil pe po način sar odredisardas o Židovo o Mordehaj thaj e Jestira. Jednako gajda e Židovurja pale peste thaj pale lenđe potomkurja odredisardine đesa palo posto thaj pale tuga. 32 E Jestiraći zapovest potvrdisarda o propis palo Purim thaj ramome si ande knjiga.