एज्रा 1

कुस्रू यहूदियन कै लौटन की आग्या दई

1 फारस देस के राजा कुस्रू के पहले साल मैं प्रभु फारस के राजा कुस्रू को मन उभारी कि प्रभु को जो बचन यिर्मयाह के मोहों से निकरो रहै, बौ पूरो हुई जाबै, जौ बजह से बौ अपने सब राज्यन मैं जौ प्रचार करबाई और लिखबाए भी दई:

2 फारस को राजा कुस्रू जौ कहथै स्वर्ग को परमेस्वर प्रभु परमेस्वर पृथ्वी भर को राज्य मोकै दई है, और बौ मोकै आग्या दई कि यहूदा के यरूसलेम मैं मेरो एक भवन बनवा। 3 बाके सब लोगन मैं से तुमरे बीच जो कोई होबै, बाको परमेस्वर बाके संग रहबै, बौ यहूदा के यरूसलेम कै जाएकै इस्राएल के परमेस्वर प्रभु परमेस्वर को भवन बनाबै - जो यरूसलेम मैं है बहे परमेस्वर है; 4 और कोई भी बौ जो भी जघा मैं रह गौ होबै, जहाँ बौ रहत होबै बौ जघा के लोग चाँदी, सोना, धन और जानवर दैकै बाकी मदत करैं और जासे जाधे यरूसलेम रहन बारे परमेस्वर के भवन के ताहीं अपनी इच्छा से भी भेंट चढ़ाबै।

5 तौ यहूदा और बिन्यामीन के जितने पितरन के घरानन के खास लोग और पुजारिन और लेवियन को मन परमेस्वर उभारी रहै कि जाएकै यरूसलेम मैं प्रभु परमेस्वर के भवन कै बनामैं, बे सब उठ खड़े भै; 6 और बाके आसपास के सब रहनबारे चाँदी के बर्तन, सोना, धन, जानवर और अनमोल चीजन कै दैकै, उनकी मदत करीं; जौ बे सबन से जाधे रहै जो लोग अपनी-अपनी इच्छा से दईं।

7 फिर राजा कुस्रू प्रभु परमेस्वर के भवन के जो बर्तन नबूकदनेस्सर यरूसलेम से निकारकै अपने देवता के भवन मैं रखी रहै।*1:7 2 राजा 25:8-17 8 उनकै फारस को कुस्रू राजा, मिथ्रदाथ खजांची से निकरबाएकै, यहूदिन के सेसबस्सर नाओं के सासक कै गिनकै सौंप दई। 9 उनकी गिनती जौ रहै, मतलब सोने के तीस और चाँदी के एक हजार बर्तन और उनतीस छुरिया, 10 सोने के तीस और बीच हानी की चाँदी के चार सौ दस कटोरा और दुसरे तराहनी के बर्तन एक हजार। 11 सोने चाँदी के बर्तन सब मिलाएकै पाँच हजार चार सौ रहैं। जे सबन कै सेसबस्सर बौ समय लै आई, जब बन्धुए बेबीलोन से यरूसलेम कै आए।