1 उनके पूर्वजन के घराने के मुख्य लोग जे हैं, और जो लोग राजा अर्तछत्र के राज्य मैं बेबीलोन से मेरे संग यरूसलेम कै गै उनकी वंसावली जौ है:

2 मतलब पीनहास के वंस मैं से गेर्सोम, ईतामार के वंस मैं से दानिय्येल, दाऊद के वंस मैं से हत्तूस,

3 सकन्याह के वंस के परोस के गोत्र मैं से जकर्याह, जोके संग डेढ़ सौ लोगन की वंसावली भई।

4 पहत्मोआब के वंस मैं से जरह्याह को लौड़ा एल्यहोएनै, जोके संग दुई सौ लोग रहैं।

5 सकन्याह के वंस मैं से यहजीएल को लौड़ा, जोके संग तीन सौ लोग रहैं।

6 आदीन के वंस मैं से योनातान को लौड़ा एबेद, जोके संग पचास लोग रहैं।

7 एलाम के वंस मैं से अतल्याह को लौड़ा यसायाह, जोके संग सत्तर लोग रहैं।

8 सपत्याह के वंस मैं से मीकाएल को लौड़ा जबद्याह, जोके संग अस्सी लोग रहैं।

9 योआब वंस से यहीएल को लौड़ा ओबघाह, जो के संग दुई सौ अठ्ठारह लोग रहै।

10 सलोमीत के वंस मैं से योसिव्याह को लौड़ा, जोके संग एक सौ साठ लोग रहैं।

11 बेबै के वंस मैं से बेबै को लौड़ा जकर्याह, जोके संग अट्ठाईस लोग रहैं।

12 अजगाद के वंस मैं से हक्कातान को लौड़ा योहानान, जोके संग एक सौ दस लोग रहैं।

13 अदोनीकाम के वंस मैं से जो पच्छू गै उनके जे नाओं हैं: मतलब एलीपेलेत, यीएल, और समायाह, और उनके संग साठ लोग रहैं।

14 और बिगवै के वंस मैं से उतै और जब्बूद रहैं, और उनके संग सत्तर लोग रहैं।

15 मैं सेवाकार्य के ताहीं लेवी इनकै मैं बौ नदिया के झोने जो अहवा के घाँईं बहथै, इकट्टो कर लौ, और हुँआँ हम लोग बौ जघा मैं तीन दिन डेरा डारे रखाए, और मैं हुँआँ लोगन और पुजारिन कै देख लौ, पर कोई लेवी कै ना पाओ। 16 मैं एलीआजर, अरीएल, समायाह, एलनातान, यारीब, एलनातान, नातान, जकर्याह और मसुल्लाम नाओं के जो मुख्य लोग रहैं, और योयारीब और एलनातान कै जो दुई सिक्छक जो समझदार रहैं, उनकै बुलाओ। 17 इद्दो के झोने जो कासिप्या नाओं की जघा को प्रधान रहै, भेज दौ; और उनकै समझाए दौ कि कासिप्या जघा मैं इद्दो और बाके भईय्या नतीन लोगन से का का कहने है ताकि बे हमरे झोने परमेस्वर के भवन के ताहीं सेवा टहल करन बारेन कै लै आमैं। 18 हमारे परमेस्वर की कृपादृस्टि जो हमरे ऊपर भई बाके हिसाब से बे हमरे झोने ईस्सेकेल कै जो इस्राएल के धुईते और लेवी के धुईते महली के वंस मैं से रहै, और सेरेब्याह कै और बाके लौड़न और भईय्यन कै, मतलब अठ्ठारह जनिन कै; 19 और हसब्याह कै, और बाके संग मरारी के वंस मैं से यसायाह कै, और बाके लौड़न और भईय्यन कै, मतलब बीस जनिन कै; 20 और नतीन लोगन मैं से जिनकै दाऊद और बैध पुजारियन की सेवा करन ताहीं ठहराई रहै, दुई सौ बीस नतीन लोगन कै लै आए। जे सबन के नाओं लिखे पड़े रहैं।

21 तौ मैं हुँआँ मतलब अहवा नदिया के किनारे बर्त को प्रचार जौ उम्मीद से करो कि हम परमेस्वर के अग्गु दीन होमैं; और बासे अपने और अपने बाल-बच्चन और अपनी पूरी संपत्ति के ताहीं सफल यात्रा माँगैं। 22 काहैकि मैं रास्ता के दुस्मनन से बचन के ताहीं सिपईय्यन को दल और सवार, राजा से माँगन मैं सर्मात रहौं, काहैकि हम राजा से जौ कह चुके रहैं, हमरो परमेस्वर अपने सब खोजिन पर, भलाई के ताहीं कृपादृस्टि रखथै और जो बाकै छोड़ देथैं, बाको बल और कोप उनके खिलाप है। 23 जहे बारे मैं हम बर्त रखकै अपने परमेस्वर से प्रार्थना करे, और बौ हमरी सुनी।

24 तौ मैं मुख्य पुजारिन मैं से बाहरै लोगन कै, मतलब सेरेब्याह, हसब्याह और जाके दस भईय्यन कै अलग करकै, जो चाँदी सोनो और बर्तन, 25 राजा और बाके मंत्रिन और बाके वैधन और जितने इस्राएली मौजूद रहैं बे हमरे परमेस्वर के भवन के ताहीं चाँदी, सोना और बर्तन, भेंट के रूप मैं तौलकै उनकै दईं। 26 मैं उनके हात मैं

साढ़े छै सौ किक्कार चाँदी, सौ किक्कार चाँदी के बर्तन, सौ किक्कार सोना,

27 हजार दर्कमोन सोनो के बीस कटोरा, और सोनो सरीखा अनमोल चमकन बारे पीतल दुई बर्तन तौलकै दै दौ।

28 मैं उनसे कहो, तुम तौ प्रभु परमेस्वर के ताहीं पवित्र हौ, और जे बर्तन भी पवित्र हैं; और जौ चाँदी और सोना भेंट को है, जो तुमरे पितरन के परमेस्वर प्रभु परमेस्वर के ताहीं खुसी से दई गई। 29 जौ बजह से जगत रहबौ, और जबले तुम इन्हैं यरूसलेम मैं प्रधान पुजारिन और लेवियन और इस्राएल के पितरन के घराने के प्रधानन के अग्गु प्रभु परमेस्वर के भवन की कुठरियन मैं तौलकै ना दियौ, तौ ले इनकी रक्छा करत रहबौ। 30 तौ पुजारी और लेवी चाँदी, सोना, और बर्तनन कै तौलकै लै लई कि उनकै यरूसलेम कै हमारे परमेस्वर के भवन मैं पहोंचाबै।

31 पहले महेना के बाहरमें दिन हम अहवा नदिया से कूच करकै यरूसलेम को रास्ता लै, और हमारे परमेस्वर की कृपादृस्टि हमरे ऊपर रही; और बौ हमकै दुस्मन और रास्ता मैं घात लगान बारेन के हात से बचाई। 32 आखरी मैं हम यरूसलेम पौहोंचे और हुँआँ तीन दिन रहे। 33 फिर चौथे दिन बौ चाँदी - सोना और बर्तन हमरे परमेस्वर के भवन मैं ऊरिय्याह के लौड़ा मरेमोत पुजारी के हात मैं तौलकै दै गै। बाके संग पीनहास को लौड़ा एलीआजर रहै, और उनके संग ईसु को लौड़ा योजाबाद लेवी और बिन्नूई को लौड़ा नोअद्याह लेवी रहै। 34 बे सब चीज गिनी और तौली गईं, और उनको तौल बहे समय लिखो गौ।

35 जो बँधुआई से आए रहैं, बे इस्राएल के परमेस्वर के ताहीं होमबलि चढ़ाई; मतलब सब इस्राएल के निमित्त बाहरै बरधा, छियानबे भेंड़ और सत्तर मेम्ना, और पापबलि के ताहीं बाहरै बकरा; जौ सब प्रभु परमेस्वर के ताहीं होमबलि रहै। 36 तौ बे राजा कि आग्यन कै महानद के जौ पार अधिकारियन और सासकन कै दईं; और बे इस्राएली लोगन और परमेस्वर के भवन के काम मैं मदत करीं।