ମିଆଁଦ୍ କାଟା କୁଚୁଙ୍ଗ୍କାନ୍ କଏଁନିଃ ବୁଗିୟାନାଏ
1 ମୁସିଙ୍ଗ୍ ପାତ୍ରାସ୍ ଆଡଃ ଯୋହାନ୍ ବିନ୍ତି ଦିପିଲିରେ ତାର୍ସିଙ୍ଗ୍ ଆପିଘାଡ଼ି ଇମ୍ତାକ ମାନ୍ଦିର୍ତେକିନ୍ ସେନଃ ତାଇକେନା । 2 ଏନ୍ତାଃରେ ଜାନାମ୍ଏତେ କାଟା କୁଚୁଙ୍ଗ୍କାନ୍ ମିଆଁଦ୍ ହଡ଼, ମାନ୍ଦିର୍ ଅଡ଼ାଃତେ ବଲତାନ୍ ପୁରାଃ ହଡ଼କତାଃଏତେ କଏଁନାମେ ନାଗେନ୍ତେ ସବେନ୍ ହୁଲାଙ୍ଗ୍ ମାନ୍ଦିର୍ ଅଡ଼ାଃରାଃ ସୁଗାଡ଼ାନ୍ ନୁତୁମାକାନ୍ ଦୁଆର୍ତାଃତେ ଗଅଃ ଇଦିୟଃତାନ୍ ତାଇକେନାଏ । 3 ଇନିଃ ପାତ୍ରାସ୍ ଆଡଃ ଯୋହାନ୍କେ ମାନ୍ଦିର୍ତେ ବଲତାନ୍ ନେଲ୍କେଦ୍ତେ ଇନ୍କିନ୍କେ କଏଁ ଆସିକେଦ୍କିନାଏ । 4 ପାତ୍ରାସ୍ ଆଡଃ ଯୋହାନ୍ ଇନିଃକେ ମିଦ୍ନାଜେର୍ରେ ନେଲ୍କିଃତେ, ପାତ୍ରାସ୍ କାଜିକିୟାଏ, "ଆଲିଙ୍ଗ୍ସାଃତେ ନେଲେମେ ।" 5 ଇନିଃ ଇନ୍କିନ୍ତାଃଏତେ ଜେତ୍ନାଃ ନାମେ ନାଗେନ୍ତେ ଆସ୍ରାଏତାନ୍ଲଃ ଇନ୍କିନ୍ସାଃତେ ନେଲ୍କେଦା ।
6 ମେନ୍ଦ ପାତ୍ରାସ୍ କାଜିକିୟାଏ, "ରୁପା ଚାଏ ସୋନା ଆଇଙ୍ଗ୍ତାଃରେ ବାନଆଃ, ମେନ୍ଦ ଆଇଙ୍ଗ୍ତାଃରେ ମେନାଃତେୟାଃଇଙ୍ଗ୍ ଏମାମେତାନା, ନାଜ୍ରେତ୍ରେନ୍ ୟୀଶୁ ଖ୍ରୀଷ୍ଟ୍ଆଃ ନୁତୁମ୍ତେ ଆଚୁମେତାନାଇଙ୍ଗ୍ ବିରିଦ୍ମେ ଆଡଃ ସେନେମେ ।" 7 ଏନ୍ତେ ଇନିଃ ଇନିୟାଃ ଜମ୍ ତିଃଇ ସାବ୍କେଦ୍ତେ ବିରିଦ୍କିୟା ଆଡଃ ଇମ୍ତାଗି ଇନିୟାଃ କାଟା ଆଡଃ କାଟାମୁକ୍ଣୀକରେ ପେଡ଼େଃ ନାମ୍କେଦାଏ । 8 ଆଡଃ ଇନିଃ ନିର୍ବିରିଦ୍ୟାନାଏ ଆଡଃ ସେନ୍ ଏଟେଦ୍କେଦାଏ । ଏନ୍ତେ ଇନିଃ ସେସେନ୍ତାନ୍ଲଃ, ଡେଗାଅତାନ୍ଲଃ ଆଡଃ ପାର୍ମେଶ୍ୱାର୍ଆଃ ମାନାରାଙ୍ଗ୍ତାନ୍ଲଃ ଇନ୍କିନ୍ଲଃ ମାନ୍ଦିର୍ତେ ବଲୟାନାଏ । 9 ଏନ୍ତାଃରେନ୍ ସବେନ୍ ହଡ଼କ ଇନିଃକେ ସେନ୍ବାଡ଼ାତାନ୍ ଆଡଃ ପାର୍ମେଶ୍ୱାର୍ଆଃ ମାନାରାଙ୍ଗ୍ତାନ୍କ ନେଲ୍କିୟା, 10 ଆଡଃ ମାନ୍ଦିର୍ ଅଡ଼ାଃରାଃ ସୁଗାଡ଼ାନ୍ ଦୁଆର୍ତାଃରେ ଦୁବ୍କେଦ୍ତେ କଏଁ ଆସିତାଇକେନାଏ, ଇନିଃ ନିଃଗି ତାନିଃ ମେନ୍ତେ ନେଲ୍ଉରୁମ୍କିୟାକ ଆଡଃ ଇନିଃରେ ହବାକାନ୍ତେୟାଃ ସବେନ୍ ସାରିକେଦ୍ତେ ଇନ୍କୁ ପୁରାଃ ହାଏକାଟ୍ ଆଡଃ ଆକ୍ଦାନ୍ଦାଅୟାନାକ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)