1 ଗଜାକାନ୍ ରକ ହରାତେ ବୁଗିନ୍ ସହାନ୍ ସୁନୁମ୍ ସିତ୍ରୁ ସହାନାଃ, ଏନ୍ଲେକାଗି କାଟିଃ ଡଣ୍ଡ, ସେଣାଁ ଓଡ଼ୋଃ ମାଇନ୍ ନାମଃତେୟାଃକେ ହୁଣ୍ଡିଙ୍ଗ୍ତାଃ ।
2 ସେଣାଁନ୍ ହଡ଼ରାଃ ଜୀଉ ଆୟାଃ ବୁଗିନ୍ ହରାରେ, ମେନ୍ଦ ଡଣ୍ଡ ହଡ଼ରାଃ ଜୀଉ ଆୟାଃ ଏତ୍କାନ୍ ସାଃରେ ତାଇନାଃ । 3 ଆଡଃଗି, ଡଣ୍ଡ ରାଃ ହରାରେ ସେନଃ ଇମ୍ତା ଇନିୟାଃ ବୁଦ୍ଧି ରେୟାଃ ଘାଟି ନେଲଃଆ । ଓଡ଼ୋଃ ଇନିଃ ସବେନ୍କକେ କାଜିକତାନାଏ, ଇନିଃଦ ଡଣ୍ଡ ତାନିଃ ।
4 ଗମ୍କେ ଆମାଃ ବିରୁଧ୍ରେ ଖିସ୍ ରେଦ ଆମାଃ ଠାୟାଦ୍କେ ଆଲମ୍ ବାଗି । ଚିୟାଃଚି ସାଲ୍ସାନ୍ତ୍ କେଦ୍ତେ ତାଇନ୍ ରେଦ ମାପ୍ରାଙ୍ଗ୍ ପାପ୍ କାଜିକ ଛାମାକଆ ।
5 ସିଙ୍ଗି ଲାତାର୍ରେ ଆଇଙ୍ଗ୍ ମିଆଦ୍ ଏତ୍କାନ୍ ବିଷାଏ ନେଲାକାଦା । ଏନା ରାଇଜ୍ ଚାଲାଅତାନ୍ନିୟାଃ ଭୁଲ୍ କାମି ହରାତେ ନେଲଆଃ । 6 ଡଣ୍ଡ ହଡ଼କ ରାଜ୍ଗାଦିରେ ଦୁବାଃ । ଓଡ଼ୋଃ କିସାଁଣ୍ ହଡ଼କ ଲାତାର୍ ରେୟାଃ ଠାୟାଦ୍ରେ ଦୁବାଃ । 7 ଆଇଙ୍ଗ୍ ଦାସିକକେ ସାଦମ୍ରେ ଦୁବାକାନ୍ ତେୟାଃ ଓଡ଼ୋଃ ହାକିମ୍କକେ ଦାସିଲେକା ଅତେରେ ସେସେନ୍ ତେୟାଃ ନେଲାକାଦ୍କଆ ।
8 ଅକଏ ଗାଢ଼ା ଉରାଃଏ ଇନିଃ ଏନାରେଗି ଉୟୁଗଃଆ । ଅକଏ ଭିତ୍ ଧାସୁଡ଼େଆଏ ଇନିଃକେ ବିଙ୍ଗ୍ ହାବିୟା । 9 ଜେତାଏ ଦିରି ରାପୁଦେଆଏ, ଇନିଃ ଏନାଲଃ ଘାଅ ନାମେୟାଏ । ଓଡ଼ୋଃ ଅକଏ ସାହାନ୍ ଫାଡ଼ାଗେୟାଏ, ଇନିଃ ଏନାଲଃ ଘାଅ ନାମେୟାଏ । 10 ଦାତ୍ରମ୍ ଦଥାୟାନ୍ରେ, ଅକନ୍ ହଡ଼ ଏନାକେ ବେଗାର୍ ଲେସେର୍କେଦ୍ତେ କାମିରେ, ଇନିଃକେ ପୁରାଃ ପେଡ଼େଃ ଲାଗାତିୟାଁ । ମେନ୍ଦ କାମିକେ ଆୟାର୍ରେ ଉଦୁବେ ନାଗେନ୍ତେ ସେଣାଁ ନାଲା ଲେକ୍ନାଃ ତାନାଃ । 11 ବିଙ୍ଗ୍ ମାନ୍ତାର୍ ରେୟାଃ ଆକ୍ତେୟାର୍ରେ ହିଜୁଃ ସିଦାରେ ସଦାଲେରେ ଦେଅଁଣାରାଃ ମାନ୍ତାର୍ରେ ଚିକାନ୍ ଲାଭ୍ ହୁଇନାଃ । 12 ସେଣାଁନ୍ ହଡ଼ରାଃ କାଜିରେ ପୁରାଃ ସାୟାଦ୍ ମେନାଃ । ମେନ୍ଦ ଡଣ୍ଡ ହଡ଼ରାଃ ଆପାନ୍ କାଜିଗି ଇନିଃକେ ଜିୟନ୍ ରିକାଇୟାଃ । 13 ଇନିୟାଃ ମଚାରେୟାଃ ଏନେଟେଦ୍ କାଜିକ କା ସେଣାଁନ୍ ଜାଗାର୍କ ତାନାଃ । ଓଡ଼ୋଃ ଇନିୟାଃ ଜାଗାର୍ରେୟାଃ ଟୁଣ୍ଡୁ ତେୟାଃ ପୁରାଃଗି ଦୁକୁ ଓଡ଼ୋଃ ବାଏହା ଲେକାନ୍ କାଜି ତାନାଃ । 14 ଡଣ୍ଡ ପୁରାଃ କାଜିକ ଜାଗାର୍ ରିକାଃ, ଏନ୍ରେହ ଚିନାଃ ହୁଇନାଃ, ହଡ଼ ଜେତ୍ନାଃ କା ସାରିୟାଃ ଓଡ଼ୋଃ ଏନ୍ ତାୟମ୍ତେ ଅକଆଃ ସବେନାଃ ହୁଇନାଃ, ଅକଏ ଇନିଃକେ ଉଦୁବ୍ ଦାଡ଼ିୟାଃ ?
15 ଡଣ୍ଡ ହଡ଼ରାଃ କାମି ଇନିଃକେ ଲାଗା ଆଟ୍କାରିୟା । ଚିୟାଃଚି ଚିଲ୍କା କେଦ୍ତେ ନାଗାର୍ତେ ବଲ ଲାଗାତିୟାଁ, ଇନିଃ ଏନା କା ସାରିୟାଃ ।
16 ହେ ଦିଶୁମ୍, ଚିମ୍ତା ରାଜା ତାମାଃ ଦାସି ଲେକା ହବାଅଃ ରେଦ ଓଡ଼ୋଃ ହାକିମ୍କ ସେତାଃ ଇଦାନ୍ରେ ଜଜମାଃକ ଜମେ ରେଦ, ଆପେୟାଃ ଜୀୱାନ୍ ଧିକ୍ ହବାଅଃକା । 17 ହେ ଦିଶୁମ୍, ଚିମ୍ତା ମାଇନ୍ ନାମେତାନ୍ ନିୟାଃ ରେନ୍ ହନ୍ ରାଜା ହବାଅଃଆ ଓଡ଼ୋଃ ଇନିୟାଃ ହାକିମ୍କ ଜମ୍ ନୁଁ କାକ ରିକା ଓଡ଼ୋଃ କାକ ବୁଲଃଆଃ । ମେନ୍ଦ ପେଡ଼େଃ ନାମ୍ ନାଗେନ୍ତେ ବୁଗିନ୍ ଦିପିଲି ଇମ୍ତା ଜଜମ୍ ରିକାକ, ତାବ୍ଦ ଆପେ ଧାଇନ୍ ତାନ୍ପେ ।
18 ଆଲ୍ସି ଲେକା ତାଇନ୍ ରେଦ ଛାତ୍ ହାଦୁଡ଼୍ କଆଃ । ଓଡ଼ୋଃ ତିଃଇକେ କାମିରେ କା ବେଭାର୍ ରିକା ହରାତେ ଅଡ଼ାଃରେ ଦାଆଃ ଜରଃଆ ।
19 ରାସ୍କା ନାଗେନ୍ତେ ମାରାଙ୍ଗ୍ ଜଜମାଃ ହୁଇନାଃ । ଓଡ଼ୋଃ ଦାଖ୍ରାସି ଜୀଦାନ୍କେ ରାସ୍କା ଏମାଏଃ ଓଡ଼ୋଃ ଖୁର୍ଜି ସବେନ୍ କାମିରେ ହିଜୁଃଆ ।
20 ରାଜାକେ ଆଲମ୍ ସାର୍ପାଅଇୟା ଚାଏ ମନ୍ରେ ହଁ ଜେତ୍ନାଃ ଆଲମ୍ କାଜି । କିସାଁଣ୍ ହଡ଼କେ ଆୟାଃ ଗିତିଃକ୍ ଅଡ଼ାଃରେ ଆଲମ୍ ସାର୍ପାଅଇୟା । ଚିୟାଃଚି ଆଫିର୍ତାନ୍ ଅଡ଼େ ଏନ୍ କାଜିକେ ଇଦି ସେଟେର୍ରେୟା ଓଡ଼ୋଃ ଆୟାଃ ଆପ୍ରବ୍ ଏନ୍ କାଜିକେ ଆକ୍ତେୟାର୍ ନାମାକାଦ୍କତାଃରେ ଉଦୁବେୟା ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)