1 ଆଇଙ୍ଗ୍‌ ଆଇଁୟାଃ ମନ୍‌ସୁରୁଦ୍‌ରେ ପାହାମ୍‌ତାନ୍‌ଲଃ କାଜିକେଦା, "ଏଲା, ଆଇଙ୍ଗ୍‌ଦ ନାହାଁ ରିଜ୍‌ରାଙ୍ଗ୍‌ ରିକାତାନ୍‌ଲଃ ଅକଆଃ ବୁଗିନାଃ ତାନାଃ ଏନାକେ ବିନିଡ଼ାଅ ରିକାୟା ।" ଓଡ଼ୋଃ ନେଲେପେ, ଏନା ହଁଗି ସାମା ତାନାଃ ମେନ୍ତେ ସାରିୟାନା । 2 ଏନ୍ତେ ଆଇଙ୍ଗ୍‌ ଲାନ୍ଦା ରାସ୍‌କା ବିଷାଏରେ କାଜିକେଦା, "ଏନା ହଁଗି ବାଲୁଅଃ ବିଷାଏ ତାନାଃ, ରିଜ୍‌ରାଙ୍ଗ୍‌ ରିକାଏରେ ଚିନାଃ ଲାଭ୍‌ ହୁଇନାଃ ?" 3 ଆଇଙ୍ଗ୍‌ ଇଲିଆର୍‌ଖି ନୁଁ ହରାତେ ରାସ୍‌କା ନାମ୍‌ ନାଗେନ୍ତେ ସାନାଙ୍ଗ୍‌ କେଦା । ଓଡ଼ୋଃ ମୁରୁଖ୍‌ ରେୟାଃ କାଜିକେ ଅତଙ୍ଗ୍‌ କେଦା । ଏନ୍‌ରେହ ଆଇଁୟାଃ ମନ୍‌ସୁରୁଦ୍‌ ଆଇଙ୍ଗ୍‌କେ ସେଣାଁତେ ଆୟାର୍‌ ଇଦିକିୟାଁ । ନେ ସିର୍ମା ଲାତାର୍‌ରେ, ମାନୱାରାଃ ଘାଡ଼ିକାଦ୍‌ ଜୀୱାନ୍‌ ବିତାଅତାନ୍‌ ଦିପିଲି ଥାଲାରେ ଇନିଃ ଚିନାଃ ରିକା ଲାଗାତିୟାଁ,ଏନା ଆଇଙ୍ଗ୍‌ ସାରି ନାଗେନ୍ତେ ସାନାଙ୍ଗ୍‌କେଦା ।

4 ଆଇଙ୍ଗ୍‌ ମାପ୍‌ରାଙ୍ଗ୍‌ କାମି ରିକା ନାଗେନ୍ତେ ଉଡ଼ୁଃ ପାହାମ୍‌ କେଦା । ଆପାନ୍‌ ନାଗେନ୍ତେ ପୁରାଃ ମାପ୍‌ରାଙ୍ଗ୍‌ ଅଡ଼ାଃକ ବାଇକେଦା ଓଡ଼ୋଃ ପୁରାଃଗି ଦାଖ୍‌ବାକ୍‌ଡ଼ି ବାଇକେଦା । 5 ଆଇଙ୍ଗ୍‌ ଆପ୍‌ନାଃ ନାଗେନ୍ତେ ବାଗାଇଚା ଓଡ଼ୋଃ ମାରାଙ୍ଗ୍‌ ବାଗାଇଚା ଓଡ଼ୋଃ ରାକାମ୍‌ ରାକାମ୍‌ ଜ ଜ'ତାନ୍‌ ଦାରୁକ ରଏକେଦା । 6 ଆଇଙ୍ଗ୍‌ ଦାରୁ କରେ ଦାଆଃ ଏମ୍‌ ନାଗେନ୍ତେ ମିଆଦ୍‌ ବାନ୍ଦା ବାଇକେଦା । 7 ଆଇଙ୍ଗ୍‌ ପୁରାଃ ଦାସିକକେ କିରିଙ୍ଗ୍‌ କେଦ୍‌କଆ । ଓଡ଼ୋଃ ଆଇଁୟାଃ ଅଡ଼ାଃରେ ଜାନାମାକାନ୍‌ ଏଟାଃ ପୁରାଃ ଦାସିକ ହଁଗି ତାଇନ୍‌କେନା ଆଡଃଗି ହଁ, ଆଇଁୟାଃ ସିଦାରେ ଯୀରୁଶାଲେମ୍‌ରେ ତାଇନ୍‌ତାନ୍‌ ହଡ଼କ ଥାଲାରେ ଆଇଁୟାଃ ପୁରାଃଗି ଆସୁଲ୍‌ ଜାଁତୁ ଉରିକ୍‌ ମେରମ୍‌କଆଃ ଗୋଟ୍‌ ତାଇନ୍‌କେନା । 8 ଆଇଁୟାଃ ନାଗେନ୍ତେ ପୁରାଃଗି ରୁପା ଓଡ଼ୋଃ ସୋନା ହୁଣ୍ଡିକେଦା । ରାଜାକତାଃ ଏତେ ଓଡ଼ୋଃ ରାଇଜ୍‌ତାନ୍‌ କତାଃଏତେ ପୁରାଃଗି ଖୁର୍ଜିକ ଆଉ ହୁଣ୍ଡିକେଦା । ଦୁରାଙ୍ଗ୍‌ତାନ୍‌ କଡ଼ା କୁଡ଼ିକକେ ଓଡ଼ୋଃ ମାନୱାକେ ସବେନାଃ ସୁକୁ ଏମ୍‌ତାନ୍‌ ପୁରାଃ ହିରୁମ୍‌କକେ ଦହକେଦ୍‌କଆ ।

9 ନେ'ଲେକାତେ ଆଇଁୟାଃ ସିଦାରେ ଅକନ୍‌କ ଯୀରୁଶାଲେମ୍‌ରେ ତାଇନ୍‌କେନା ଇନ୍‌କୁତାଃଏତେ ଆଇଙ୍ଗ୍‌ ପୁରାଃଗି ମାରାଙ୍ଗ୍‌ ଓଡ଼ୋଃ ପେଡ଼େୟାନ୍‌ ଲେକାନିଃ ହବାୟାନା । ନେ ସବେନାଃ ହବାଅଃରେହ ସେଣାଁ କାଜି ଆଇଁୟାଃତାଃରେ ତାଇନ୍‌ୟାନା । 10 ଓଡ଼ୋଃ ଆଇଁୟାଃ ମେଦ୍‌ରେ ନେନେଲ୍‌ ତେୟାଃ ଅକଆଃ ସାନାଙ୍ଗ୍‌କେଦା, ଏନ୍‌ସବେନାଃ କାଜିକ ଆଇଙ୍ଗ୍‌ ରିକାକେଦା, ହଡ଼ମ ରାଃ ସାନାଙ୍ଗ୍‌ଲେକା ଜେତାନ୍‌ ବିଷାଏକେ କାଇଙ୍ଗ୍‌ ବାଗିକେଦା । ଚିୟାଃଚି ହଡ଼ମ ରେୟାଃ ସାନାଙ୍ଗ୍‌ତାନ୍‌ ସବେନ୍‌ କାଜିକାମିକ ଏତେ ଆଇଁୟାଃ ମନ୍‌ସୁରୁଦ୍‌ ରାସ୍‌କା ନାମ୍‌କେଦାଏ । ନେ'ସବେନାଃ ଆଇଁୟାଃ କାମିରେୟାଃ ନାଲା ତାଇନ୍‌କେନା । 11 ଏନ୍ତେ ଆଇଁୟାଃ ତିଃଇ ଅକ ସବେନାଃ କାମି ରିକାକାଦ୍‌ ତାଇକେନା ଓଡ଼ୋଃ ଅକନ୍‌ କାମିକ ରିକାକେଦ୍‌ତେ ଲାଗାକାନ୍‌ ତାଇକେନା, ଏନ୍‌ସବେନାଃକେ ଆଇଙ୍ଗ୍‌ ନେଲ୍‌କେଦା । ଓଡ଼ୋଃ ନେଲେପେ ସବେନାଃ ସାମାଗି ତାନାଃ ଓଡ଼ୋଃ ହୟକେ ଅତଙ୍ଗ୍‌ ଲେକାନ୍‌ କାଜିତାନାଃ । ଓଡ଼ୋଃ ସିଙ୍ଗି ଲାତାର୍‌ରେ ଜେତ୍‌ନାଃ ଲାଭ୍‌ କା ହବାୟାନା ।

12 ଏନ୍‌ ତାୟମ୍‌ତେ ଆଇଙ୍ଗ୍‌ ସେଣାଁ, ବାଲୁଅଃତାନ୍‌ କାଜି ଓଡ଼ୋଃ କା ସେଣାଁନ୍‌ କାଜିକ ନେଲ୍‌ ନାଗେନ୍ତେ ଇଛାସାନାଙ୍ଗ୍‌ କେଦା । ଚିୟାଃଚି ରାଜାରାଃ ତାୟମ୍‌ତେ ଅକନ୍‌ ହଡ଼ ହିଜୁଆଃ, ଇନିଃ ଚିନାଃ ଚିକାୟାଃ ? ଅକଆଃ ହବାକାନା, ଏସ୍‌କାର୍‌ ଏନାଗି । 13 ଏନ୍ତେ ଆଇଙ୍ଗ୍‌ ନେଲ୍‌କେଦା, ଚିଲ୍‌କା ନୁବାଃ ଏତେ ମାସ୍କାଲ୍‌ ବୁଗିନ୍‌ ତାନାଃ, ଏନ୍‌ଲେକା ଡଣ୍ଡ ଏତେ ସେଣାଁ ବୁଗିନାଃତାନାଃ । 14 ସେଣାଁନ୍‌ ହଡ଼ ଆୟାଃ ସେସେନ୍‌ ହରାକେ ସାରି ଉରୁମ୍‌ ଦାଡ଼ିୟାଃ ଓଡ଼ୋଃ ଡଣ୍ଡ ହଡ଼ ନୁବାଃରେ ହନର୍‌ବାଡ଼ା । ଏନ୍‌ରେହ ସବେନ୍‌କ ନାଗେନ୍ତେ ମିଆଦ୍‌ଗି ସାଜାଇ ହୁଇନାଃ, ଏନା ଆଇଙ୍ଗ୍‌ ନେଲ୍‌କେଦା । 15 ଏନ୍ତେ ଆଇଙ୍ଗ୍‌ ଆଇଁୟାଃ ମନ୍‌ସୁରୁଦ୍‌ରେ ପାହାମ୍‌ତାନ୍‌ଲଃ କାଜିକେଦା, "ଡଣ୍ଡ ହଡ଼ ନାଗେନ୍ତେ ଅକ ସାଜାଇ ହିଜୁଆଃ, ଆଇଁୟାଃ ଚେତାନ୍‌ରେ ହଁଗି ଏନା ହୁଇନାଃ । ତାବ୍‌ଦ ଚିନାଃମେନ୍ତେ ଆଇଙ୍ଗ୍‌ ସେଣାଁନ୍‌ନିଃ ହବାୟାନା ?" ଏନ୍ତେ ଆଇଙ୍ଗ୍‌ ଆଇଁୟାଃ ମନ୍‌ସୁରୁଦ୍‌ରେ ପାହାମ୍‌ତାନ୍‌ଲଃ କାଜିକେଦା, ନେଆଁଗି ସାମାତାନାଃ । 16 ଚିୟାଃଚି ଡଣ୍ଡ ହଡ଼କେ ଚିଲ୍‌କା ଜାନାଅଗି କାକ ପାହାମି ତାନା, ଏନ୍‌ଲେକା ସେଣାଁନ୍‌ ହଡ଼କେ ହଁଗି କାକ ପାହାମ୍‌ ରିକା । ଚିୟାଃଚି ହିଜୁଃତାନ୍‌ ଦିପିଲିରେ ସବେନ୍‌କ ରିଡ଼ିଙ୍ଗ୍‌ କଆଃ । ଚିୟାଃଚି ଡଣ୍ଡ ହଡ଼ ଚିଲ୍‌କା ଗଜଃଆ, ଏନ୍‌ଲେକା ସେଣାଁନ୍‌ ହଡ଼ ହଁ ଗଜଃଆ । 17 ଏନ୍ତେ ଆଇଙ୍ଗ୍‌ ଆଇଁୟାଃ ଜିୱାନ୍‌କେ ହିଲାଙ୍ଗ୍‌ କେଦା । ଚିୟାଃଚି ସିଙ୍ଗି ଲାତାର୍‌ରେ ରିକାକାଦ୍‌ କାମି ଆଇଁୟାଃ ନାଗେନ୍ତେ ପୁରାଃଗି ଦୁକୁ ଏମ୍‌ତାନ୍‌ ଲେକା ଆଟ୍‌କାର୍‌ କେଦା । ଚିୟାଃଚି ସବେନାଃ ସାମାଗି ଓଡ଼ୋଃ ହୟକେ ଅତଙ୍ଗ୍‌ତାନ୍‌ ଲେକ୍‌ନାଃ ତାନାଃ ।

18 ଏନ୍ତେ ଆଇଙ୍ଗ୍‌ ଆଇଁୟାଃ ଜିୱାନ୍‌କେ ହିଲାଙ୍ଗ୍‌ କେଦା । ଆଡଃଗି ଆଇଙ୍ଗ୍‌ ସିଙ୍ଗି ଲାତାର୍‌ରେ ଅକନ୍‌ କାମିକ ରିକା ନାଗେନ୍ତେ ପୁରାଃଗି ଲାଗାୟାନା । ଏନ୍‌ କାମିକକେ ଆଇଙ୍ଗ୍‌ ହିଲାଙ୍ଗ୍‌ କେଦାଃ । ଚିୟାଃଚି ଏନ୍‌ସବେନାଃକେ ଆଇଁୟାଃ ହିଜୁଆଃ ପିଢ଼ି ନାଗେନ୍ତେ ବାଗିକେଦ୍‌ତେ ସେନଃ ଲାଗାତିୟାଁଃ । 19 ଓଡ଼ୋଃ ଇନିଃ ସେଣାଁନ୍‌ନିଃ ଚାଏ ଡଣ୍ଡ ଲେକାନିଃ ହୁଇନାଃ, ଅକଏ ସାରିକାଦା ? ଆଡଃଗି ଆଇଙ୍ଗ୍‌ ସିଙ୍ଗି ଲାତାର୍‌ରେ ଅକନ୍‌ କାମିକ ରିକାକେଦ୍‌ତେ ପୁରାଃଗି ଲାଗାୟାନ୍ତେ ସେଣାଁ ନାମ୍‌କେଦା ଯେ, ଇନିଃଗି ଆଇଁୟାଃ କାମିକାଦ୍‌ ତେୟାଃରାଃ ନାଲା ନାମେନିଃ ହୁଇନାଃ । ନେଆଁଗି ସାମା ତାନାଃ । 20 ମେନ୍‌ଦ ସିଙ୍ଗି ଲାତାର୍‌ରେ ଅକନ୍‌ କାମିକ ରିକାକେଦ୍‌ତେ ପୁରାଃଗି ଲାଗାୟାନା, ଏନ୍‌ ସବେନ୍‌ ବିଷାଏ ନାଗେନ୍ତେ ଆଇଁୟାଃ ମନ୍‌ସୁରୁଦ୍‌କେ ଦୁକୁ ନାଗେନ୍ତେ ବାଗିକେଦା । 21 ମିଆଦ୍‌ ହଡ଼ ସେଣାଁ,ଇନିତୁ ଓଡ଼ୋଃ ପେଡ଼େଃତେ ସବେନ୍‌ କାମିକ ରିକାଃ । ଏନ୍‌ରେହ ଅକନ୍‌ ହଡ଼ ଏନା ମେନ୍ତେ କାଏ କାମିକାଦା । ଇନିୟାଃ ଆକ୍‌ତେୟାର୍‌ ନାଗେନ୍ତେ ଇନିଃନାଙ୍ଗ୍‌ ବାଗିକେଦ୍‌ତେ ସେନାଃ । ନେଆଁଗି ସାମା ଓଡ଼ୋଃ ପୁରାଃ ଏତ୍‌କାନାଃ ତାନାଃ । 22 ତାବ୍‌ଦ ହଡ଼ ସିଙ୍ଗି ଲାତାର୍‌ରେ ଅକନ୍‌ କାମିକ ମନ୍‌ସୁରୁଦ୍‌ତେ ରିକାଏ,ଏନ୍‌ ସବେନାଃ ଏତେ ଇନିଃ ଚିନାଃ ନାମେ ? 23 ଚିୟାଃଚି ଇନିୟାଃ ମାହା ସବେନାଃ ଏସ୍‌କାର୍‌ ଦୁକୁତେ ଓଡ଼ୋଃ ଏନ୍‌ କାମିକ ଉଡ଼ୁଃ ପାହାମ୍‌ ଲେକାନ୍‌ କାଜିକ ଲେକ୍‌ନାଃ ତାନାଃ । ନୁବାଃରେୟାଃ କାମିକ ଏତେ ହଁ ରୁଡ଼ୁ କାଏ ନାମାଃ । ନେଆଁଗି ସାମା ତାନାଃ ।

24 ଜଜମ୍‌ ନୁଁ ଓଡ଼ୋଃ ଆୟାଃ କାମିରେ ଆପାନ୍‌ ଜୀଉକେ ରାସ୍‌କା ଏମ୍‌ ବାଗିକେଦ୍‌ତେ ହଡ଼ରାଃ ଜେତ୍‌ନାଃ ଓଡ଼ୋଃ ଜାତ୍‌କା ବୁଗିନ୍‌ କାଜି ବାନଃଆ । ଓଡ଼ୋଃ ନେ ସବେନାଃ ପାର୍‌ମେଶ୍ୱାର୍‌ତାଃ ଏତେଗି ହୁଇନାଃ, ନେଆଁ ଆଇଙ୍ଗ୍‌ ନେଲ୍‌କେଦା । 25 ଚିୟାଃଚି ଆଇଁୟାଃତାଃଏତେ ଅକଏ ଜାତ୍‌କା ଜମ୍‌ ନୁଁ ଚାଏ ରିଜ୍‌ରାଙ୍ଗ୍‌ ରିକା ଦାଡ଼ିୟାଃ ? 26 ଚିୟାଃଚି ଅକନ୍‌ ହଡ଼ ପାର୍‌ମେଶ୍ୱାର୍‌କେ ସୁକୁଇଚି ରିକା ଦାଡ଼ିୟାଃ, ଇନିଃକେ ସେଣାଁ, ଇନିତୁ ଓଡ଼ୋଃ ରାସ୍‌କା ଏମାଏଃ । ମେନ୍‌ଦ ପାର୍‌ମେଶ୍ୱାର୍‌କେ ସୁକୁଇଚି ରିକାଇତାନ୍‌ ହଡ଼କେ ଏମ୍‌ନାଗେନ୍ତେ ମିଆଦ୍‌ ପାପି ହଡ଼କେ ଦାଣାଁ ଓଡ଼ୋଃ ହୁଣ୍ଡି ନାଗେନ୍ତେ ଇନିଃ କାମି ଏମାଇତାନାଏ । ନେଆଁଗି ସାମା ତାନାଃ ଓଡ଼ୋଃ ହୟକେ ଅତଙ୍ଗ୍‌ ରିକାତାନ୍‌ ଲେକାନ୍‌ କାଜିତାନାଃ ।