1 ଆଇଙ୍ଗ୍‌ ନେ ସବେନ୍‌ ବିଷାଏ ନେଲ୍‌କେଦ୍‌ତେ ଆଟ୍‌କାର୍‌ ଉରୁମ୍‌କେଦା ଯେ,ସେଣାଁନ୍‌ ଓଡ଼ୋଃ ଧାର୍‌ମାନ୍‌ ହଡ଼ ନେ ବାରାନ୍‌କିନା କାମି ପାର୍‌ମେଶ୍ୱାର୍‌ଆଃ ତିଃଇରେ ମେନାଃ । ଓଡ଼ୋଃ ନେଆଁ ଦୁଲାଡ଼୍‌ ଚି ହିସିଙ୍ଗା ତାନା, ଏନା ହଡ଼ କାଏ ସାରିୟାଃ । ଚିୟାଃଚି ନେ ବିଷାଏ ଆକିନାଃ ଆୟାର୍‌ରେ ତାଇନାଃ । 2 ସବେନ୍‌ ବିଷାଏ ସବେନ୍‌କ ନାଗେନ୍ତେ ମିଦ୍‌ସାମାନ୍‌ଗି ହୁଇନାଃ । ଧାର୍‌ମାନ୍‌ ଓଡ଼ୋଃ ଏତ୍‌କାନ୍‌, ଲେବେଃ ମନ୍‌, ଫାର୍‌ଚିଆକାନ୍‌ ଓଡ଼ୋଃ ସତ୍‌ରାକାନ୍‌, ଦାଣେଁ ରାକାବ୍‌ ତାନ୍‌ନିୟାଃ ଓଡ଼ୋଃ ଦାଣେଁ କା ରାକାବ୍‌ ତାନ୍‌ନିୟାଃ, ନେ ସବେନ୍‌କଆଃ ନାଗେନ୍ତେ ମିଦ୍‌ଗି ଦାସା ହୁଇନାଃ । ଲେବେଃ ମନ୍‌ରେନ୍‌ ହଡ଼ ନାଗେନ୍ତେ ଚିଲ୍‌କା, ପାପି ହଡ଼ ନାଗେନ୍ତେ ହଁ ଏନ୍‌ଲେକା । ଓଡ଼ୋଃ କିରିୟା ରିକାତାନ୍‌ ନିୟାଃ ନାଗେନ୍ତେ ଚିଲ୍‌କା, କିରିୟା କେଦ୍‌ତେ ବରତାନ୍‌ ହଡ଼ ନାଗେନ୍ତେ ହଁ ଏନ୍‌ଲେକା । 3 ନେ ସିଙ୍ଗି ଲାତାର୍‌ରେ ଅକ ସବେନାଃ କାମି ରିକାନାଃ, ଏନା ନାଗେନ୍ତେ ଦୁକୁରାଃ କାଜି ନେଆଁ ଯେ, ସବେନ୍‌କ ନାଗେନ୍ତେ ମିଆଦ୍‌ଗି ଦାସା ହୁଇନାଃ । ଆଡଃଗି ହଁ ମାନୱାରାଃ ଜୀଦାନ୍‌ ପାପ୍‌ତେ ପେରେୟାଃକାନା । ଓଡ଼ୋଃ ମାନୱା ଜୀନିଦ୍‌ ତାଇନ୍‌ ଜାକେଦ୍‌ ଇନ୍‌କୁଆଃ ଜୀଦାନ୍‌ରେ ନେ ବିଷାଏ ରାଇଜ୍‌ ରିକାୟା । ଏନ୍‌ ତାୟମ୍‌ତେ ଇନ୍‌କୁ ଗୟାକାନ୍‌ ହଡ଼କତାଃତେ ସେନଃତାନାକ । 4 ଅକନ୍‌ ହଡ଼ ଜିନିଦ୍‌ ତାଇନ୍‌ତାନ୍‌ ହଡ଼କ ଥାଲାରେ ମେନାଇୟାଃ, ଇନିୟାଃ ଆସ୍ରା ମେନାଃ । ଚିୟାଃଚି ଗୟାକାନ୍‌ ଟେଡ଼ଃ ଏତେ ଜିନିଦ୍‌ ତାଇନ୍‌ ସେତା ବୁଗିନ୍‌ ତାନିଃ । 5 ଜୀନିଦ୍‌ ତାଇନ୍‌ ହଡ଼ ଗନଏଃ ହୁଇନାଃ ମେନ୍ତେ ସାରିୟାଃଏ, ମେନ୍‌ଦ ଗୟାକାନ୍‌ ହଡ଼କ ଜେତ୍‌ନାଃ କାକ ସାରିୟାଃ ଚାଏ ଇନ୍‌କୁ ଓଡ଼ୋଃ ଜେତ୍‌ନାଃ ନାଲା କାକ ନାମାଃ । ଚିୟାଃଚି ଇନ୍‌କୁଆଃ ପାହାମ୍‌ କାଜିକ ସବେନାଃ ଜିୟନ୍‌ୟାନା । 6 ଚିଲ୍‌କା ଇନ୍‌କୁଆଃ ଦୁଲାଡ଼୍‌, ଏନ୍‌ଲେକା ଇନ୍‌କୁଆଃ ହିସିଙ୍ଗା ଓଡ଼ୋଃ ହାଁକାର୍‌ ଜିୟନଃଆ । ଚାଏ ସିଙ୍ଗି ଲାତାର୍‌ରେ ଅକ ସବେନାଃ ରିକାଅଃଆ,ଏନାରେ ଜାନାଅଗି ଇନ୍‌କୁଆଃ ଜେତାନ୍‌ ଆକ୍‌ତେୟାର୍‌ କା ତାଇନାଃ ।

7 ଯୁ, ଆମ୍‌ ଆମାଃ ହରାରେ ସେନଃମେ, ସୁକୁତେ ଆମ୍‌ ଆମାଃ ଜଜମ୍‌ତେୟାଃ ଜମେମେ ଓଡ଼ୋଃ ରାସ୍‌କାତେ ଆମାଃ ଦାଖ୍‌ରାସି ନୁଏଁ ମେଁ । ଚିୟାଃଚି ପାର୍‌ମେଶ୍ୱାର୍‌ ଆମାଃ କାମିକାଦ୍‌ ତେୟାଃକେ ନେଲ୍‌କେଦା । 8 ଆମାଃ ଲିଜାଃ ସବେନ୍‌ ଇମ୍‌ତା ଫାର୍‌ଚି ତାଇନ୍‌କା ଆମାଃ ବହଃରେୟାଃ ଉବ୍‌ରେ ସବେନ୍‌ ଇମ୍‌ତା ସୁନୁମ୍‌ ଗସଃକେଦ୍‌ତେ ତାଇନ୍‌କା । 9 ଆମ୍‌ ଅକଏକେ ପୁରାଃଗି ଦୁଲାଡ଼୍‌ ତାନାମ୍‌, ଏନ୍‌ ଆମାଃ କୁଡ଼ିଲଃ ସବେର୍‌ ହୁଲାଙ୍ଗ୍‌ ରାସ୍‌କାତେ ତାଇନ୍‌ମେ । ଚିୟାଃଚି ସିଙ୍ଗି ଲାତାର୍‌ରେ ପାର୍‌ମେଶ୍ୱାର୍‌ ଆମ୍‌କେ ଚିମିନ୍‌ ମାହା ଜାକେଦ୍‌ ଜିନିଦ୍‌ ତାଇନ୍‌ ରେୟାଃ ଦିପିଲି ଏମାକାଦ୍‌ମେଆ, ଏନା ଆମାଃ ନାଗେନ୍ତେ ସାମାଃ ତାନା ଓଡ଼ୋଃ ଆମ୍‌ ଆମାଃ ଜୀୱାନ୍‌ ନାଗେନ୍ତେ ଅକ କାମିକ ରିକାଏତାନା, ଏନ୍‌ କାମିରେୟାଃ ନାଲା ଏନାଗି ତାନା । 10 ଆମାଃ ତିଃଇ କାମି ରିକାନାଗେନ୍ତେ ଅକ କାମିକ ନାମେୟା, ଏନାକେ ଆମ୍‌ ଆମାଃ ପେଡ଼େଃତେ ରିକାଏମେ । ଚିୟାଃଚି ଆମ୍‌ ଅକନ୍‌ ଠାୟାଦ୍‌ତେକ ସେନଃତାନା, ଏନ୍ତାଃରେ ଜେତାନ୍‌ କାମି, ଚାଏ ପାହାମ୍‌, ଚାଏ ଇନିତୁ, ଚାଏ ସେଣାଁ ବାନଆଃ ।

11 ଆଇଙ୍ଗ୍‌ ଆଡଃଗି ସିଙ୍ଗି ଲାତାର୍‌ରେ ନେଲ୍‌କେଦା ଯେ, ପୁରାଃ ନିରେତାନ୍‌ ହଡ଼କେ ନିର୍‌ରେ ଜିତାଅ, ଚାଏ ବିର୍‌ ହଡ଼କେ ଲାଡ଼ାଇରେ ଜିତାଅ, ଚାଏ ସେଣାଁନ୍‌ କକେ ଜଜମାଃ, ଚାଏ ବୁଦ୍ଧିମାନ୍‌ ହଡ଼କକେ ଖୁର୍ଜି, ଚାଏ ପାଣ୍ଡିତ୍‌କକେ ସାୟାଦ୍‌ କା ନାମଃଆ, ମେନ୍‌ଦ ସବେନ୍‌କ ନାଗେନ୍ତେ ଦିପିଲି ଓଡ଼ୋଃ ଦୁକୁ ହୁଇନାଃ । 12 ଚିୟାଃଚି ମାନୱାହଁ ଆୟାଃ ଗନଏଃ ଦିପିଲି କାଏ ସାରିୟାଃ । ଚିଲ୍‌କା ହାକୁକ ଜାଲୋମ୍‌ରେ ଉୟୁଃନାଃ ଓଡ଼ୋଃ ଚେଣେଁକ ହଁ ଜାଲୋମ୍‌ରେ ଉୟୁଃକେଦ୍‌ତେ ସାବ୍ ନାଃ । ଏନ୍‌ଲେକା ହଡ଼ହନ୍‌ ଚେତାନ୍‌ରେ ହିଜୁଃତାନ୍‌ ସାଙ୍କାଟ୍‌ ଇମ୍‌ତାଗି ଉୟୁଃନାଃ ।

13 ସିଙ୍ଗି ଲାତାର୍‌ରେ ଆଇଙ୍ଗ୍‌ ନେ ଲେକାନ୍‌ ସେଣାଁନ୍‌ ନେଲ୍‌କେଦା ଓଡ଼ୋଃ ଏନା ଆଇଁୟାଃ ଆୟାର୍‌ରେ ମାରାଙ୍ଗ୍‌ ମେନ୍ତେ ଆଟ୍‌କାର୍‌ କେଦା । 14 ଜେ'ଲେକାଚି, କାଟିକାନ୍‌ ହଡ଼ ତାଇନ୍‌ ମିଆଦ୍‌ ହୁଡିଙ୍ଗ୍‌ ନାଗାର୍‌ ତାଇନ୍‌କେନା । ମିଆଦ୍‌ ରାଜା ଏନ୍‌ ନାଗାର୍‌ ବିରୁଧ୍‌ରେ ବିରିଦ୍‌ୟାନା । ଏନ୍ତେ ଇନିଃ ହିଜୁଃକେଦ୍‌ତେ ଏନ୍‌ ନାଗାର୍‌କେ ଆକ୍‌ତେୟାର୍‌ କେଦା ଓଡ଼ୋଃ ଏନ୍‌ ନାଗାର୍‌ରେ ମାପ୍‌ରାଙ୍ଗ୍‌ ଗାଡ଼୍‌ ବାଇକେଦାଏ । 15 ନେ'ଲେକାନ୍‌ ସାମାୟରେ ମିଆଦ୍ ଗାରିବ୍‌ ସେଣାଁନ୍‌ ହଡ଼ ନେଲ୍‌ୟାନା । ଓଡ଼ୋଃ ଇନିଃ ଆପାନ୍‌ ସେଣାଁତେ ନାଗାର୍‌କେ ବାଞ୍ଚାଅଃ କେଦା । ଏନ୍‌ରେହ ଏନ୍‌ ଗାରିବ୍‌ ସେଣାଁନ୍‌ ହଡ଼କେ ଜେତାଏ କାକ ପାହାମ୍‌କିୟାଃ । 16 ଏନ୍ତେ ଆଇଙ୍ଗ୍‌ କାଜିକେଦା, ପେଡ଼େଃ ଏତେ ସେଣାଁ ବୁଗିନ୍‌ ତାନାଃ । ଏନ୍‌ରେହ ଗାରିବ୍‌ ହଡ଼ରାଃ ସେଣାଁନ୍‌ କେ ହିଲାଙ୍ଗ୍‌ ରିକା ଓଡ଼ୋଃ ଇନିୟାଃ କାଜିକେ ଜେତାଏ କାକ ଆୟୁମାଃ । 17 ଡଣ୍ଡ ହଡ଼କଆଃ ଥାଲାରେ ରାଇଜ୍‌ତାନ୍‌ ହଡ଼ରାଃ କାଉରି ବାଗିକେଦ୍‌ତେ ଏସ୍‌କାର୍‌ଗି ତାଇନ୍‌ତାନ୍‌ ସେଣାଁନ୍‌ ହଡ଼ରାଃ ସୁକୁକାଜି ପୁରାଃ ଆୟୁମଃଆ । 18 ଲାଡ଼ାଇତାନ୍‌ ତାରାଉଡ଼ି ଏତେ ସେଣାଁନ୍‌ ବୁଗିନ୍‌ ତାନାଃ । ମେନ୍‌ଦ ମିଆଦ୍‌ ପାପିହଡ଼ ପୁରାଃ ବୁଗିନ୍‌ କାଜିକେ ଜିୟନ୍‌ ରିକାଏଃ ।