1 ସିଙ୍ଗି ଲାତାର୍ରେ ମିଆଦ୍ ଦୁକୁରାଃ ବିଷାଏ ନେଲାକାଦା, ଓଡ଼ୋଃ ଏନା ହଡ଼କ ନାଗେନ୍ତେ ପୁରାଃଗି ହାମ୍ବାଲ୍ ରେୟାଃ ବିଷାଏ ତାନାଃ । 2 ପାର୍ମେଶ୍ୱାର୍ ଚିମିନ୍କକେ ନିମିନ୍ ଖୁର୍ଜି, ଟାକାପାଏସା ଓଡ଼ୋଃ ମାଇନ୍ ଏମାଏଃ ଯେ, ଆୟାଃ ସାନାଙ୍ଗ୍ତାନ୍ ବିଷାଏକେ ପୁରାଏ ନାଗେନ୍ତେ ଜେତାନ୍ ଘାଟି କା ତାଇନାଃ । ମେନ୍ଦ ପାର୍ମେଶ୍ୱାର୍ ଇନିଃକେ ଏନ୍ ସବେନାଃ ଏତେ ସୁକୁ ନାମେ ନାଗେନ୍ତେ ପେଡ଼େଃ କା ଏମାଇତାନା ମେନ୍ଦ ଏଟାଃ ମିଆଦ୍ ହଡ଼ ଏନ୍ ସବେନାଃରାଃ ସୁକୁ ନାମେତାନାଏ । ନେଆଁଗି ସାମା ତାନାଃ ଓଡ଼ୋଃ ଜାଲମ୍ ରେୟାଃ ଫାଁସ୍ରି ତାନାଃ । 3 ଜେତାନ୍ ହଡ଼ ମିଦ୍ ଶାଅ ହନ୍ ଜାନାମ୍ କାଦ୍କଆଏ ଓଡ଼ୋଃ ପୁରାଃ ମାହା ଜାକେଦ୍ ଜିନିଦ୍ ତାଇନ୍ କେଦ୍ତେ ପୁରାଃ ଦିପିଲି ଜାକେଦ୍ ଜିନିଦ୍ ତାଇନାଃ, ମେନ୍ଦ ଆୟାଃ ମନ୍ସୁରୁଦ୍ରେ ସୁକୁ କା ତାଇନାଃ ଓଡ଼ୋଃ ଇନିଃ ଗଜଃ ଇମ୍ତା କାବାର୍ କାଟିକାନ୍ କା ନାମେରେଦ । ଆଇଙ୍ଗ୍ କାଜିୟାଃ ଏନ୍ ହଡ଼ ଏତେ ଗୟାକାନ୍ ମିଆଦ୍ ବାଲେଃ ହନ୍ ଜାନାମ୍ ତେୟାଃ ବୁଗିନାଃ ତାନାଃ । 4 ଚିୟାଃଚି ନେ ଗୟାକାନ୍ ହନ୍ ଭାଁପ୍ ଲେକା ହିଜୁଃୟାନାଏ ଓଡ଼ୋଃ ନୁବାଃରେ ସେନଃୟାନାଏ । ଓଡ଼ୋଃ ଇନିୟାଃ ନୁତୁମ୍ ନୁବାଃରେ ଦାପାଲ୍ୟାନା । 5 ଆଡଃଗି, ନେ ହନ୍ ଏନ୍ ସିଙ୍ଗିକେ କା ନେଲ୍ ଚାଏ କା ସାରି ଏନ୍ ହଡ଼ ବାଗିକେଦ୍ତେ ନେ ହନ୍ ରୁଡ଼ୁନ୍ ନାମାଃ । 6 ଓଡ଼ୋଃ ଏନ୍ ହଡ଼ ଜିୱାନ୍ ରେୟାଃ ଜେତାନ୍ ସୁକୁ କାଜିକେ କା ନାମ୍କେଦ୍ତେ, ବାର୍ ହାଜାର୍ ସିର୍ମା ଜିନିଦ୍ ତାଇନ୍ରେ ହଁ, ଚିନାଃ ସବେନ୍କ ମିଆଦ୍ ଠାୟାଦ୍ତେ କାକ ସେନାଃ ?
7 ହଡ଼ରାଃ ସବେନ୍ କାମିକେ ଆୟାଃ ମଚା ରେୟାଃ ଜଜମ୍ ନାଗେନ୍ତେ କାମିୟାଃ । ଏନ୍ରେହ ଆୟାଃ ଜଜମ୍ ରେୟାଃ ଲାଲାଚ୍ ଚିଉଲାହ ହ କା ପୁରାଅଃଆ । 8 ଏନାମେନ୍ତେ ଡଣ୍ଡ ଏତେ ସେଣାଁନ୍ ହଡ଼ରାଃ ଚିକାନ୍ ଲାଭ୍ ? ଓଡ଼ୋଃ ମିଆଦ୍ ଗାରିବ୍ ହଡ଼ ଜୀନିଦ୍ ହଡ଼କ ଥାଲାରେ ଚିଲ୍କା ସେସେନ୍ ଲାଗାତିୟାଁ, ଏନା ଇନିଃ ସାରିୟାଃ, ଏନାରେ ଚିନାଃ ଲାଭ୍ ମେନାଃ ? 9 ମନ୍ରେ ସାନାଙ୍ଗ୍ ତାନ୍ ଲାଲାଚ୍ କାଜି ଏତେ ନେପେଲ୍ ତେୟାଃ ବୁଗିନ୍ ତାନାଃ । ନେଆଁଗି ସାମା ତାନାଃ ଓଡ଼ୋଃ ହୟକେ ସାବ୍ ଲେକାନ୍ କାଜିତାନାଃ ।
10 ଅକଆଃ ହବାକାନା ପୁରାଃ ଦିପିଲି ସିଦାରେ ଏନାରାଃ ନୁତୁମ୍ ଏମାକାନ୍ ତାଇକେନା । ଓଡ଼ୋଃ ଏନା ହଡ଼ ମେନ୍ତେ ସାରିୟଃ ତାନାଏ ଓଡ଼ୋଃ ଇନିଃ ଆପ୍ନାଃ ଏତେ ପେଡ଼େୟାନ୍ ହଡ଼ଲଃ ଲାଡ଼ାଇ ରିକା କା ଦାଡ଼ିୟାଃ । 11 ଏତ୍କାନାଃ କାଜିକ ପୁରାଃଗି ମେନାଃ, ଏନ୍ ସବେନାଃରେ ହଡ଼ରାଃ ଚିକାନ୍ ଲାଭ୍ ? 12 ଚିୟାଃଚି ହଡ଼ ଆୟାଃ ଜୀୱାନ୍କେ ଉମ୍ବୁଲ୍ରେ ବିତାଅତାନ୍ ଲେକା ଅକ ହସଡ଼ ରେୟା ଜିୱାନ୍ରେ ତାଇନ୍ତାନା, ଏନ୍ ସବେନାଃ ଦିପିଲିକରେ ଇନିୟାଃ ଚିକାନ୍ ସୁକୁ ମେନାଃ, ଏନା ଅକଏ ସାରିକାଦା ? ଓଡ଼ୋଃ ହଡ଼ରାଃ ଗନଏଃ ତାୟମ୍ରେ, ସିଙ୍ଗି ଲାତାର୍ରେ ଚିନାଃ ହୁଇନାଃ, ଏନା ଅକଏ ଇନିଃକେ ଉଦୁବ୍ ଦାଡ଼ିୟାଃ ?
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)