ରାଜା ଡେରାୟସ୍ରାଃ ହୁକୁମ୍
1 ରାଜା ଦାରିୟାବସ୍ଆଃ ହୁକୁମ୍ ଲେକାତେ ବାବିଲୋନ୍ରେୟାଃ ପୁଥି ଦହ ଅଡ଼ାଃରେ ଅନଲ୍ ଚିଟାଉ ଦାଣାଁ ଅଡଙ୍ଗ୍ ନାଙ୍ଗ୍ କାଜିୟାନା। 2 ମିଦିୟ ପାର୍ଗାନ୍ରେୟାଃ ଏକ୍ବାତାନା ନୁତୁମ୍ ନାଗାର୍ରେ ଉହୁର୍ରେୟାଃ ମିଆଁଦ୍ ପୁଥି ନାମ୍ୟାନା। ପାହାମେ ନାଙ୍ଗ୍ ଏନାରେ ନେ’ଲେକା ଅଲାକାନ୍ ତାଇକେନା,
3 "ରାଜା ସାଇରସ୍ଆଃ ରାଇଜ୍ତାନ୍ ଦିପିଲିରେୟାଃ ପାହିଲା ବାରାଷ୍ରେ, ସାଇରସ୍ ଯୀରୁଶାଲେମ୍ରେ ତାଇକାନ୍ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ବିଷାଏରେ ହୁକୁମ୍ ଜାରିକାଦ୍ ତାଇକେନାଏ, ଉରୁବ୍ଦାଣେଁ ଓଡ଼ୋଃ ଦାନ୍ ରାକାବ୍ ନାଙ୍ଗ୍ ନେ ବିନ୍ତିଅଡ଼ାଃ ଆଡଃମିସା ବାଇରୁହାଡ଼ଃକା ଓଡ଼ୋଃ ନେଆଁରାଃ ନିହିଁଗାଡ଼ା ପୁରା କେଟେଃକ୍ଗି ବାଇୟଃକା। ବିନ୍ତିଅଡ଼ାଃରାଃ ସାଲାଙ୍ଗି ଆପିହିସି ତିଃଇ ଓଡ଼ୋଃ ଚାକାର୍ ଆପିହିସି ତିଃଇ ହବାଅଃକା। 4 ଏନା ଆପି ପାନ୍ତି ମାପ୍ରାଙ୍ଗ୍ ଦିରି ଓଡ଼ୋଃ ମିଆଁଦ୍ ପାନ୍ତି ଦାରୁରାଃ ନାୱା ଉରାତେ ବାଇୟଃକା। ନେ ସବେନାଃ ବାଇରେୟାଃ ଗନଙ୍ଗ୍ ରାଜାରାଃ ଖୁର୍ଜିଅଡ଼ାଃଏତେ ଏମଃକା। 5 ରାଜା ନେବୁଖଦ୍ନେଜର୍ ପାର୍ମେଶ୍ୱାର୍ଆଃ ମାନ୍ଦିର୍ଅଡ଼ାଃରାଃ ଅକ ସୋନା, ରୁପାରାଃ ଜିନିଷ୍କ ଯୀରୁଶାଲେମ୍ ବିନ୍ତିଅଡ଼ାଃଏତେ ବାବିଲୋନ୍ ଇଦିକାଦ୍ ତାଇକେନାଏ, ଏନ୍ ସବେନାଃକେ ଯୀରୁଶାଲେମ୍ତେ ଏମ୍ ରୁହାଡ଼ଃକା ଓଡ଼ୋଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରେ ତାଇକେନ୍ ଠାୟାଦ୍ରେଗି ଦହଃକା।
6 "ଏନ୍ତେ ଫରାତ୍ ଗାଡ଼ାରାଃ ହାନ୍ ପାରମ୍ରେନ୍ ଲାଟ୍ସାହେବ୍ ତତ୍ତନିୟ, ଶେଥର୍ବୋଜନିୟ, ଆପେ ଓଡ଼ୋଃ ରାଇଜ୍ ଚାଲାଅତାନ୍ ଏଟାଃ ହଡ଼କ ଏନ୍ତାଃଏତେ ସାଙ୍ଗିନ୍ରେ ତାଇନ୍ପେ। 7 ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ବାଇୟଃତାନ୍ କାମିରେ ଆଲପେ କାଜି ଛେକାଦେୟା। ଯିହୁଦିରେନ୍ ଲାଟ୍ସାହେବ୍ ଓଡ଼ୋଃ ପ୍ରାଚିନ୍କ ପାର୍ମେଶ୍ୱାର୍ଆଃ ବିନ୍ତିଅଡ଼ାଃକେ ସିଦା ତାଇକେନ୍ ଠାୟାଦ୍ରେଗି ବାଇୟେକାକ। 8 ମେନ୍ଦ ପାର୍ମେଶ୍ୱାର୍ଆଃ ନେ ବିନ୍ତିଅଡ଼ାଃ ବାଇରୁହାଡ଼୍ କାମିରେ ଯିହୁଦି ପୁର୍ଖାହାଡ଼ାମ୍କ ଇନ୍କୁକେ ଦେଙ୍ଗାକପେ ମେନ୍ତେଇଙ୍ଗ୍ ଆଚୁପେତାନା। ଇନ୍କୁଆଃ କାମିରେ ଜେ’ଲେକା ଜେତାନ୍ ରୋକ୍ଟକ୍ କା ହବାଅଃଆ, ଏନାମେନ୍ତେ ଏନ୍ ହଡ଼କକେ ପୁରା ଗନଙ୍ଗ୍ ରାଜାରାଃ ଭାଣ୍ଡାର୍ଏତେ ଚାଏ ନାହିଁ ହାନ୍ ପାରମ୍ରେୟାଃ ପାର୍ଗାନ୍ରେନ୍ ରାଜାକଆଃ ଭାଣ୍ଡାର୍ଏତେ ଆଉକେଦ୍ତେ ଏମାକପେ। 9 ସିର୍ମାରେନ୍ ପାର୍ମେଶ୍ୱାର୍ଆଃ ନୁତୁମ୍ତେ ଦାଣେଁରାକାବ୍ ନାଙ୍ଗ୍ ଯୀରୁଶାଲେମ୍ରେନ୍ ଯାଜାକ୍କଆଃ ଲାଗାତିଙ୍ଗ୍ ଲେକା ବାଛା, ମିଣ୍ଡି, ମେରମ୍, ଗହମ୍, ବୁଲୁଙ୍ଗ୍, ଦାଖ୍ରାସି ଓଡ଼ୋଃ ଅଲିଭ୍ ସୁନୁମ୍, ନେ ସବେନାଃ ବେଗାର୍ ବିଲାମ୍କେଦ୍ତେ ସବେନ୍ ହୁଲାଙ୍ଗ୍ ଏମାକପେ। 10 ତାବ୍ଦ ଇନ୍କୁ ସିର୍ମାରେନ୍ ପାର୍ମେଶ୍ୱାର୍ଆଃ ଆୟାର୍ରେ ସୁକୁଆନ୍ ଦାଣେଁ ରାକାବ୍କେଦ୍ତେ ରାଜା ଓଡ଼ୋଃ ରାଜାକଆଃ ହନ୍କ ନାଙ୍ଗ୍ ସୁକୁ ଜୀଦାନ୍ ନାଗେନ୍ତେ ବିନ୍ତିୟାକ। 11 ଆଡଃଗି ଆଇଙ୍ଗ୍ ଆଚୁତାନାଇଙ୍ଗ୍, ଜେତାଏ ଆଇଁୟାଃ ନେ ଆନାଚୁକେ କାଏ ମାନାତିଙ୍ଗ୍ ରେଦ, ଆୟାଃ ଅଡ଼ାଃଏତେ ମିଆଁଦ୍ ଦାରୁରାଃ ଉରା ଅଡଙ୍ଗ୍କେଦ୍ତେ ଏନାରେ ଇନିଃକେ ତଲ୍କିଃଲଃ ହାକା ରିକା ଲାଗାତିୟାଁଃ ଓଡ଼ୋଃ ନେ ଗୁହ୍ନାଁ ରିକାକାଦ୍ ହରାତେ ଆୟାଃ ଅଡ଼ାଃକେ ହାଦୁଡ଼୍କେଦ୍ତେ ସାରାଗାଡା ବାଇୟଃକା। 12 ଜେତା ରାଜା ଚାଏ କିଲି ନେ ଆନାଚୁକେ ବାଦ୍ଲାଅ ରେଦ, ଚାଏ ଯୀରୁଶାଲେମ୍ ନାଗାର୍ରେ ବାଇୟାକାନ୍ ପାର୍ମେଶ୍ୱାର୍ଆଃ ନେ ବିନ୍ତିଅଡ଼ାଃକେ ହାଦୁଡ଼େ ରେଦ, ଅକ ପାର୍ମେଶ୍ୱାର୍ ଆୟାଃ ଆପ୍ନାଃ ନୁତୁମ୍ ଏନ୍ତାଃରେ ବାଇୟାକାଦା, ଏନ୍ ପାର୍ମେଶ୍ୱାର୍ ଇନିଃକେ ଜିୟନିକା। ଆଇଙ୍ଗ୍ ଦାରିୟାବସ୍ ରାଜା ନେ ଆନାଚୁକେଇଙ୍ଗ୍ ଏମାକାଦା, ନେଆଁକେ ବୁଗିଲେକା ମାନାତିଙ୍ଗ୍ ଲାଗାତିୟାଁଃ।"
ବିନ୍ତିଅଡ଼ାଃରାଃ କାମି ଟୁଣ୍ଡୁ ଓଡ଼ୋଃ ସାଂସ୍କାର୍
13 ରାଜା ଦାରିୟାବସ୍ ନେ ହୁକୁମ୍ ଜାରିକେଦ୍ ହରାତେ ଫରାତ୍ ଗାଡ଼ା ହାନ୍ପାରମ୍ରାଃ ପାର୍ଗାନ୍ରେନ୍ ଲାଟ୍ସାହେବ୍ ତତ୍ତନିୟ, ଶେଥର୍ବୋଜନିୟ ଓଡ଼ୋଃ ଆୟାଃଲଃ ତାଇନ୍ତାନ୍କ ରାସ୍କାତେ ହୁକୁମ୍ ମାନାତିଙ୍ଗ୍କେଦାକ। 14 ଯିହୁଦି ଆଗୁଆଇକ ନାବି ହାଗାୟ ଓଡ଼ୋଃ ଇଦ୍ଦୋଆଃ କିଲିରେନ୍ ଜିଖରିୟରାଃ ପ୍ରାଚାର୍ ହରାତେ ଜୀଉରେ ରାସ୍କା ନାମ୍କେଦ୍ଲଃ ବିନ୍ତିଅଡ଼ାଃରାଃ କାମି ଏଟେଦ୍କେଦାକ। ଓଡ଼ୋଃ ଇନ୍କୁ ଇସ୍ରାଏଲ୍ରେନ୍ ପାର୍ମେଶ୍ୱାର୍ଆଃ ହୁକୁମ୍ ଲେକାତେ ଓଡ଼ୋଃ ପାରସ୍ୟରେନ୍ ରାଜା ସାଇରସ୍, ଦାରିୟାବସ୍ ଓଡ଼ୋଃ ଅର୍ତ୍ତକ୍ଷସ୍ତଆଃ ହୁକୁମ୍ ଲେକାତେ ମାନ୍ଦିର୍ଅଡ଼ାଃରାଃ ବାବାଇ କାମି ଟୁଣ୍ଡୁକେଦାକ। 15 ରାଜା ଦାରିୟାବସ୍ଆଃ ରାଇଜ୍ ଦିପିଲିରାଃ ତୁରିୟା ବାରାଷ୍, ଅଦର୍ ମାହିନାଃରାଃ ଆପି ହୁଲାଙ୍ଗ୍ରେ ମାନ୍ଦିର୍ଅଡ଼ାଃରାଃ ବାବାଇ କାମି ଟୁଣ୍ଡୁୟାନା। 16 ଏନ୍ତେ ଇସ୍ରାଏଲ୍ ହଡ଼କ ଯାଜାକ୍, ଲେବୀ ଓଡ଼ୋଃ ଦାସିୟଃ ତନଲ୍ଏତେ ରୁହାଡ଼୍କାନ୍ ହଡ଼କ ପୁରାଃ ରାସ୍କାତେ ବିନ୍ତିଅଡ଼ାଃ ସାଂସ୍କାର୍ରାଃ ପାରାବ୍ ମାନାତିଙ୍ଗ୍କେଦାକ। 17 ପାର୍ମେଶ୍ୱାର୍ଆଃ ନେ ବିନ୍ତିଅଡ଼ାଃ ସାଂସ୍କାର୍ ରିକା ନାଙ୍ଗ୍ ୧୦୦ ବାଛା, ୨୦୦ ମିଣ୍ଡି ଓଡ଼ୋଃ ୪୦୦ ମିଣ୍ଡିହନ୍ ଦାଣେଁ ରାକାବ୍କେଦ୍କଆକ। ଇସ୍ରାଏଲ୍ରେନ୍ କିଲିଏତେ ମିପିୟାଦ୍ ହିସାବ୍ଲେରେ, ଗେଲ୍ବାର୍ କିଲି ନାଙ୍ଗ୍ ଗେଲ୍ବାର୍ ମେରମ୍ ପାପ୍ରେୟାଃ ଦାଣେଁ ରାକାବ୍ୟାନା। 18 ମୁଶା ଅଲାକାଦ୍ ପୁଥି ଲେକାତେ ଯୀରୁଶାଲେମ୍ରେ ପାର୍ମେଶ୍ୱାର୍ଆଃ ସେୱା ରିକା ନାଙ୍ଗ୍ ଯାଜାକ୍କ ଓଡ଼ୋଃ ଲେବୀକ ଆକଆଃ ଆପ୍ନାଃ ହିସା ଓଡ଼ୋଃ ଝୁଣ୍ଡ୍ ଲେକାତେ ସାଲାକେଦ୍କଆ।
ପାସ୍କା ପାରାବ୍ ମାନାତିଙ୍ଗ୍
19 ପାହିଲା ମାହିନାରାଃ ଗେଲ୍ ଉପୁନିୟା ହୁଲାଙ୍ଗ୍ରେ ଦାସିୟଃ ନାଙ୍ଗ୍ ତଲ୍ ଇଦିକାନ୍ ହଡ଼କ ହିଜୁଃ ରୁହାଡ଼୍ୟାନା। ଏନ୍ତେ ଇନ୍କୁ ପାସ୍କା ପାରାବ୍ ମାନାତିଙ୍ଗ୍କେଦାକ। 20 ଯାଜାକ୍ ଓଡ଼ୋଃ ଲେବୀ ହଡ଼କ ଆପାନ୍କେ ଫାର୍ଚି ରିକାୟାନାକ। ଏନାତେ ଇନ୍କୁ ଦାସିୟଃ ନାଙ୍ଗ୍ ତଲ୍ ଇଦିୟେତେ ହିଜୁଃ ରୁହାଡ଼୍କାନ୍ ହଡ଼କ ନାଗେନ୍ତେ, ଇନ୍କୁଆଃ ଯାଜାକ୍ ହାଗାକ ନାଗେନ୍ତେ ଓଡ଼ୋଃ ଆକଆଃ ଆପ୍ନାଃ ହଡ଼କ ନାଗେନ୍ତେ ପାସ୍କା ପାରାବ୍ରେନ୍ ଜାଁତୁକେ ଦାଁଣେ ରାକାବ୍କିୟାକ।
21 ଦାସିୟଃ ନାଙ୍ଗ୍ ତଲ୍ ଇଦିୟେତେ ହିଜୁଃ ରୁହାଡ଼୍କାନ୍ ଇସ୍ରାଏଲ୍ ହଡ଼କ ଏନାକେ ଜମ୍କେଦାକ ଓଡ଼ୋଃ ଇସ୍ରାଏଲ୍ରେନ୍ ପ୍ରାଭୁ ପାର୍ମେଶ୍ୱାର୍ଆଃ ସେୱା ରିକା ନାଙ୍ଗ୍ ସାଅଁସାର୍ ହଡ଼କଆଃ ସତ୍ରା କାଜି କାମିଏତେ ଆପାନ୍କେ ଆତମ୍କାନାକ, ଇନ୍କୁ ସବେନ୍କ ହଗି ଇନ୍କୁଲଃ ମିସାତେ ଜମ୍କେଦାକ। 22 ଏୟା ହୁଲାଙ୍ଗ୍ ଜାକେଦ୍ ଇନ୍କୁ ସାବାଃ ହଲଙ୍ଗ୍ରାଃ ପାରାବ୍ ମାନାତିଙ୍ଗ୍କେଦାକ। ଚିଆଃଚି ପ୍ରାଭୁ ଆସେରିୟାରେନ୍ ରାଜାରାଃ ମନ୍ସୁରୁଦ୍କେ ବାଦ୍ଲାଅକେଦା ଓଡ଼ୋଃ ଏନ୍ ରାଜା ଇସ୍ରାଏଲ୍ରେନ୍ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ବାଇ ନାଙ୍ଗ୍ ଯିହୁଦୀ ହଡ଼କକେ ଦେଙ୍ଗାକେଦ୍କ ହରାତେ, ପ୍ରାଭୁ ଇସ୍ରାଏଲ୍ ହଡ଼କଆଃ ଜୀଉରେ ରାସ୍କା ଏମ୍କେଦ୍କଆଏ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)