ଏଜ୍ରା 9

ମେସାଗୁଲା ଆଣ୍‌ଦିକାନ୍‌ ନାଗେନ୍ତେ ଏଜ୍ରାରାଃ ବିନ୍ତି

1 ନେ ସବେନ୍‌ କାମି ଚାବାୟାନ୍‌ ତାୟମ୍‌ତେ, ଆଗୁଆଇକ ହିଜୁଃକେଦ୍‌ତେ ଆଇଙ୍ଗ୍‌କେ କାଜିକେଦିଙ୍ଗ୍‌ୟାଁକ, "ଇସ୍ରାଏଲ୍‌ରେନ୍‌ ହଡ଼କ, ଯାଜାକ୍‌କ ଓଡ଼ୋଃ ଲେବୀ ହଡ଼କ ଏଟାଃ ଜାତିରେନ୍‌ ହଡ଼କତାଃଏତେ ଆପାନ୍‌କେ ସାଙ୍ଗିନ୍‌ରେ କା ଦହକେଦ୍‌ତେ କିନାନ୍‌ରେନ୍‌, ହିତ୍ତିୟରେନ୍‌, ପିରିଷିୟ, ଯିବୁଷିୟ, ଅମ୍ମୋନିୟ, ମୋୟାବିୟ, ମିସାର୍‌ରେନ୍‌ ଓଡ଼ୋଃ ଇମୋରିୟରେନ୍‌ ହଡ଼କଆଃ ହିଲାଙ୍ଗ୍‌ଅଃ ଲେକାନ୍‌ କାମିକଏତେ ଆପାନ୍‌କେ କାକ ସାଙ୍ଗିନ୍‌। 2 ଇନ୍‌କୁ ଆକଆଃ ନାଗେନ୍ତେ ଓଡ଼ୋଃ ଆକଆଃ ହନ୍‌କଡ଼ାକଆଃ ନାଗେନ୍ତେ ଏଟାଃ ଜାତିରେନ୍‌ ହନ୍‌କୁଡ଼ିକକେ ଆଣ୍‌ଦିକେଦ୍‌ତେ ଦହକେଦ୍‌କଆକ। ନେ’ଲେକା ଇନ୍‌କୁ ପାବିତାର୍‌ କିଲିକେ ଚାରିଓସାଃରେ ତାଇନ୍‌ତାନ୍‌ ଏଟାଃ ଜାତିକଲଃ ମେସାଗୁଲାକାଦାକ। ନେ କା ପାତିୟାର୍‌ରଃ ଗୁହ୍ନାଁରେ ଆଗୁଆଇକ ଓଡ଼ୋଃ ରାଇଜ୍‌ ଚାଲାଅତାନ୍‌କ ସିଦାକାନା।" 3 ନେଆଁ ଆୟୁମ୍‌କେଦ୍‌ତେ ଆଇଙ୍ଗ୍‌ ତୁସିଙ୍ଗ୍‌କାନ୍‌ ଲିଜାଃ ଚେଚାଃକେଦାଇଙ୍ଗ୍‌, ବହଃ ଓଡ଼ୋଃ ଦାଢ଼ିରାଃ ଉବ୍‌ ଟଟାଃକେଦ୍‌ତେ ଆକ୍‌ଚାକାଅୟାନ୍‌ଲଃ ଦୁବ୍‌ୟାନାଇଙ୍ଗ୍‌। 4 ଦାସିୟଃ ନାଙ୍ଗ୍‌ ତଲ୍‌ ଇଦିକାନ୍‌ ହଡ଼କ ରୁହାଡ଼୍‌କେଦ୍‌ତେ ନେ’ଲେକା କା ପାତିୟାର୍‌ରଃ ଲେକାନ୍‌ କାମିକ ରିକାକେଦ୍‌ ହରାତେ ଇସ୍ରାଏଲ୍‌ରେନ୍‌ ପାର୍‌ମେଶ୍ୱାର୍‌ଆଃ ବାଚାନ୍‌କେ ବରଭାକ୍ତିତାନ୍‌ ହଡ଼କ ଆଇଙ୍ଗ୍‌ତାଃରେ ହୁଣ୍ଡିୟାନାକ। ଓଡ଼ୋଃ ଆଇଙ୍ଗ୍‌ ସିଙ୍ଗିହାସୁରଃ ଦାନ୍‌ ରାକାବ୍‌ ଜାକେଦ୍‌ ଆକ୍‌ଚାକାଅକେଦ୍‌ତେ ଦୁବ୍‌ଗି ତାଇନ୍‌ୟାନାଇଙ୍ଗ୍‌।

5 ସିଙ୍ଗିହାସୁରଃ ଇମ୍‌ତାରାଃ ଦାନ୍‌ ରାକାବ୍‌ ଦିପିଲିରେ ଆଇଙ୍ଗ୍‌ ଏୟମ୍‌ ବାଗିକେଦ୍‌ତେ ବିରିଦ୍‌ୟାନାଇଙ୍ଗ୍‌ ଓଡ଼ୋଃ ଏନ୍‌ ଚେଚାଃ ଲିଜାଃ ତୁସିଙ୍ଗ୍‌କେଦ୍‌ତେ ଇକ୍‌ଡ଼ୁମ୍‌ୟାନ୍‌ଲଃ ଆଇଁୟାଃ ପ୍ରାଭୁ ପାର୍‌ମେଶ୍ୱାର୍‌ତାଃରେ ତିଃଇ ଜିଲିଙ୍ଗ୍‌କେଦ୍‌ତେ ବିନ୍ତିକେଦାଇଙ୍ଗ୍‌, 6 "ହେ ଆଇଁୟାଃ ପାର୍‌ମେଶ୍ୱାର୍‌, ଆଇଙ୍ଗ୍‌ ଗିହୁଃଗାକାନାଇଙ୍ଗ୍‌, ହେ ପାର୍‌ମେଶ୍ୱାର୍‌, ଆଇଙ୍ଗ୍‌ ଆମାଃ ସାଃତେ ନେଲ୍‌ରାକାବ୍‌ କାଇଙ୍ଗ୍‌ ଦାଡ଼ିତାନା, ଚିଆଃଚି ଆଲେୟାଃ ପାପ୍‌ ଗୁହ୍ନାଁକ ଆଲେୟାଃ ବହଃଏତେ ଚେତାନ୍‌ ସିର୍ମା ଟେକାଦ୍‌କାନା। 7 ଆଲେୟାଃ ପୁର୍‌ଖା ହାଡ଼ାମ୍‌କଆଃ ଦିପିଲିଏତେ ତିସିଙ୍ଗ୍‌ ଜାକେଦ୍‌ ଆଲେୟାଃ ସବେନ୍‌କଆଃ ପାପ୍‌ ପୁରାଃଗି ହବାୟାନ୍‌ଗିୟା। ଆଲେୟାଃ ପାପ୍‌ ହରାତେ ତିସିଙ୍ଗ୍‌ ଜାକେଦ୍‌ ଆଲେ, ଆଲେୟାଃ ରାଜା ଓଡ଼ୋଃ ଯାଜାକ୍‌କ ଏଟାଃ ଦିଶୁମ୍‌ରେନ୍‌ ରାଜାକଆଃ ତିଃଇରେ ଜିମାଅଃତାନାଲେ। ଇନ୍‌କୁ ଆଲେକେ ତାରାଉଡ଼ିଲଃ ମାଆଃ ଗଏଃଲେତାନାକ, ରେଃକ୍‌ଲେତାନାକ ଓଡ଼ୋଃ ଦାସିୟଃ ନାଙ୍ଗ୍‌ ତଲ୍‌ ଇଦିଲେତାନାକ। 8 ହେ ଆଲେୟାଃ ପ୍ରାଭୁ ପାର୍‌ମେଶ୍ୱାର୍‌, ମେନ୍‌ଦ ନାହାଁଃ ଆମ୍‌ ଆଲେକେ ସାୟାଦ୍‌ ଏମାକାଦ୍‌ଲେୟାମ୍‌ ଓଡ଼ୋଃ ଚିମିନ୍‌ ଝାନ୍‌କକେ ତନଲ୍‌ଏତେ ରାଡ଼ାକେଦ୍‌ଲଃ ବାଞ୍ଚାଅକେଦ୍‌କଆମ୍‌ ଓଡ଼ୋଃ ଆମାଃ ପାବିତାର୍‌ ଠାୟାଦ୍‌ରେ ଖିଲା ଲେକା ବୁଗିଲେକାମ୍‌ ଦହକାଦ୍‌ଲେୟା। ନେ’ଲେକାତେ ଆମ୍‌ ଆଲେକେ ଦାସିୟଃ ନାଙ୍ଗ୍‌ ତଲ୍‌ ଇଦିକାନ୍‌ତାଃଏତେ ରାଡ଼ାକେଦ୍‌ଲେୟାମ୍‌ ଓଡ଼ୋଃ ନାୱା ଜୀଦାନ୍‌ ଏମାକାଦ୍‌ଲେୟାମ୍‌। 9 ଆଲେ ଏଟାଃକଆଃ ଦାସି ହବାକାନ୍‌ ତାଇକେନ୍‌ରେୟଗି ଆମ୍‌ ଆଲେୟାଃ ପାର୍‌ମେଶ୍ୱାର୍‌ ଆଲେକେ ଦାସିୟଃରାଃ ତନଲ୍‌ରେ କାମ୍‌ ବାଗିକେଦ୍‌ଲେୟା। ମେନ୍‌ଦ ଆମ୍‌ ଆମାଃ ବିନ୍ତିଅଡ଼ାଃ ଆଡଃମିସା ବାଇରୁହାଡ଼୍‌ ନାଙ୍ଗ୍‌, ହାଦୁଡ଼ାକାନ୍‌ ସବେନାଃକେ ବାଇରୁହାଡ଼୍‌ ନାଙ୍ଗ୍‌, ଆଲେକେ ନାୱା ପେଡ଼େଃ ଏମାକାଦ୍‌ଲେୟାମ୍‌ ଏନ୍ତେ ଯିହୁଦା ଓଡ଼ୋଃ ଯୀରୁଶାଲେମ୍‌କେ ବାଞ୍ଚାଅ ନାଙ୍ଗ୍‌ ଓଡ଼ୋଃ ଏନାରେୟାଃ ଚାରିଓସାଃରେ ପାଚ୍‌ରି ଏମ୍‌ ନାଙ୍ଗ୍‌, ଆମ୍‌ ପାରସ୍ୟରେନ୍‌ ରାଜାକଆଃ ହରାତେ ଆଲେକେ ଦାୟାକାଦ୍‌ଲେୟାମ୍‌।

10 "ମେନ୍‌ଦ ହେ ଆଲେୟାଃ ପାର୍‌ମେଶ୍ୱାର୍‌, ନେ ସବେନାଃରାଃ ତାୟମ୍‌ତେ ଆଲେ ଆଡଃଚିନାଃଲେ କାଜିୟା ! ଚିଆଃଚି ଆଲେ ଆମାଃ ଆନ୍‌ଚୁ କାଲେ ମାନାତିଙ୍ଗ୍‌କାଦା। 11 ଆମ୍‌ ଆମାଃ ଦାସି ନାବୀକଆଃ ହରାତେ ନେ’ଲେକାମ୍‌ କାଜିକାଦ୍‌ ତାଇକେନା, ଆପେ ଅକ ଦିଶୁମ୍‌ ଆକ୍‌ତେୟାର୍‌ ନାଙ୍ଗ୍‌ ସେନ୍‌ତାନାପେ, ଏନା ଏଟାଃ ଦିଶୁମ୍‌ରେନ୍‌ ହଡ଼କଆଃ ପାପ୍‌ କାମି ହରାତେ ସତ୍‌ରାକାନ୍‌ ଦିଶୁମ୍‌ ତାନାଃ। ଇନ୍‌କୁଆଃ ହିଲାଙ୍ଗ୍‌ଅଃ ଲେକାନ୍‌ କାମି ହରାତେ ଦିଶୁମ୍‌ ନେ’ସାଃଏତେ ଏଟାଃସାଃ ଜାକେଦ୍‌ ସତ୍‌ରାତେ ପେରେଜାକାନା। 12 ଏନାତେ, ଆପେୟାଃ କୁଡ଼ିହନ୍‌କକେ ଇନ୍‌କୁଆଃ କଡ଼ାହନ୍‌କଲଃ ଆଣ୍‌ଦି ଆଲପେ ଏମ୍‌କଆ, ଚାଏ ଆପେୟାଃ କଡ଼ାହନ୍‌କଆଃ ନାଗେନ୍ତେ ଇନ୍‌କୁଆଃ କୁଡ଼ିହନ୍‌କକେ ଆଣ୍‌ଦିକେଦ୍‌ତେ ଆଲପେ ଆଉକଆ। ଇନ୍‌କୁଆଃ ବୁଗିନାଃ ଚାଏ ପସାଇଦିୟଃ ନାଗେନ୍ତେ ଇନ୍‌କୁକେ ଆଲପେ ଦେଙ୍ଗାକଆ। ତାବ୍‌ଦ ଆପେ ପୁରାଃ ପେଡ଼େଃପେ ନାମେୟା, ଦିଶୁମ୍‌ରାଃ ବୁଗିନ୍‌ ବିଷାଏପେ ଜମେୟାଁ ଓଡ଼ୋଃ ଆପେୟାଃ ହନ୍‌ଗାଁଣାକଆଃ ଆକ୍‌ତେୟାର୍‌ ନାଗେନ୍ତେ ଜାନାଅଗି ଦହ ଦାଡ଼ିୟାପେ। 13 ହେ ଆଲେୟାଃ ପାର୍‌ମେଶ୍ୱାର୍‌, ଆଲେୟାଃ ଏତ୍‌କାନ୍‌ କାମି ଓଡ଼ୋଃ ପୁରାଃ ଗୁହ୍ନାଁ ହରାତେ ଆଲେ ନାଙ୍ଗ୍‌ ନେ ସାଜାଇ ହବାକାନ୍‌ ରେୟ, ଆମ୍‌ ଆଲେୟାଃ ଗୁହ୍ନାଁରେୟାଃ ସାଜାଇ ଲେକା କାମ୍‌ ଏମାକାଦ୍‌ଲେୟା ଓଡ଼ୋଃ ଆଲେକେ ନେ’ଲେକା ବାଞ୍ଚାଅକେଦ୍‌ତେ ଦହକାଦ୍‌ଲେୟାମ୍‌। 14 ନେଆଁ ନେଲ୍‌କେଦ୍‌ତେ, ଆଲେ ଚିଲ୍‌କାତେ ଆଡଃମିସା ଆମାଃ ଆନ୍‌ଚୁ କାଲେ ମାନାତିଙ୍ଗ୍‌ୟାଁଃ ଓଡ଼ୋଃ ହିଲାଙ୍ଗ୍‌ଅଃ ଲେକା କାମିତାନ୍‌ ହଡ଼କଲଃ ଆଣ୍‌ଦିରାଃ ନାତାଲେ ଦହ ଦାଡ଼ିୟା ? ଏନ୍‌ଲେକା ରିକାଲେରେ, ଆମ୍‌ ଚିନାଃ କାମ୍‌ ଖିସ୍‌ଅଃଆ ଓଡ଼ୋଃ ଆଲେକଏତେ ଜେତାଏକେ ହଗି କା ଦହକେଦ୍‌ତେ ସବେନ୍‌କକେ କାମ୍‌ଚି ଜୀଅନ୍‌କଆ ? 15 ହେ ପ୍ରାଭୁ, ଇସ୍ରାଏଲ୍‌ରେନ୍‌ ପାର୍‌ମେଶ୍ୱାର୍‌, ଆମ୍‌ ଧାର୍‌ମାନ୍‌ନିଃ ତାନ୍‌ମେ, ଏନାମେନ୍ତେ ତିସିଙ୍ଗ୍‌ ଆଲେ ବାଞ୍ଚାଅ ନାମ୍‌କେଦ୍‌ତେ ଜୀନିଦ୍‌ ମେନାଲେୟା, କା’ରେଦ ଆଲେୟାଃ ପାପ୍‌ ହରାତେ ଆମାଃ ଆୟାର୍‌ରେ ତିଙ୍ଗୁନ୍‌ ନାଗେନ୍ତେ ହଗି ଆଲେ କାଲେ ଦାଡ଼ିତେୟାଃ।"