ଏଜ୍ରା 4

ବାବାଇ କାମିରେ କାଜିଛେକାଦ୍‌

1 ଦାସିୟଃ ନାଙ୍ଗ୍‌ ତଲ୍‌ ଇଦିକାନ୍‌ ହଡ଼କ ରୁହାଡ଼୍‌କାନାକ ଓଡ଼ୋଃ ଇସ୍ରାଏଲ୍‌ରେନ୍‌ ପ୍ରାଭୁ ପାର୍‌ମେଶ୍ୱାର୍‌ଆଃ ବିନ୍ତିଅଡ଼ାଃ ବାଇତାନାକ ମେନ୍ତେ ଯିହୁଦା ଓଡ଼ୋଃ ବେଞ୍ଜାମିନ୍‌ କିଲିରେନ୍‌ ବାଇରିକ ଆୟୁମ୍‌କେଦା। 2 ଇମ୍‌ତା ଇନ୍‌କୁ ଯେରୁବାବେଲ୍ ଓଡ଼ୋଃ ଇସ୍ରାଏଲ୍‌ରେନ୍‌ ମାପ୍‌ରାଙ୍ଗ୍‌ ହଡ଼କତାଃ ହିଜୁଃକେଦ୍‌ତେ କାଜିକେଦାକ, "ବାବାଇ କାମିରେ ଆଲେ ଆପେକେ ଦେଙ୍ଗାପେୟାଲେ। ଚିଆଃଚି ଆପେ ଲେକା ଆଲେୟଗି ଆପେୟାଃ ପାର୍‌ମେଶ୍ୱାର୍‌ଆଃ ସୁନୁସାର୍‌ ରିକାଃଲେ ଓଡ଼ୋଃ ଆସେରିୟାରେନ୍‌ ରାଜା ଏସାର୍‌ହାଦ୍ଦୋନ୍‌ ଆଲେକେ ନେ ଠାୟାଦ୍‌ତେ ଆଉକାଦ୍‌ଲେ ହୁଲାଙ୍ଗ୍‌ତାଃଏତେ ଆଲେ ପାର୍‌ମେଶ୍ୱାର୍‌ଆଃ ଉଦ୍ଦେଶ୍‌ରେ ଦାଣେଁରାକାବ୍‌ ଆଉତାନାଲେ।"

3 ମେନ୍‌ଦ ଯେରୁବାବେଲ୍, ଯେଶୁୟ ଓଡ଼ୋଃ ଇସ୍ରାଏଲ୍‌ କିଲିରେନ୍‌ ମାପାରାଙ୍ଗ୍‌କ କାଜିରୁହାଡ଼୍‌କେଦାକ, "ପାର୍‌ମେଶ୍ୱାର୍‌ଆଃ ବିନ୍ତିଅଡ଼ାଃ ବାବାଇ କାମିରେ ଆପେୟାଃ ଦେଙ୍ଗା ଆଲେକେ ଲାଗାତିଙ୍ଗ୍‌ ବାନଃଆ। ପାରସ୍ୟରେନ୍‌ ରାଜା କୋରସ୍‌ଆଃ ଆନାଚୁ ଲେକାତେ ଏସ୍‌କାର୍‌ ଆଲେ ଇସ୍ରାଏଲ୍‌ରେନ୍‌ ପ୍ରାଭୁ ପାର୍‌ମେଶ୍ୱାର୍‌ଆଃ ବିନ୍ତିଅଡ଼ାଃ ବାଇୟାଲେ।"

4 ଏନ୍ତେ ଚାରିଓସାଃରେନ୍‌ ହଡ଼କ ଯିହୁଦାରେନ୍‌ ହଡ଼କକେ ବାବାଇ କାମିରେ କାଜି ଛେକାଦ୍‌କେଦ୍‌ତେ ବତଙ୍ଗ୍‌କେଦ୍‌କଆକ। 5 ଇନ୍‌କୁ ପାରସ୍ୟରେନ୍‌ ରାଜା କୋରସ୍‌ଆଃ ରାଇଜ୍‌ ଦିପିଲିଏତେ ପାରସ୍ୟରେନ୍‌ ରାଜା ଦାରିୟାବସ୍‌ଆଃ ରାଇଜ୍‌ ଜାକେଦ୍‌ ଯିହୁଦାରେନ୍‌ ହଡ଼କଆଃ ଉଡ଼ୁଃ ଉହାଟ୍‌ ଲେକା ଆଲକା ହବାଅଃକା ମେନ୍ତେ ଇନ୍‌କୁ ଯିହୁଦାରେନ୍‌ ହଡ଼କଆଃ ବିରୁଧ୍‌ରେ ରଜୋଟ ରିକାତାନ୍‌ ହଡ଼କକେ ନାଲା ଏମ୍‌କେଦ୍‌ତେ ଦହକେଦ୍‌କଆକ।

ଯୀରୁଶାଲେମ୍‌ ବାବାଇ କାମିରେ କାଜିଛେକାଦ୍‌

6 ରାଜା ଅକ୍ଷଶ୍ୱେରଶ୍‌ଆଃ ରାଇଜ୍‌ତାନ୍‌ ଦିପିଲିରାଃ ଏନେଟେଦ୍‌ରେ ଇନ୍‌କୁ ଯିହୁଦା ଓଡ଼ୋଃ ଯୀରୁଶାଲେମ୍‌ରେନ୍‌ ହଡ଼କଆଃ ବିରୁଧ୍‌ରେ ମିଆଁଦ୍‌ କାଜିଛେକାଦ୍‌ରାଃ ଚିଟାଉ ଅଲ୍‌କେଦାକ।

7 ଆଡଃମିସା ପାରସ୍ୟରେନ୍‌ ରାଜା ଅର୍ତ୍ତକ୍ଷସ୍ତଆଃ ରାଇଜ୍‌ତାନ୍‌ ଦିପିଲିରେ ବିଶ୍‌ଲାମ୍‌, ମିତ୍ରଦାତ୍‌, ଟାବେଲ୍‌ ଓଡ଼ୋଃ ଇନ୍‌କୁଆଃ ଗାତିକ ରାଜାରାଃ ହେପାଦ୍‌ତେ ଅରାମିୟ ଜାଗାର୍‌ ଓଡ଼ୋଃ ଅରାମିୟ ଅନଲ୍‌ରାଃ ମିଆଁଦ୍‌ ଚିଟାଉ ଅଲ୍‌କେଦାକ।

8 ଲାଟ୍‌ସାହେବ୍‌ ରେହୁମ୍‌ ଓଡ଼ୋଃ ଅନଲ୍‌ନିଃ ଶିମ୍‌ଶୟ ଯୀରୁଶାଲେମ୍‌ ବିରୁଧ୍‌ରେ ରାଜା ଅର୍ତ୍ତକ୍ଷସ୍ତଆଃ ହେପାଦ୍‌ତେ ମିଆଁଦ୍‌ ଚିଟାଉ ନେ’ଲେକା ଅଲ୍‌କେଦାକିନ୍‌,

9 "ଲାଟ୍‌ସାହେବ୍‌ ରେହୁମ୍‌ ଓଡ଼ୋଃ ଅନଲ୍‌ନିଃ ଶିମ୍‌ଶୟ ଓଡ଼ୋଃ ଇନ୍‌କିନାଃ ଏଟାଃ ସବେନ୍‌ ଗାତିକ ଦିନିୟ ଓଡ଼ୋଃ ଅଫର୍ସ୍ତଖିୟ, ଟର୍ପଲିୟ, ଅଫର୍ସିୟ, ଅର୍କବିୟ, ବାବିଲୋନିୟ, ଶୁଶନିୟ, ଦେହ୍ୱିୟ, ଏଲମିୟ, 10 ଓଡ଼ୋଃ ପୁରାଃ ପେଡ଼େୟାନ୍‌ ମାଇନାନ୍‌ ଆଶୁର୍‌ବାନିପାଲ୍‌ ଅକ ହଡ଼କକେ ଆଉକେଦ୍‌ତେ ଶାମରିୟା ନାଗାର୍‌ରେ ଓଡ଼ୋଃ ଫରାତ୍ ଗାଡା ନାହିଁ ହାନ୍‌ ପାରମ୍‌ରେ ତାଇନ୍‌ଇଚିକାଦ୍‌କ ତାଇକେନା, ଇନ୍‌କୁ ନେ ଚିଟାଉ ଅଲାକାଦ୍‌ ତାଇକେନାକ।"

11 ଇନ୍‌କୁ ଅକ ଚିଟାଉ ଅଲାକାଦ୍‌ ତାଇକେନାକ ଏନା ହବାଅଃତାନା ନେଆଁ,

"ମାଇନାନ୍‌ ଅର୍ତ୍ତକ୍ଷସ୍ତ ରାଜାତାଃ ଫରାତ୍ ଗାଡା ହାନ୍‌ ପାରମ୍‌ରେ ତାଇନ୍‌ତାନ୍‌ ଆମାଃ ଦାସିକଆଃ ଚିଟାଉ,

12 "ମାଇନାନ୍‌, ଆବେନ୍‌ ସାରି ନାଙ୍ଗ୍‌ ଆଲେ ନେଆଁ ଅଲେତାନାଲେ ଯେ, ଆବେନ୍‌ତାଃଏତେ ଆଲେତାଃ ହିଜୁଃକାନ୍‌ ଯିହୁଦି ହଡ଼କ ଯୀରୁଶାଲେମ୍‌ ନାଗାର୍‌ ହିଜୁଃକେଦ୍‌ତେ ଆଡଃମିସା ଏନାକେ ବାଇରୁହାଡ଼େତାନାକ, ନେ ନାଗାର୍‌ ମାପାଃତୁପୁଇଙ୍ଗ୍‌ ଓଡ଼ୋଃ ଏତ୍‌କାନ୍‌ ନାଗାର୍‌ ମେନ୍ତେ ନୁତୁମଃତାନା। ଇନ୍‌କୁ ନାଗାର୍‌ରାଃ ପାଚ୍‌ରି ବାଇରୁହାଡ଼୍‌କେଦ୍‌ତେ ବିନ୍ତିଅଡ଼ାଃରାଃ ନିହିଁଗାଡ଼ାକେ ଜାଲ୍‌ଦିଗି ବାଇଚାବାଏୟାକ। 13 ଆଡଃଗି ମାଇନାନ୍‌, ଆବେନ୍‌ ସାରିନାଙ୍ଗ୍‌ ଉଦୁବ୍‌ତାନାଲେ, ନେ ନାଗାର୍‌ ଓଡ଼ୋଃ ପାଚ୍‌ରି ବାଇରୁହାଡ଼ଃ ରେଦ, ଏନ୍‌ ହଡ଼କ କାର୍‌ ଏମ୍‌ ବାଗିତାଃକ, ଓଡ଼ୋଃ ରାଜାକଆଃ ହାନି ହବାଅଃଆ। 14 ଆଲେ ରାଜାରାଃ ବୁଲୁଙ୍ଗ୍‌ ଜମାଃଲେ ଓଡ଼ୋଃ ମାଇନାନ୍‌ ରାଜାରାଃ ଅପମାନ୍‌ କାଲେ ନେଲ୍‌ ଦାଡ଼ିୟା, ଏନାତେ ଆଲେ ହଡ଼ କୁଲ୍‌କେଦ୍‌ତେ ମାଇନାନ୍‌ ରାଜାକେ ନେଆଁ ଉଦୁବ୍‌କିୟାଲେ। 15 ଆବେନାଃ ପୁର୍‌ଖାହାଡ଼ାମ୍‌କଆଃ ଦହକାନ୍‌ ଅନଲ୍‌ ଦାଣାଁ ନାମଃକା, ଏନାରେ ଆବେନ୍‌ ନେଲ୍‌ ଓଡ଼ୋଃ ସାରି ଦାଡ଼ିୟାବେନ୍‌ ଯେ, ଏନା ମାପାଃତୁପୁଇଙ୍ଗ୍‌ ନାଗାର୍‌ ତାନାଃ। ରାଜାକଆଃ ଓଡ଼ୋଃ ଦିଶୁମ୍‌ରେ ରାଇଜ୍‌ତାନ୍‌ ହଡ଼କଆଃ ନାଙ୍ଗ୍‌ ହାନିୟଃ, ଏତ୍‌କାନ୍‌ନଃ ନାଗାର୍‌ ତାନାଃ, ଇନ୍‌କୁ ସିଦା ଦିପିଲିରେ ପୁରାଃ ଲାପ୍‌ଡ଼ାଇ ତାଇକେନାକ। ଏନାତେ ଏନ୍‌ ନାଗାର୍‌ ଜିୟନ୍‌କାନ୍‌ ତାଇକେନା। 16 ଆଲେ ରାଜାକେ ଉଦୁବିତାନାଲେ ଯେ, ନେ ନାଗାର୍‌ ଆଡଃମିସା ବାଇରୁହାଡ଼୍‌କେଦ୍‌ତେ ଏନାରାଃ ପାଚ୍‌ରି କାମି ଚାବାକେନଃ ରେଦ, ଫରାତ୍‌ ଗାଡ଼ାରାଃ ହାନ୍‌ ପାରମ୍‌ରେନ୍‌ ହଡ଼କଆଃ ଚେତାନ୍‌ରେ ଆବେନାଃ ଆକ୍‌ତେୟାର୍‌ ଓଡ଼ୋଃ କା ତାଇନା।"

17 ରାଜା, ରାଇଜ୍‌ ଚାଲାଅତାନ୍‌ ରେହୁମ୍‌ତାଃ, ଅନଲ୍‌ନିଃ ଶିମ୍‌ଶୟ, ଶାମରିୟା ଓଡ଼ୋଃ ଫରାତ୍‌ ଗାଡ଼ାରାଃ ହାନ୍‌ ପାରମ୍‌ରେନ୍‌ ହଡ଼କତାଃ କାଜିରୁହାଡ଼୍‌କେଦା, ଆପେୟାଃ ବୁଗିନାଃ ହବାଅଃକା,

18 "ଆପେ ଅକ ଚିଟାଉ ଅଲ୍‌ କୁଲ୍‌କାଦ୍‌ ତାଇକେନାପେ, ଏନା ଆଇଁୟାଃ ସାମ୍‌ନାଙ୍ଗ୍‌ରେ ଅନୁବାଦ୍‌କେଦ୍‌ତେ ପାଢ଼ାଅୟାନା। 19 ଆଇଁୟାଃ ଆନାଚୁତେ ଦାଣାଁ ନାମ୍‌ୟାନ୍‌ଲଃ ସାରି ଦାଡ଼ିୟାନା ଯେ, ସିଦା ଦିପିଲିରେ ନେ ନାଗାର୍‌ ରାଜାକଆଃ ବିରୁଧ୍‌ରେ ମାପାଃତୁପୁଇଙ୍ଗ୍‌ ଓଡ଼ୋଃ ଲାଡ଼ାଇ ଏପ୍‌ରାଙ୍ଗ୍‌ତେ ପେରେଃକାନ୍‌ ନାଗାର୍‌ ତାନାଃ। 20 ଓଡ଼ୋଃ ଯୀରୁଶାଲେମ୍‌ରେ ପୁରାଃ ପେଡ଼େୟାନ୍‌ ରାଜାକ ତାଇକେନା। ଇନ୍‌କୁ ଫରାତ୍ ଗାଡ଼ାରାଃ ହାନ୍‌ ପାରମ୍‌ରେ ତାଇକାନ୍‌ ସବେନ୍‌ ପାର୍‌ଗାନ୍‌ରେ ରାଇଜ୍‌ତାନାକ, ଇନ୍‌କୁକେ କାର୍‌ ଓଡ଼ୋଃ ମାଲ୍‌ଗୁଜାରି ଏମଃ ତାଇକେନା। 21 ଏନା ନାଙ୍ଗ୍‌ ଆଇଙ୍ଗ୍‌ତାଃଏତେ ଆନାଚୁ ଆଉରି ନାମେ ଜାକେଦ୍‌ ନେ ହଡ଼କକେ ନାଗାର୍‌ ବାଇ ନାଙ୍ଗ୍‌ ହକାକପେ। 22 ଚିର୍ଗାଲ୍‌କାନ୍‌ ତାଇନ୍‌ପେ, ନେ ବିଷାଏରେ ଆଲପେ ହେଡ଼ାନା। ରାଜାକଆଃ ହାନି ଚିନାଃମେନ୍ତେ ଆଦ୍‌କା ହବାଅଃଆ ?"

23 ରାଜା ଅର୍ତ୍ତକ୍ଷସ୍ତରାଃ ନେ ଚିଟାଉ ପାଢ଼ାଅୟାନ୍‌ଚି, ରେହୁମ୍‌, ଅନଲ୍‌ନିଃ ଶିମ୍‌ଶୟ ଓଡ଼ୋଃ ଇନ୍‌କୁଆଃ ଗାତିକ ଜାଲ୍‌ଦିଗି ଯୀରୁଶାଲେମ୍‌ ସେନ୍‌କେଦ୍‌ତେ ଯିହୁଦିକକେ ବରବତଙ୍ଗ୍‌ କାଜିତାନ୍‌ଲଃ ବାବାଇ କାମି ହକାକେଦାକ।

24 ଏନାମେନ୍ତେ ପାରସ୍ୟ ରାଜା ଦାରିୟାବସ୍‌ଆଃ ରାଇଜ୍‌ତାନ୍‌ ବାର୍‌ ବାରାଷ୍‌ ଜାକେଦ୍‌ ଯୀରୁଶାଲେମ୍‌ରେ ପାର୍‌ମେଶ୍ୱାର୍‌ଆଃ ବିନ୍ତିଅଡ଼ାଃ ବାବାଇ କାମି ହକାକାନ୍‌ ତାଇକେନା।