ଏଜ୍ରାରାଃ ଯୀରୁଶାଲେମ୍ତେ ହିନିଜୁଃ
1 ନେ ସବେନାଃ ହବାୟାନ୍ ତାୟମ୍ତେ, ପାରସ୍ୟରେନ୍ ରାଜା ଅର୍ତ୍ତକ୍ଷସ୍ତଆଃ ରାଇଜ୍ ଦିପିଲିରେ ଏଜ୍ରା ନୁତୁମ୍ ମିଆଁଦ୍ ହଡ଼ ବାବିଲୋନ୍ଏତେ ହିଜୁଃୟାନା। ନେ ସରାୟରାଃ ହନ୍ ଏଜ୍ରା, ଅସରିୟରାଃ ହନ୍ ସରାୟ, ହିଲ୍କିୟରାଃ ହନ୍ ଅସରିୟ, 2 ଶଲ୍ଲୁମ୍ରାଃ ହନ୍ ହିଲ୍କିୟ, ସାଦୋକ୍ରାଃ ହନ୍ ଶଲ୍ଲୁମ୍, ଅହିଟୁବ୍ରାଃ ହନ୍ ସାଦୋକ୍, 3 ଅମାରିୟରାଃ ହନ୍ ଅହିଟୁବ୍, ଅସରିୟରାଃ ହନ୍ ଅମରିୟ, ମରାୟୋତ୍ରାଃ ହନ୍ ଅସରିୟ, 4 ସରହିୟରାଃ ହନ୍ ମରାୟୋତ୍, ଉଷିରାଃ ହନ୍ ସରହିୟ, ବୁକ୍କିରାଃ ହନ୍ ଉଷି, 5 ଅବିଶୁୟରାଃ ହନ୍ ବୁକ୍କି, ଫିନ୍ହସ୍ରାଃ ହନ୍ ଅବିଶୁୟ, ଇଲିୟାଜାର୍ରାଃ ହନ୍ ଫିନ୍ହସ୍, ମାରାଙ୍ଗ୍ ଯାଜାକ୍ ହାରୁନ୍ଆଃ ହନ୍ ଇଲିୟାଜାର୍ ତାଇକେନାଏ।
6 ଏଜ୍ରା ବାବିଲ୍ ହେତେ ହିଜୁଃୟାନା ଓଡ଼ୋଃ ଇନିଃ ପ୍ରାଭୁ ଇସ୍ରାଏଲ୍ରେନ୍ ପାର୍ମେଶ୍ୱାର୍ ମୁଶାକେ ଅକ ଆନ୍ଚୁ ଏମାକାଇ ତାଇକେନାଏ, ଏନାରେନ୍ ମାରାଙ୍ଗ୍ ଇତୁନିଃ ତାଇକେନାଏ। ଇନିଃ ରାଜାକେ ଅକ୍ନାଃ ଆସିକାଇ ତାଇକେନାଏ, ଏନା ଇନିଃକେ ଏମ୍କିୟାଏ, ଚିଆଃଚି ଆୟାଃ ପ୍ରାଭୁ ପାର୍ମେଶ୍ୱାର୍ଆଃ ତିଃଇ ଆୟାଃ ଚେତାନ୍ରେ ତାଇକେନା। 7 ଅର୍ତ୍ତକ୍ଷସ୍ତ ରାଜାରାଃ ଏୟା ବାରାଷ୍ ରାଇଜ୍ତାନ୍ ଦିପିଲିରେ ଯାଜାକ୍, ଲେବୀ ହଡ଼କ, ଦୁରାଙ୍ଗ୍ହଡ଼କ, ଦୁହାର୍ ହରହଡ଼କ ଓଡ଼ୋଃ ବିନ୍ତିଅଡ଼ାଃରାଃ ସୁସାର୍ ହଡ଼କଲଃ ଚିମିନ୍ ଇସ୍ରାଏଲ୍ ହଡ଼କ ହଗି ଏଜ୍ରାଲଃ ହିଜୁଃୟାନାକ। 8 ରାଜାରାଃ ରାଇଜ୍ତାନ୍ ଦିପିଲିରେୟାଃ ଏୟା ବାରାଷ୍ରାଃ ମଣେୟାଁ ମାହିଁନାରେ ଏଜ୍ରା ଯୀରୁଶାଲେମ୍ତେ ସେଟେର୍ୟାନା। 9 ଚିଆଃଚି ଇନିଃ ପାହିଲା ମାହିଁନାରାଃ ପାହିଲା ହୁଲାଙ୍ଗ୍ ବାବିଲୋନ୍ଏତେ ସେନ୍ହରା ନାଙ୍ଗ୍ ଏଟେଦ୍କେଦାଏ। ଇନିଃ ପାର୍ମେଶ୍ୱାର୍ଆଃ ଦେଙ୍ଗାତେ ମଣେୟାଁ ମାହିଁନାରେୟାଃ ପାହିଲା ହୁଲାଙ୍ଗ୍ରେ ଯୀରୁଶାଲେମ୍ତେ ସେଟେର୍ୟାନା। 10 ଚିଆଃଚି ଏଜ୍ରା ପ୍ରାଭୁଆଃ ଆନ୍ଚୁ ପାଢ଼ାଅକେଦ୍ତେ ମାନାତିଙ୍ଗ୍ ରିକାନାଙ୍ଗ୍ ଓଡ଼ୋଃ ଇସ୍ରାଏଲ୍ରେନ୍ ହଡ଼କକେ ଏନ୍ ଆନ୍ଚୁ ଓଡ଼ୋଃ ନିୟାମ୍ ଇତୁକ ନାଙ୍ଗ୍ ଇଛାକାଦ୍ ତାଇକେନାଏ।
ଏଜ୍ରାକେ ଏମାକାଇ ଅର୍ତ୍ତକ୍ଷସ୍ତଆଃ ଚିଟାଉ
11 ଯାଜାକ୍ ଓଡ଼ୋଃ ମାରାଙ୍ଗ୍ ସ୍କୁଲ୍ରେ ଇତୁତାନ୍ ଏଜ୍ରା, ଅକଏଚି ଇସ୍ରାଏଲ୍ ନାଙ୍ଗ୍ ପ୍ରାଭୁ ଏମାକାଦ୍ ଆନ୍ଚୁ ଓଡ଼ୋଃ ନିୟାମ୍ ବିଷାଏରେ ପୁରାଃ ସେଣାଁତାଇକେନା, ଇନିଃକେ ରାଜା ଅର୍ତ୍ତକ୍ଷସ୍ତ ଅକ ଅନଲ୍ ଚିଟାଉ ଏମାକାଇ ତାଇକେନାଏ, ଏନା ହବାଅଃତାନା ନେଆଁ,
12 ରାଜା ଅର୍ତ୍ତକ୍ଷସ୍ତତାଃଏତେ ସିର୍ମାରେନ୍ ପାର୍ମେଶ୍ୱାର୍ଆଃ ଆନ୍ଚୁ ଇତୁନିଃ ଓଡ଼ୋଃ ପକ୍ତାକାନ୍ ଯାଜାକ୍ ଏଜ୍ରା ନାଗେନ୍ତେ,
13 ଆଇଙ୍ଗ୍ ଆଚୁତାନାଇଙ୍ଗ୍, ଆଇଁୟାଃ ରାଇଜ୍ରେ ତାଇନ୍ତାନ୍ ଇସ୍ରାଏଲ୍ ହଡ଼କ ଓଡ଼ୋଃ ଇନ୍କୁଆଃ ଯାଜାକ୍କ ଓଡ଼ୋଃ ଲେବୀ ହଡ଼କ ଆପ୍ନାଃ ଇଛାତେ ସେନ୍ ନାଙ୍ଗ୍ ସାନାଙ୍ଗ୍ତାନ୍ ସବେନ୍କ ଯୀରୁଶାଲେମ୍ତେ ଆମାଃଲଃ ସେନ୍କାକ। 14 ରାଜା ଓଡ଼ୋଃ ଆୟାଃ ଏୟା ଝାନ୍ ବୁଗିନ୍ ହରା ଉଦୁବ୍କ ଆମ୍କେ କୁଲ୍ମେତାନାକ, ଜେ’ଲେକାଚି ଆମାଃ ପାର୍ମେଶ୍ୱାର୍ଆଃ ଅକ ଆନ୍ଚୁ ଆମାଃ ତିଃଇରେ ଜିମାକାନା, ଏନା ଯିହୁଦା ଓଡ଼ୋଃ ଯୀରୁଶାଲେମ୍ରେ ଚିଲ୍କା ମାନାତିଙ୍ଗ୍ତାନାକ ଏନା ସାରିଉରୁମ୍କମ୍। 15 ଯୀରୁଶାଲେମ୍ରେ ଅକ ପାର୍ମେଶ୍ୱାର୍ଆଃ ତାଇନଃ ଠାୟାଦ୍ ମେନାଃ, ଇସ୍ରାଏଲ୍ରେନ୍ ଏନ୍ ପାର୍ମେଶ୍ୱାର୍ଆଃ ଉଦ୍ଦେଶ୍ରେ ରାଜା ଓଡ଼ୋଃ ବୁଗିନ୍ ହରା ଉଦୁବ୍ତାନ୍ ହଡ଼କ ଆପ୍ନାଃ ଇଛାତେ ଅକ ସୋନା ଓଡ଼ୋଃ ରୁପା ଏମାକାଦାକ, ଏନାକେ ଆମ୍ ଆମାଃଲଃ ଇଦିମେ। 16 ନେଆଁ ବାଗିକେଦ୍ତେ ବାବିଲୋନ୍ ପାର୍ଗାନ୍ରେ ଏମେତାନ୍ ସବେନ୍ ସୋନା ରୁପା ଆମାଃଲଃ ଇଦିମେ, ନେଆଁଲଃ ଯୀରୁଶାଲେମ୍ରେ ତାଇନଃତାନ୍ ପାର୍ମେଶ୍ୱାର୍ଆଃ ମାନ୍ଦିର୍ ନାଗେନ୍ତେ ହଡ଼କ ଓଡ଼ୋଃ ଯାଜାକ୍କ ଅକ ଦାନ୍ ଏମେୟାଁକ ଏନ୍ ସବେନାଃ ଇଦିମେ।
17 ଆମ୍ ଏନ୍ ଟାକା ପାଏସାଲଃ ବାଛା, ମିଣ୍ଡି, ମିଣ୍ଡିହନ୍ ଓଡ଼ୋଃ ହିତାଜାଙ୍ଗ୍ରାଃ ଦାନ୍ ଏନ୍ତେ ନୁଁଏରାଃ ଦାନ୍ କିରିଙ୍ଗ୍କେଦ୍ତେ, ଏନ୍ ସବେନାଃକେ ଯୀରୁଶାଲେମ୍ରେ ଆମାଃ ପାର୍ମେଶ୍ୱାର୍ଆଃ ଦାଣେଁରାକାବ୍ ବେଦି ଚେତାନ୍ରେ ଦାନ୍ ରାକାବେମେ। 18 ସାରେଜାକାନ୍ ରୁପା ଓଡ଼ୋଃ ସୋନାକେ, ଆମ୍ ଓଡ଼ୋଃ ଆମାଃ ହାଗାକକେ ଅକ୍ନାଃ ବୁଗିନାଃ ନେଲଃଆ, ଏନା ଆପେୟାଃ ପାର୍ମେଶ୍ୱାର୍ଆଃ ଇଛାସାନାଙ୍ଗ୍ ଲେକା ରିକାଏପେ। 19 ଆମାଃ ପାର୍ମେଶ୍ୱାର୍ଆଃ ମାନ୍ଦିର୍ରେ ସେୱା ରିକାନାଙ୍ଗ୍ ଅକ ଜିନିଷ୍କ ଆମ୍କେ ଏମଃତାନା, ଏନ୍ ସବେନାଃକେ ଯୀରୁଶାଲେମ୍ରେନ୍ ପାର୍ମେଶ୍ୱାର୍ଆଃ ସାମ୍ନାଙ୍ଗ୍ରେ ଜିମାଏମେ। 20 ଆମାଃ ପାର୍ମେଶ୍ୱାର୍ଆଃ ମାନ୍ଦିର୍ଅଡ଼ାଃ ନାଙ୍ଗ୍ ଓଡ଼ୋଃ ଜେତ୍ନାଃ ଲାଗାତିୟାଁଃ, ଏନା ଆମ୍ ରାଜାରାଃ ଭାଣ୍ଡାର୍ ଅଡ଼ାଃଏତେ ଇଦି ଦାଡ଼ିୟାମ୍।
21 ଆଇଙ୍ଗ୍ ରାଜା ଅର୍ତ୍ତକ୍ଷସ୍ତ ଇଉଫ୍ରେଟିସ୍ ନାହିଁରାଃ ହାନ୍ ପାରମ୍ରେ ତାଇନ୍ତାନ୍ ସବେନ୍ ଖାଜାନ୍ଚିକତାଃତେ ନେ’ଲେକା ହୁକୁମ୍ କାଜିକୁଲ୍ ତାନାଇଙ୍ଗ୍, ସିର୍ମାରେନ୍ ପାର୍ମେଶ୍ୱାର୍ଆଃ ଆନ୍ଚୁ ଇତୁକାନ୍ ଯାଜାକ୍ ଏଜ୍ରା, ଅକ୍ନାଃ ଆପେତାଃଏତେ ଆସିପେୟା, ଏନାକେ କା ବିଲାମ୍କେଦ୍ତେ ଏମାଇପେ। 22 ଏନ୍ ସବେନାଃ ୩,୪୦୦ କେଜି ରୁପା, ୧୦,୦୦୦ କେଜି ଗହମ୍, ୨,୦୦୦ ଲିଟର୍ ଦାଖ୍ରାସି, ୨,୦୦୦ ଲିଟର୍ ଅଲିଭ୍ ସୁନୁମ୍ ଓଡ଼ୋଃ ଲାଗାତିଙ୍ଗ୍ ଲେକା ବୁଲୁଙ୍ଗ୍ ଏମାଇପେ। 23 ସିର୍ମାରେନ୍ ପାର୍ମେଶ୍ୱାର୍ ଆୟାଃ ବିନ୍ତିଅଡ଼ାଃ ନାଗେନ୍ତେ ଅକ୍ନାଃ ରିକା ନାଙ୍ଗ୍ କାଜିକାଦାଏ, ଏନ୍ଲେକାଗି ରିକାଏପେ। କା’ରେଦ ରାଜା ଓଡ଼ୋଃ ଆୟାଃ ହନ୍କଆଃ ଚେତାନ୍ରେ ଚିନାଃମେନ୍ତେ ପାର୍ମେଶ୍ୱାର୍ଆଃ ଖିସ୍ ଉୟୁଗଃଆ ? 24 ନେଆଁ ହଗି ଆପେକେ ଉଦୁବଃତାନା, ଜେତା ଯାଜାକ୍, ଲେବୀ, ଦୁରାଙ୍ଗ୍ନିଃ, ଦୁହାର୍ ହରନିଃ ଓଡ଼ୋଃ ବିନ୍ତିଅଡ଼ାଃ ସୁସାର୍ତାନ୍ନିଃ ଚାଏ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ କାମିତାନ୍ ହଡ଼ ଚେତାନ୍ରେ କାର୍, ଚାଏ ଏଟାଃ ଜେତ୍ନାଃ ଏମ୍ ନାଙ୍ଗ୍ ନିୟାମ୍ ଆଲପେ ଦହଏୟା।
25 "ହେ ଏଜ୍ରା, ଆମାଃତାଃରେ ପାର୍ମେଶ୍ୱାର୍ଆଃ ବିଷାଏରେୟାଃ ସେଣାଁ ମେନାଃ, ଏନ୍ଲେକାଗି ଆମ୍ ଫରାତ୍ ଗାଡ଼ାରାଃ ହାନ୍ ପାରମ୍ରେ ତାଇନ୍ତାନ୍ ହଡ଼କକେ, ଅକନ୍କ ଆମାଃ ପାର୍ମେଶ୍ୱାର୍ଆଃ ଆନ୍ଚୁ ଓଡ଼ୋଃ ଆଇନ୍ ସାରିକାଦାକ, ଇନ୍କୁକେ ନ୍ୟାୟ ଏମାକ ନାଙ୍ଗ୍, ରାଇଜ୍ ଚାଲାଅ ତାନ୍କକେ ଓଡ଼ୋଃ ବିଚାର୍ ତାନ୍କକେ ସାଲାକମେ। ଓଡ଼ୋଃ ଜେତାଏ ଆମାଃ ପାର୍ମେଶ୍ୱାର୍ଆଃ ଆନ୍ଚୁ ଓଡ଼ୋଃ ଆଇନ୍ କା ସାରିନିଃକେ ଇତୁଇମେ। 26 ଜେତାଏ ଆମାଃ ପାର୍ମେଶ୍ୱାର୍ଆଃ ଓଡ଼ୋଃ ରାଜାରାଃ ନିୟାମ୍ ମାନାତିଙ୍ଗ୍ କାଏ ରିକାଏୟା, ଇନିଃକେ ସାଜାଇ ଏମଃଆ, ଏନା ହବାଅଃତାନା, ଗନଏଃରାଃ ସାଜାଇ, ନାଗାର୍ଏତେ ହାର୍ଅଡଙ୍ଗ୍ରାଃ ସାଜାଇ, ଖୁର୍ଜିରାଃ ହାନାଟିଙ୍ଗ୍ କା ନାମଃରାଃ ସାଜାଇ ଓଡ଼ୋଃ ଜେହେଲ୍ରେୟାଃ ସାଜାଇ।"
ଏଜ୍ରା ପାର୍ମେଶ୍ୱାର୍କେ ମାନାରାଙ୍ଗ୍କିୟା
27 ଏଜ୍ରା କାଜିକେଦାଏ, "ଆଲେୟାଃ ପୁର୍ଖା ଆପୁକଆଃ ପ୍ରାଭୁ ପାର୍ମେଶ୍ୱାର୍ଆଃ ସାହାରାଅ ହବାଅଃକା। ଇନିଃ ଯୀରୁଶାଲେମ୍ରେନ୍ ପ୍ରାଭୁଆଃ ବିନ୍ତିଅଡ଼ାଃକେ ସିଙ୍ଗ୍ରାଅ ନାଙ୍ଗ୍ ରାଜାରାଃ ମନ୍ସୁରୁଦ୍ରେ ନେ’ଲେକାନ୍ ମନ୍ ଏମ୍କେଦାଏ। 28 ରାଜାରାଃ, ବୁଗିନ୍ ହରା ଉଦୁବ୍ତାନ୍ ଆୟାଃ ହଡ଼କଆଃ ଓଡ଼ୋଃ ଆକ୍ତେୟାର୍ ନାମାକାଦ୍ ହଡ଼କଆଃ ଆୟାର୍ରେ ଆଇଙ୍ଗ୍କେ ଦାୟାକେଦିଙ୍ଗ୍ୟାଁ, ଇନିଃ ଧାଇନ୍ ହବାଅଃକାଏ। ଆଇଁୟାଃ ପ୍ରାଭୁ ପାର୍ମେଶ୍ୱାର୍ଆଃ ତିଃଇ ଆଇଁୟାଃ ଚେତାନ୍ରେ ମେନାଃ ହରାତେ, ଆଇଙ୍ଗ୍ ଇସ୍ରାଏଲ୍ରେନ୍ ଆଗୁଆଇକକେ ହୁଣ୍ଡିକେଦ୍ତେ ଆଇଙ୍ଗ୍ଲଃ ଇଦି ନାଙ୍ଗ୍ ପେଡ଼େଃ ନାମ୍କେଦାଇଙ୍ଗ୍।"
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)