ମାନ୍ଦିର୍ଅଡ଼ାଃରାଃ ବାବାଇ କାମି ଆଡଃମିସା ଏନେଟେଦ୍
1 ଏନ୍ ଦିପିଲିରେ ଯିହୁଦା ଓଡ଼ୋଃ ଯୀରୁଶାଲେମ୍ରେନ୍ ଯିହୁଦି ହଡ଼କତାଃତେ ନାବି ହାଗାୟ ଓଡ଼ୋଃ ଇଦ୍ଦୋରାଃ ହନ୍ ଜିଖରିୟ, ଇସ୍ରାଏଲ୍ରେନ୍ ପାର୍ମେଶ୍ୱାର୍ଆଃ ନୁତୁମ୍ତେ ଆୟାର୍କାଜି କାଜିକେଦାକିନ୍। ଇନ୍କିନାଃ ଚେତାନ୍ରେ ପାର୍ମେଶ୍ୱାର୍ଆଃ ଆତ୍ମା ଆଡ଼୍ଗୁକାନ୍ ତାଇକେନା। 2 ଏନ୍ତେ ଶେଲ୍ଟିୟେଲ୍ରାଃ ହନ୍ ଯେରୁବାବେଲ୍ ଓଡ଼ୋଃ ଯୋଷାଦକ୍ରାଃ ହନ୍ ଯେଶୁୟ ରାସ୍କାକେଦ୍ତେ ଯୀରୁଶାଲେମ୍ରେ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ବାବାଇ କାମି ଆଡଃମିସା କାମି ଏଟେଦ୍କେଦାକିନ୍। ପାର୍ମେଶ୍ୱାର୍ଆଃ ନାବିକ ଇନ୍କିନ୍ଲଃ ତାଇକେଦ୍ତେ ଦେଙ୍ଗାକେଦ୍କିନାକ।
3 ମେନ୍ଦ ଫରାତ୍ ଗାଡ଼ାରାଃ ହାନ୍ ପାରମ୍ରେନ୍ ଲାଟ୍ସାହେବ୍ ତତ୍ତନିୟ, ଶେଥର୍ବୋଜନିୟ ଓଡ଼ୋଃ ଇନ୍କିନାଃ ଗାତିକ ଯୀରୁଶାଲେମ୍ତେ ସେନ୍ୟାନ୍ଲଃ ଇନ୍କୁକେ କୁଲିକେଦ୍କଆକ, "ଅକଏ ଆପେକେ ବିନ୍ତିଅଡ଼ାଃ ଆଡଃମିସା ବାଇ ନାଙ୍ଗ୍ ଓଡ଼ୋଃ ନେ ପାଚ୍ରିରାଃ କାମି ରିକା ଚାବା ନାଙ୍ଗ୍ ଆଚୁକାଦ୍ପେଆ ?" 4 ଇନ୍କୁ ଆଡଃଗି କୁଲିକେଦ୍କଆକ, "ଅକନ୍କ ନେ ଅଡ଼ାଃ ବାଇତାନାକ, ଇନ୍କୁଆଃ ନୁତୁମ୍ ଚିନାଃ ତାନାଃ ?" 5 ମେନ୍ଦ ଯିହୁଦିରେନ୍ ଆଗୁଆଇକଆଃ ଚେତାନ୍ରେ ଇନ୍କୁଆଃ ପାର୍ମେଶ୍ୱାର୍ଆଃ ନାଜେର୍ ତାଇକାନ୍ ହରାତେ ବାଇରିକ ଦାରିୟାବସ୍କେ ନେ କାଜି ଉଦୁବ୍କିଃଲଃ ଆୟାଃତାଃଏତେ ଅନଲ୍ ଚିଟାଉରାଃ କାଜିରୁହାଡ଼୍ ଆଉରି ଆଉ ସେଟେର୍ ଜାକେଦ୍ କାମି କାକ ହକା ଦାଡ଼ିୟାନା।
ଦାରିୟାବସ୍ ରାଜାତାଃ ତତ୍ତନୟରାଃ ଚିଟାଉ
6 ଫରାତ୍ ଗାଡା ହାନ୍ ପାରମ୍ରେନ୍ ଲାଟ୍ସାହେବ୍ ତତ୍ତନିୟ, ଶେଥର୍ବୋଜନିୟ ଓଡ଼ୋଃ ଆୟାଃ ଗାତିକ ରାଜା ଦାରିୟାବସ୍ତାଃତେ ଚିଟାଉ ଅଲାକାଦ୍ ତାଇକେନାକ,
7 ଇନ୍କୁ ନେ’ଲେକା ଅଲାକାଦ୍ ତାଇକେନାକ, "ହେ ମାଇନାନ୍ ଦାରିୟାବସ୍ ଆମାଃ ଜୀଉସୁକୁ ହବାଅଃକା।
8 "ରାଜା ସାରିକା ମେନ୍ତେ ଆଲେ ନେ କାଜି ଉଦୁବ୍ତାନାଲେ ଯେ, ଆଲେ ଯିହୁଦା ପାର୍ଗାନ୍ରେୟାଃ ମାରାଙ୍ଗ୍ ପାର୍ମେଶ୍ୱାର୍ଆଃ ବିନ୍ତିଅଡ଼ାଃତେ ସେନ୍କେନାଲେ। ଏନା ମାପ୍ରାଙ୍ଗ୍ ଦିରିତେ ବାଇୟଃତାନା ଓଡ଼ୋଃ ଭିତ୍କରେ ଦାରୁରାଃ ଉରା ଦୁବ୍ବଃତାନା। ନେ କାମି ପୁରାଃ ରାସ୍କା ଓଡ଼ୋଃ ବୁଗିଲେକା କାମିୟଃତାନା।
9 "ଆଲେ ଇନ୍କୁଆଃ ଆଗୁଆଇକକେ କୁଲିକେଦ୍କଆଲେ, ‘ଅକଏ ଆପେକେ ବିନ୍ତିଅଡ଼ାଃ ବାଇ ନାଙ୍ଗ୍ ଓଡ଼ୋଃ ପାଚ୍ରି କାମି ପୁରାନାଙ୍ଗ୍ ଅକଏ ଆଚୁକାଦ୍ପେୟା ?’ 10 ଆବେନାଃ ସାରି ନାଗେନ୍ତେ ଆଲେ ଇନ୍କୁଆଃ ଆଗୁଆଇକଆଃ ନୁତୁମ୍ ହଗି ଆସିକେଦ୍କଆଲେ।
11 "ମେନ୍ଦ ଇନ୍କୁ ଆଲେକେ ନେ’ଲେକା କାଜିରୁହାଡ଼୍ କେଦ୍ଲେୟାକ, ‘ଆଲେ ସିର୍ମାଦିଶୁମ୍ ଓଡ଼ୋଃ ଅତେରେନ୍ ପାର୍ମେଶ୍ୱାର୍ଆଃ ଦାସିକତାନ୍ଲେ। ଆଲେ ନେ ଅକ ମାନ୍ଦିର୍ଅଡ଼ାଃ ଆଡଃମିସା ବାଇରୁହାଡ଼୍ତାନାଲେ, ଏନା ପୁରାଃ ଦିପିଲିଏତେ ବାଇୟାକାନ୍ ତାଇକେନା, ଇସ୍ରାଏଲ୍ରେନ୍ ମିଆଁଦ୍ ପେଡ଼େୟାନ୍ ରାଜା ଏନାକେ ବାଇ ଚାବାକାଦ୍ ତାଇକେନା। 12 ମେନ୍ଦ ଆଲେୟାଃ ପୁର୍ଖାହାଡ଼ାମ୍କ ସିର୍ମାଦିଶୁମ୍ରେନ୍ ପାର୍ମେଶ୍ୱାର୍କେ ଖିସ୍ ରିକାକିୟାକ, ଏନାତେ ଇନିଃ ବାବିଲୋନ୍ରେନ୍ କଲ୍ଦିୟ ରାଜା ନେବୁଖଦ୍ନେଜର୍ଆଃ ତିଃଇରେ ଇନ୍କୁକେ ଜିମାକେଦ୍କଆ ଓଡ଼ୋଃ ଏନ୍ ରାଜା ବିନ୍ତିଅଡ଼ାଃକେ ଜିୟନ୍କେଦା, ଏନ୍ତେ ହଡ଼କକେ ଦାସିୟଃ ନାଙ୍ଗ୍ ବାବିଲୋନ୍ତେ ଇଦିକେଦ୍କଆ। 13 ମେନ୍ଦ ବାବିଲୋନ୍ରେନ୍ ରାଜା ସାଇରସ୍ଆଃ ରାଇଜ୍ତାନ୍ ଦିପିଲିରାଃ ପାହିଲା ବାରାଷ୍ରେ ରାଜା ସାଇରସ୍, ପାର୍ମେଶ୍ୱାର୍ଆଃ ନେ ବିନ୍ତିଅଡ଼ାଃକେ ଆଡଃମିସା ବାଇରୁହାଡ଼୍ ନାଙ୍ଗ୍ ଆଚୁକେଦାଏ। 14 ଆଡଃଗି ନେବୁଖଦ୍ନେଜର୍ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରାଃ ଅକ ସୋନା ରୁପାରାଃ ଜିନିଷ୍କ ଯୀରୁଶାଲେମ୍ରେୟାଃ ବିନ୍ତିଅଡ଼ାଃଏତେ ବାବିଲୋନ୍ରାଃ ମାନ୍ଦିର୍ତେ ଇଦିକାଦ୍ ତାଇକେନା, ଏନ୍ ସବେନାଃକେ ରାଜା ସାଇରସ୍ ମାନ୍ଦିର୍ଏତେ ଅଡଙ୍ଗ୍ ଇଚିକେଦ୍କଆ ଓଡ଼ୋଃ ଶେଶବଜର୍ଆଃ ତିଃଇରେ ଏମ୍କେଦା। ନେ ଶେଶବଜର୍ ଇନିୟାଃ ହରାତେ ଯିହୁଦାରେନ୍ ଲାଟ୍ସାହେବ୍ ଲେକାଏ ସାଲାକାନ୍ ତାଇକେନା।’" 15 ରାଜା ଇନିଃକେ କାଜିକିୟା, "ନେ ସବେନ୍ ଜିନିଷ୍କକେ ଇଦିକେଦ୍ତେ ଯୀରୁଶାଲେମ୍ରେୟାଃ ପାର୍ମେଶ୍ୱାର୍ଆଃ ଅଡ଼ାଃରେ ଦହଏମେ ଓଡ଼ୋଃ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ସିଦାରେୟାଃ ନିହିଁଗାଡ଼ାରେଗି ବାଇୟଃକା। 16 ଏନ୍ତେ ଶେଶବଜର୍ ଯୀରୁଶାଲେମ୍ ହିଜୁଃକେଦ୍ତେ ପାର୍ମେଶ୍ୱାର୍ଆଃ ବିନ୍ତିଅଡ଼ାଃରାଃ ନିହିଁଗାଡ଼ା ବାଇକେଦା ଓଡ଼ୋଃ ଏନ୍ ହୁଲାଙ୍ଗ୍ତାଃଏତେ ନାହାଁଃ ଜାକେଦ୍ ବାଇୟଃତାନା, ଏନ୍ରେୟ କା ବାଇ ଚାବାକାନା।
17 "ଏନାତେ ରାଜା ନାହାଁଃ ସୁକୁଃତାନ୍ ରେଦ, ଯୀରୁଶାଲେମ୍ରେ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ଆଡଃମିସା ବାଇୟଃକା ମେନ୍ତେ ରାଜା ସାଇରସ୍ ଆଚୁକାଦ୍ ତାଇକେନାଏ ଚି କାହା, ଏନା ବାବିଲୋନ୍ରେନ୍ ରାଜାରାଃ ଖୁର୍ଜିଅଡ଼ାଃରେ ଦାଣାଁ ନାମଃକା ମେନ୍ତେ ଆଚୁଇକା। ଓଡ଼ୋଃ ନେ ବିଷାଏରେ ରାଜାରାଃ ଇଛାସାନାଙ୍ଗ୍ ଆଲେକେ ଉଦୁବଃକା।"
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)