1 Ko e ngaahi lea fakatātā ʻa Solomone ko e foha ʻo Tevita, ko e tuʻi ʻo ʻIsileli;

2 Ke ʻilo ai ʻae poto mo e akonaki;

pea ongoʻi ʻae ngaahi lea ʻoe faʻa ʻilo;

3 Ke maʻu ʻae akonaki ʻoe poto,

mo e angatonu, mo e fakamaau, pea mo e fai totonu;

4 Ke foaki ʻae ʻiloʻilo ki he taʻepoto,

pea ki he tangata talavou ʻae ʻilo mo e faʻa fakakaukau.

5 ‌ʻE fie fanongo ʻe he tangata poto, pea ʻe tupulekina ai a ʻene poto;

pea ʻe maʻu ai ʻe he tangata faʻa ʻilo ʻae ngaahi fakakaukau lelei:

6 Ke ʻiloʻi ʻae lea fakatātā, pea mo hono fakamatala;

ʻae ngaahi lea ʻae poto, mo ʻenau ngaahi tala ʻilongataʻa.

7 Ko e manavahē kia Sihova ko e kamataʻanga ia ʻoe ʻilo:

ka ʻoku fehiʻa ʻae vale ki he poto mo e akonaki.