1 ‌ʻOku ongoʻi ʻe he foha ʻoku poto ʻae akonaki ʻa ʻene tamai:

ka ʻoku ʻikai ke maʻu ʻae valoki ʻe he faʻa manuki.

2 ‌ʻE kai ʻe he tangata ʻae lelei ʻi he fua ʻo hono ngutu:

ka ʻe hoko ʻae fakamālohi ki he laumālie ʻoe kakai fai kovi.

3 Ko ia ʻoku vakai ki hono ngutu, ʻoku tauhi ʻe ia ʻene moʻui:

ka ʻe hoko ʻae fakaʻauha kiate ia ʻoku fakamanga lahi hono loungutu.

4 ‌ʻOku holi ʻae laumālie ʻoe fakapikopiko, ka ʻoku ʻikai te ne maʻu ha meʻa:

ka ʻe fafangaʻi ʻae laumālie ʻoe faʻa ngāue.

5 ‌ʻOku fehiʻa ki he loi ʻae tangata māʻoniʻoni:

ka ko e tangata angahala ko e fakalielia ia, pea ʻoku hoko ia ʻo mā.

6 ‌ʻOku fokotuʻumaʻu ʻi hono hala ʻe he māʻoniʻoni ʻaia ʻoku angatonu;

ka ʻoku tulaki hifo ʻe he kovi ʻaia ʻoku angahala.

7 ‌ʻOku ai ʻaia ʻoku ne fakamaʻumeʻaʻi ia, ka ʻoku ne masiva pe:

pea ʻoku ai ʻaia ʻoku ne fakamasivaʻi ia, ka ʻoku maʻu ʻe ia ʻae koloa lahi.

8 Ko e koloa ʻae tangata ko e huhuʻi ia ʻo ʻene moʻui:

ka ʻoku ʻikai fanongo ki he valoki ʻae masiva.

9 ‌ʻOku fiefia ʻae maama ʻoe māʻoniʻoni ka ʻe tāmateʻi ʻae maama ʻoe angahala.

10 ‌ʻOku tupu pe ʻi he fielahi ʻae fekeʻikeʻi:

ka ʻoku maʻu ʻae poto ʻekinautolu kuo akonakiʻi lelei.

11 Ko e koloa ʻoku maʻu ʻi he vikiviki ʻe fakaʻaʻau ia ke ʻosi:

ka ʻe fakalahi ia kiate ia ʻoku tānaki ʻi he faʻa ngāue.

12 ‌ʻOku pongia ʻae loto ʻi he ʻamanaki ʻoku tuai ʻene hoko:

pea ka hoko mai ʻaia ʻoku holi ki ai, ʻoku hangē ia ko e ʻakau ʻoe moʻui.

13 ‌ʻE fakaʻauha ia ʻaia ʻoku fehiʻa ki he folofola:

ka ʻe fiemālie pe ia ʻaia ʻoku manavahē ki he fekau.

14 Ko e fono ʻae poto ko e matavai ia ʻoe moʻui,

ke tau hao ai mei he ngaahi tauhele ʻoe mate.

15 ‌ʻOku tupu mei he fakakaukau lelei ʻae ʻofa:

ka ʻoku faingataʻa ʻae hala ʻoe kakai angahala.

16 ‌ʻOku faʻa kau ki he ʻilo ʻae tangata fakapotopoto:

ka ʻoku fakahā pe ʻe he vale ʻa ʻene vale.

17 ‌ʻOku tō ki he kovi ʻae talafekau angakovi:

ka ko e fakamoʻui ʻae talafekau ʻoku angatonu.

18 ‌ʻE hoko ʻae masiva mo e mā kiate ia ʻoku ne tekeʻi ʻae akonaki:

ka ʻe hakeakiʻi ia ʻaia ʻoku tokanga ki he valoki.

19 ‌ʻOku huʻamelie ki he laumālie ʻae hoko mai ʻoe meʻa ʻoku tau holi ki ai:

ka ko e meʻa fakalielia ki he vale ʻae tafoki mei he kovi.

20 Ko ia ʻoku ʻaʻeva fakataha mo e kakai poto ʻe poto ai ia:

ka ʻe fakaʻauha ia ʻoku kaumeʻa mo e kakai vale.

21 ‌ʻOku tulia ʻae kau angahala ʻe he kovi:

ka ʻe toe totongi ʻaki ʻae lelei kiate kinautolu ʻoku māʻoniʻoni.

22 ‌ʻOku tuku ʻae tofiʻa ʻe he tangata angalelei ki he fānau ʻa ʻene fānau:

ka ko e koloa ʻae angahala kuo tānaki maʻa e kakai angatonu.

23 ‌ʻOku ai ʻae meʻakai lahi ʻi he faʻa keli ʻae masiva:

ka ʻoku ai ʻoku maumauʻi ko e meʻa ʻi he masiva poto.

24 Ko ia ʻoku ne taʻofi ʻene meʻa kinikinisi ʻoku ne fehiʻa ki hono foha:

ka ko ia ʻoku ʻofa ki ai ʻoku ne tautea ia ʻoka ʻaonga ke fai.

25 ‌ʻOku kai ʻe he māʻoniʻoni ke fakamākona hono laumālie:

ka ʻe fiekaia ʻae kete ʻoe angahala.