1 ‌ʻOku langa hake hono fale ʻe he fefine kotoa pē ʻoku poto:

ka ʻoku holoki hifo ia ʻe he vale ʻaki hono nima.

2 Ko ia ʻoku ʻeveʻeva ʻi heʻene angatonu ʻoku manavahē ia kia Sihova:

ka ko ia ʻoku pikopiko ʻi hono ngaahi hala ʻoku ne fehiʻa kiate ia.

3 ‌ʻOku ai ʻae vaʻa ʻoe laukau ʻi he ngutu ʻoe vale:

ka ʻoku fakamoʻui ʻae poto ʻe honau loungutu.

4 ‌ʻI he potu ʻoku ʻikai ai ha fanga pulu ʻoku maʻa ai ʻae ʻaiʻanga kai:

ka ʻoku ai ʻae tupu lahi ʻi he mālohi ʻoe pulu.

5 ‌ʻE ʻikai faʻa loi ʻae fakamoʻoni angatonu:

ka ʻe lea loi pe ʻae fakamoʻoni loi.

6 ‌ʻOku kumi ʻae poto ʻe he manuki, ka ʻoku ʻikai te ne ʻilo ia:

ka ʻoku maʻungofua ʻae poto kiate ia ʻoku fakakaukau.

7 ‌ʻAlu atu mei he ʻao ʻoe tangata vale,

ʻoka ke ka mamata ʻoku ʻikai ʻiate ia ʻae loungutu ʻoe poto.

8 Ko e poto eni ʻae fakamākukanga ke ne ʻilo pe hono hala:

ka ko e vaʻinga ʻae vale ko e kākā ia.

9 ‌ʻOku manukiʻi ʻae angahala ʻe he kakai vale:

ka ʻoku ai ʻae lelei ʻi he haʻohaʻonga ʻoe māʻoniʻoni.

10 ‌ʻOku ʻilo ʻe he loto ʻa ʻene mamahi ʻaʻana:

pea ʻoku ʻikai ke kau ha taha kehe ʻi heʻene fiefia.

11 ‌ʻE holoki hifo ʻae fale ʻoe angahala:

ka ʻe maʻu pe ʻae lelei ʻi he fale fehikitaki ʻoe angatonu.

12 ‌ʻOku ai ʻae hala ʻoku matamata totonu ki he tangata,

ka ko hono ngataʻanga ko e ngaahi hala ʻoe mate.

13 ‌ʻI he lolotonga ʻae kata, ʻoku mamahi ai ʻae loto:

pea ko e ikuʻanga ʻoe vākē ko ia ko e māfasia.

14 ‌ʻE fakafonu ʻaia ʻoku fakaholomui ʻi loto ʻaki hono ngaahi hala ʻoʻona:

pea ʻe mākona ʻae tangata angalelei meiate ia pe.

15 ‌ʻOku tui ʻe he taʻepoto ki he lea kotoa pē:

ka ʻoku tokanga lahi ʻaia ʻoku anga fakapotopoto ki heʻene ʻalu.

16 ‌ʻOku manavahē ʻae tangata poto, ʻo ne fakamamaʻo mei he kovi:

ka ʻoku fakalili ʻae vale, mo faʻa polepole.

17 ‌ʻOku fai vale ia ʻaia ʻoku ʻita vave:

pea ʻoku tupu ʻae fehiʻa ki he tangata ʻoku filioʻi kovi.

18 ‌ʻOku maʻu ʻe he fakavalevale ʻae vale:

ka ʻoku tatā ʻaki ʻae poto ʻaia ʻoku fakamākukanga.

19 ‌ʻOku punou ʻae angakovi ʻi he ʻao ʻoe angalelei:

pea mo e angahala ʻi he matapā ʻoe māʻoniʻoni.

20 ‌ʻOku fehiʻanekina ʻae tangata masiva ʻe hono kaungāʻapi:

ka ʻoku toko lahi ʻakinautolu ʻoku ʻofa ki he koloaʻia.

21 Ko ia ʻoku fehiʻa ki hono kaungāʻapi ko e fai hala ia:

ka ʻoku monūʻia ia ʻaia ʻoku angaʻofa ki he masiva.

22 ‌ʻIkai ʻoku hē ʻakinautolu ʻoku filioʻi kovi?

Ka ʻe ʻoe kakai ʻoku filioʻi lelei ʻae ʻaloʻofa mo e moʻoni.

23 ‌ʻOku ai hono ʻaonga ʻoe ngāue kotoa pē:

ka ko e faʻa lea ʻae loungutu ʻoku tupu ai ʻae masiva.

24 Ko e koloa ʻae poto ko honau tatā ia:

ka ko e fai vale ʻae vale ko honau vale ia.

25 ‌ʻOku fakamoʻui ʻae ngaahi laumālie ʻe he fakamoʻoni ʻoku moʻoni:

ka ʻoku lea ʻaki ʻae loi ʻe he fakamoʻoni loi.

26 ‌ʻOku ai ʻae falala mālohi ʻi he manavahē kia Sihova:

pea ʻe maʻu ʻe heʻene fānau ʻae potu hūfanga.

27 Ko e manavahē kia Sihova ko e matavai ia ʻoe moʻui,

ke tau hao ai mei he ngaahi tauhele ʻoe mate.

28 ‌ʻOku ongoongo lahi ha tuʻi ʻi he toko lahi ʻo hono kakai:

ka ko e masiva kakai ko e vaivaiʻanga ia ʻoe houʻeiki.

29 ‌ʻOku poto lahi ia ʻaia ʻoku fakatuotuai ʻene ʻita:

ka ko ia ʻoku ʻoho vave hono loto ʻoku fakahikihiki ʻe ia ʻae vale.

30 Ko e loto angamalū ko e moʻui ia ʻae kakano:

ka koe meheka koe fakapopo ia ʻoe ngaahi hui.

31 Ko ia ʻoku fakamālohiʻi ʻae masiva ʻoku manukiʻi ʻe ia ʻa hono Tupuʻanga:

ka ko ia ʻoku fakaʻapaʻapa kiate ia, ʻoku angaʻofa ia ki he masiva.

32 ‌ʻOku kapusi atu ʻae angakovi ʻi heʻene angahala:

ka ʻoku maʻu ʻe he māʻoniʻoni ʻae ʻamanaki lelei ʻi heʻene mate.

33 ‌ʻOku nofo ʻae poto ʻi he loto ʻo ia ʻoku maʻu ʻae faʻa ʻilo:

ka ʻoku fakahā mai ʻaia ʻoku ʻi he loto ʻoe kakai vale.

34 ‌ʻOku hiki hake ʻe he māʻoniʻoni ʻae puleʻanga.

ka ko e meʻa fakamā ʻae angahala ki he ngaahi puleʻanga.

35 ‌ʻOku ʻofeina ʻe he tuʻi ʻae tamaioʻeiki ʻoku poto:

ka ʻoku houhau ia kiate ia ʻoku tupu mei ai ʻae mā.