1 Guentó, niduheñu, busentiwa wabahüdagun hun luagu lareini Bungiu houn tílana sun ligilisi burí to lóubawaguboun Masedónia. 2 Lau sun aban lan óunwenbu óuchawaguni lun hafiñen lénrengunga le hadarirubei, gúndaatiña buidu; ani lau sun gudeme hamá, rúhaña lidan híderawagun ha gudemebaña Herusalén kamá hamuga rísitiña. 3 Gefentina luagu ru hamaali lan sun le hayaraabei lau sun taruman hanigi, ru hagía sügǘ lau le yebe hayaraabei. 4 Ayumuraguatiña saragu woun lun wígiruniña lun híchuguni hafaran lidan híderawaguniwa iduheñu luéigiñe Hesukrístu. 5 Adügatiña sügǘ lau le yebe wagurabubei hadügün; furumiñe, aba hederegeragun houngua le gumuti lun Wabureme Hesukrístu, lárigiñe aba hederegeragun houngua woun, keisi lugundan Bungiu. 6 Wéiriti habusenrun híchugun, darí lun wayumuragun lun Titu le meha agumeserubalin wadagimanu le hidan lun lasigirun óundaraguagüdei idewesei lánina ínsiñeni le haganagua. 7 Huguya ubaraübei lidan sun katei —lidan hafiñen, lidan hisubudin luagu Lererun Bungiu luma hubafu lun harufudahani furangu houn amu, lidan habusenrun heseriwidun lun Kristu, luma lidan ínsiñehabuni woun —lunti lubeiti giñe ubaraü humá lidan ídehani le.

8 Mama nariñaguñein le hun kei aban gumadi; busenrügütina hasubudiruni hayumahan ha híbiri lun hídehaba lan, lun gayaraabei lan giñe harufuduni hínsiñehabu lau híchugun tau sun hanigi kei hagía. 9 Haritagua humá luagu lareini Wabureme Hesukrístu woun: Lau sun risi lan; aba lagudemedun luagu wafulesein, lun gayaraabei lan wayabin lun warisidun lídangiñe lugudemen.

10 Luagu hufulesein nariñagei naritagun hun luagu katei le: Gumesetün buidu lidan irumu le ásügürübei, mámarügü lau hatatirun óundaraguagüda idewesei, adüga humuti giñe tau sun hanigi. 11 Guentó lubeiti, ítarameme humá darí hagumuchuni wadagimanu, laumeme ugundani le meha huágubei lúmagiñe furumiñeti, íchigeina según le húmati. 12 Lugundun anhein íchiga aban gürigia sun le liyaraati según le lúmabei, lau sun lugundan, gúndaati Bungiu lau, ani resibi lumuti le líchugubei gürigia ligia; mamuriahan lumuti Bungiu le úati hama gürigia.

13 Mama lun háfagun mégeiguaü ladüga híderagun amu; le busenwabei, lun ua hamá mégeihabutiña haganagua. 14 Guentó, anihein huma lun hasuturuni le hemegeirubei amu; lídanme amu dan, aniheinbei hama lun hasuturuni le hemegeirubei. Ítara luba ñein lan úarani, 15 kei tariñagun Lererun Bungiu: «Mígiraguntu luma le gíbebei abudun, malouguan tuguya luma le míbebei abudun».

16 Teinki numuti Bungiu luagu líchuguni aritagunimeme le líchugubei nidoun tidoun lanigi Titu lun líderagunün. 17 Gúndaati Titu lunya lidin arihaün kei namuriahani luma; ani afiñetina luagu weiri lan labusenrun lunya larihinün darí lun léibuga lan arihaün lau lugundan.

18 Úara luma Titu, wóunahaña aban iduhei le uágubei buidu lan hadimurehan tílana sun ligilisi, luagu lubuidun luadigimari lun laburuchagun uganu luagu Wasalbaragüle. 19 Ani mámarügü lira, anúadira hamuti giñe tílana burí ligilisi iduhei ligía lun ladügün wéiyaasu wama lun lídehan lidan loundarúniwa idewesei. Wadügüñein wadagimanu le, le lánina ídehani, lun wíchugun uéiriguni lun Bungiu, lun giñe warufuduni luagu busén hamá afiñetiña lun híderaguniña haduheñu. 20 Waranseruñein sun katei lebei lun míchugun wamá lúgaaru lun wachurawagúniwa luéigiñe loundarún idewesei le wadügübei. 21 Wáfaaguña lun wadügüni sun katei lau arumani, mámarügü ligibugiñe Wabureme, hagibugiñe giñe gürigia.

22 Wóunahaña giñe ábanya hádangiñe waduheñu luma Titu luma le aban. Wügüri le, arufuda láalibei lueirin labusenrun leseriwidun lun Kristu woun lidan saragu luwuyeri, guentotima lau óunwenbu afiñeni le luágubei luagu híchuguba lan saragu idewesei lau sun hugundan. 23 Le álügüdahati libügürü Titu, ariñaga humá lun luagu nupaaná lan, luagu luadigimariña lan numa lun weseriwidun hun. Ánhaña álügüdaha habügürü bián iduheñu luéigiñe Hesukrístu ha lúmabaña, hariñagame houn luagu hóunahan lan tílana burí ligilisi, luagu híchuguña lan uéiriguni lun Kristu. 24 Ítara liña lubeiti, resibi humaña lau aban ínsiñeni le tímatimaati lun gayaraabei lan harihini wügüriña hagía luagu inarüni lan lubuidun wererun huagu, ani lun giñe hasubudirun sun híbiri tílana burí ligilisi luagu ínsiñehabuni le huágubei hádangiñe wügüriña hagía.