1 Luagu loundarúniwa idewesei houn iduheñu lidan afiñeni, memegeirunti lun nabürühan hun, 2 lugundun subudi naali lubuidun hugundan lun hídehan. Súnwandan nariñagun houn lóubawaguna Masedónia lau ugundani luagu aranseñu hiña lan huguya Akayana lun hídehan lúmagiñe lidan irumu le sügühalibei, ani hiibe-agei Masedóniana ragühaña giñe gurasu lau haganbun luagu lueirin háfaagun luagu ídehani le. 3 Ligía lubeiti nóunahañanu iduheñu ha, lun merede nan wuriba lidan nanaagun nungua dan le nayanuhan huagu, lunti lubeiti aranseñu humá; 4 ñǘdündügü hañéin hádangiñe Masedóniana numa, hadariraünme maranserunga. Líchuguña hamuga lira busiganu woun, húntima, lárigiñe ru wamaali lan saragu wafiñen huagu. 5 Ligía naritagunbei namuriahan hama iduheñu ha lun houdin bisidaün nubaragiñe, lun giñe híderagunün óustaragüdei idewesei le füramase hubéi. Ítara, aranseñu luba idewesei le hóundarubei lun harufuduni hareini, mama kei aban katei le lauti arügüreni.

6 Haritagua humá luagu katei le: Le lóuguati lábunagun, lóuguabei giñe lalubahan; le gíbeti lábunagun, gíbebei giñe lalubahan. 7 Lunti líchugun kada aban hídangiñe, keisi lasandiruni tidan lanigi; mama lau magundani ni ladüga lariñawagún hun lun híchugun, lugundun hínsiñehabuti Bungiu lun le íchugubei lau ugundani. 8 Gayaraati líchugun Bungiu sun luwuyeri abiniruni hun, lun ñein lan le habusenrubei huma súnwandan lun habagaridun, ñein ligíame giñe saragu huma lun hídehan lidan sun katei buiti. 9 Tariñahare Lererun Bungiu:

Edewehati saragu houn gudemetiña,

areidati lun súnwandan.

10 Bungiu, le íchugubalin ilaü lun ábunaguti tuma fein lun leigin, líchuguba giñe hun lun gayaraabei lan hedewehan saragu houn gudemetiña kéisigubeirügü ilaü le abunúbei. Ábame laweiridagüdüni Bungiu murusun fulesei le hadügübei houn, darime lun habihin óunwenbu abiniruni lúmagiñe Bungiu keisi aban óunwenbu alubahani. 11 Ítara luba gama humá sun luwuyerigu irisini ani gayaraabei híchugun lau tubuidun anigi, ani danme le heresibiruni waduheñu idewesei le lunbei hóunahani houn wama, wéiribei heteingiruni Bungiu. 12 Lugundun lau wíchuguni ídemuei le houn waduheñu, mama wíchigarügüñein idewesei le hemegeirun houn, wadügüña giñe lun híchugun saragu eteingiruni lun Bungiu lau lira. 13 Híchuguba uéiriguni lun Bungiu lugundun arufuda lumuti ídehani le houn luagu adüga humani le lubeibei Kristu; híchuguba giñe uéiriguni lun Bungiu luagu íderawaguni le híchugubei houn luma houn súngubei. 14 Ábame hafurieidun huagu lau saragu ínsiñehabuni hun luagu lueirin lareini Bungiu le larufudubei hídangiñe. 15 Teinki waña lun Bungiu, luagu rúhali lan aban óunwenbu idewesei woun le siñá wabéi adarira dimurei le buídurügüti ubuidun lun wadimurehan luagu!