1 Au, Pábulu, le ábanbei lani Hesukrístu apostolu lau lugundan Bungiu. Úara luma Timotéu le waduhe luéigiñe Hesukrístu 2 nabürühañoun gárada to hun, huguya iduheñu ha Kolosabaña, ha gúnfulibaña luma Kristu le uágubei hafiñera. Resibi humá areini luma darangilaü lúmagiñe Wáguchi Bungiu.

3 Súnwandan wateingiruni Bungiu, le Lúguchi Wabureme Hesukrístu, dan le wafurieidún lun huagu. 4 Aganbaadiwa luagu hafiñen luagu Kristu Hesusu luma luagu hínsiñehabu houn sun ha lánigubaña Bungiu, 5 lídangiñe emenigini le huágubei luagu le areidúañubei hubá sielu. Lememe uágubei haganba lidan uganu le luáguti asalbaruni le tímatimaati. 6 Uganumeme le meha apurichihóubei hun, laburuchaguña ani líchuguña in lidan sun ubóu, ítara kei lasuseredun hidan lúmagiñe haganbuni ladimurehóun luagu línsiñehabu Bungiu, aba hasubudiruni luagu inarüniti lan ínsiñehabuni ligía. 7 Ligía katei le larufudahabei Epafürasi, le hínsiñebei woun, le giñe nadagimeinhaalibei wama, ani subudi wamuti luagu gayara lan meha wemenigidun luagu leseriwiduba lan lun Kristu buidu haganagua. 8 Barühali uganu woun huagu luma luagu ínsiñehabuni le ru laalibei Sífiri hun.

9 Ligía lúmagiñe lubéi weyu le wasubudirunbalin katei le, meredeti wayumuragun lun Bungiu huagu, luma wamuriahan luma lun lasubudiragüdüni lugundan hun buidu, ru ligíame sun luwuyeri subudi luma gunfurandaü hun luagu katei le larufudahabei lani Sífiri hun. 10 Ítara luba gayara lan hagaburidun keisi lunti lan hagaburidun lánigu Wabureme, adügei le aubei lagundaara súnwandan, arufudeina sun luwuyeri igaburi buiti; lun giñe hasubudirunitima Bungiu. 11 Amuriahatiwa luma lun líchugun erei hun lau lueirin lubafu lun gayara lan hawanduni sun katei lau saragu gurasu luma ugundani; 12 lun giñe heteingiruni Wáguchi Bungiu luagu aranse láadiwa lan lun weresibiruni wafanran lídangiñe le lunbei líchuguni houn lánigu lidan larugounga. 13 Sefu lumutiwa Bungiu lídangiñe lubafu luburiga, aba líchuguniwa lidoun larúeihan Liráü le hínsiñebei lun, 14 le asalbarubaliwa lau lounwen, chibalei wafigoun.

15 Lidan Kristu larihíwa Bungiu le marihínwabei, ligía ígiramaübei, le lóugiñebei sun katei le adügǘbei. 16 Lídangiñe Kristu ladügei Bungiu sun katei le siélubei luma le ubouagubei, dandu burí katei le marihínbei kei le arihúabei. Lídangiñe Kristu ladügei arúeihani, gumadi, lúrudu burí luma burí ubafu, ani lun giñe Kristu ladügǘwa. 17 Lubaragiñebei sun katei, aniheinhali meha Kristu; ani lau lubafu anihein lubéi sun katei lidan lubara. 18 Lóugiñe sun lira, Kristu tichügüdinabei liligilisin, tomeme lúgubu, ligía lagumesehabei sun katei, ligía furumiñebei ásaara lídangiñe óunweni lun móunwendigiaali lan, lun ligía lan lau furumiñeti ubaraü lidan sun katei. 19 Ítara liña labusenruni Bungiu lun lídanba lan Kristu laganóua sun lubafu. 20 Lídangiñe Kristu, aba larandaragüdüni Bungiu sun ubóu dayarügubei lúmagua, dandu burí katei le ubouagubei kei le burí siélubei; adüga lumuti arandaruni ligía lau lounwen Kristu luagu gurúa.

21 Terencha burí meha huguya lun Bungiu, láganigu meha huguya tidan hanigi ladüga katei wuribati le hadügübei. 22 Ánheinti guentó, arandaragüda laadün Bungiu lúmagua lau lounwen Kristu lun larufudunün sánduñu, madaseirunga ani madurunga ligibugiñe. 23 Gama lumoun lunti herederun deregüdagu lidan hafiñen, mígirunga huméi emenigini le huágubei le líchugubei uganu lánina asalbaruni le haganbubei. Ligía uganu le apurichihóubei lidan sun ubóu, le giñe napurichihabei, au Pábulu.

24 Guentó gúndaatina lau le nasufurirubei huagu, lugundun lau igaburi le, gayaraati níderagun lau núgubu guánarügü lun lóustaragüdüniwa le lúngilibei lasufuriruni Kristu tuagu liligilisin tomeme lúgubu. 25 Ñǘbuinhadina lun ábanbadina lan hádangiñe ha eseriwidubaña houn lánigu Kristu luagu wadagimanu le líchugubei Bungiu nun luagu hufulesein, lun napurichihani lererun Bungiu hun kei lubudubu. 26 Uganu ligía, katei le meha aramudañu lubéi Bungiu lúmagiñe saragu dan, gama lumoun guentó, subudigüda laali houn lánigu. 27 Houn labusenra Bungiu lasubudiragüdüni lueirin irisini le lídanbei katei aramudaguati le haganagua néchanigu. Kristu katei aramudaguati ligía ani anihein hidan, ani ligía le uágubei híchigei hemenigi luagu uéiriguni le lunbei hibihini sielu.

28 Luagu Kristu wapurichiha; eweridiheina, arufudaha wagía houn lun gunfuranda hamá buidu buidu, lun warufuduniña kei gürigia richaguatiña ligibugiñe Kristu. 29 Ligía nuadigimaridunbei, áfaagueina lau sun erei luma ubafu le líchugubei Kristu nun.