1 Ánheinti saraadün lubéi luma Kristu, áluaha huméi burí katei le lánina sielu, le ñein lubéi Kristu ñun luéigiñe lóunwenren Bungiu. 2 Samina humá luagu burí katei le lánina sielu, mama luagu burí le lánina ubóu. 3 Hilatün luma Kristu; guentó, anihein hibagari aramudañu luma Kristu lidan Bungiu. 4 Kristu hibagaribei le tímatimaati, dánmeti lagiribudun, hachülaaguba giñe luma, ábame gafanran humá lidan luéirigun.

5 Ígira huméi sun le higaburibei le láninabei ubóu le: Ualá ni aban hídangiñe agamariduti mamarieidunga, madügün huguyame katei wíyeti, mafalara huméi luriban haritagun, ígira humeime igaaduaü, lememe ítarabei kei lanügǘniwa irisini kei Bungiu. 6 Luéigiñe burí katei le, lábürühan lanarime ligañi Bungiu kóntüra ha maganbadibaña lun. 7 Huguya, adüga burí humuti meha katei le lidan meha binadu hibagari; 8 ánheinti guentó, ígira huméi sun burí katei le: Igañi, iyereehabúni, wuribani, anabahani, luma burí dimurei wíyeti. 9 Mariñaga humá iyeeni húmagua kei ígira humaali lan binadu higaburi luma le burí meha hadügübei. 10 Iserihali higaburi le iserideinábei keimeme ligaburi Bungiu guánarügü le adügübalin, darime hasubudiruni Bungiu buidu buidu. 11 Iseri ibagari ligía, mámaali katei lánina huríu humá o mama humá huríu, ni lánina heresibiruni seini luagu húgubu o meresibirun humani, ni lánina terencha humá, machülaaguntiña, idamuni o líbüretiña; Kristu, ligía sun káteibei, ani anihein giñe hadan sun lánigu.

12 Hínsiñetün lun Bungiu; ani anúadaha laadün lun lánigume. Ítara liña lubeiti, abagarida humá keisi lánigu, lau gudemehabu, areiduni, ǘnabuguni, gaganbadi, luma gaguraasuni. 13 Gaguraasun humá hubaruagua, ferudunagua huguyame húmawagua; ítara kei feruduna lanün Kristu, ítarala giñe hadüga. 14 Lóugiñe sun katei, hínsiñehabu humá; ligía katei le íchugubalin sun katei lidan aban. 15 Arueihalá lidarangilan Kristu tidan hanigi, ladüga ligía lagúarunbei Bungiu hun lun ábanrügü humá úgubu, abagarideina lau darangilaü. Geteingiradi humá giñe.

16 Buíngüdaloun luganute Kristu hanigi le gumuti. Arufudaha humá húmawagua eweridiragua huguyame húmawagua lau lichú aau. Heremuha luagu luéirigun Bungiu lau eteingiruni lun tidan hanigi lau sálumu luma burí uremu. 17 Furumiñeguarügü katei le hadüga o le lan hariñagun, adüga huméi lun híchugun inebesei lun Wabureme Hesukrístu, eteingiréinei Bungiu Úguchili lídangiñe Hesukrístu.

18 Würiña, gaganbadi humá houn húmarigu; ligía katei buiti le lunbei hadügüni keisi afiñetiña luagu Wabureme Kristu. 19 Wügüriña, hínsiñe hamá húmarigu hun, móusera humaña wuriba.

20 Isaanigu, aganba humaña hagübürigu lidan sun katei, ladüga ligía hínsiñebei lun Bungiu. 21 Agübürigu, másügüraguala hagumadiruniña hisaanigu, ragühañein maguraasuni.

22 Ubúeingu, gaganbadi humá houn hiyubudirigu lidan sun katei, mámarügü dan le aríagu haña lan hun lun herederun buidu hagibugiñe, adüga huméi súnwandan tau sun hanigi ladüga lueirin lineben Bungiu hun. 23 Furumiñeguarügü katei le hadüga, adüga huméi lau ugundani, kamá hamuga hadügüñein lun Wabureme Kristu mama houn gürigia. 24 Subudi humaali luagu líchugubei lan Bungiu alagan hun keisi hafayeiruáha, ladüga lun Wabureme Kristu le Habureme le tímatimaati heseriwida. 25 Ánheinti le adügüti wuribati, leresibirubei lafayeiruaha wuribati le ladügübei, ani aban lau lanügüniña Bungiu sun gürigia.