1 Kei lirahüñü hubéi Bungiu ha hínsiñetiña lun, houcha humá háyeihani. 2 Hínsiñegua humá húniwagua ítara kei wínsiñedun lun Kristu, aba lederegeragun lungua wawagu keisi idewesei luma adagaragüdüni le buiti líhemen lun Bungiu.

3 Kei lánigu humá Bungiu, moun lumuti ni lun hadimurehan luagu salufuri, ni amu luwuyeri iwiyei, ni igaaduaü. 4 Mawiyelá hiyuma, mariñagun huguyame libidiounigan aau, ni dimurei málati, ladüga mabuidunti burí katei le. Lubaragiñe lira, yusu huméi hiyuma lun híchugun eteingiruni lun Bungiu. 5 Subudi humuti luagu le lan agamariduti mamarieidunga, o ladügün lan burí katei wíyeti, o labagaridun lidan igaaduaü (le ítarabei kei lanügǘniwa irisini kei Bungiu) siñati gafanran lan lidan larúeihan Kristu luma Bungiu. 6 Ualá ni aban eyeedutün lau dimurei málati, lugundun ladüga burí katei wuribati le, lábürüha lanarime ligañi Bungiu hawagun ha maganbadibaña lun. 7 Direi humá lubeiti hawéi gürigia ítaratiña.

8 Lídanñadün meha luburiga; anhein guentó, kei lídanñadün lan aban luma Wabureme, lídanhadün larugounga. Ítara liña lubeiti agaburida humá keisi gürigia ha éibugubaña lidan larugounga. 9 Gürigia hagía, areidatiña, suruti habagari, hínsiñeti inarüni houn. 10 Houcha humá hafurendeiruni ka lan hínsiñebei lun Wabureme. 11 Mádanlaün burí katei málati le hadügübei ha lánigubaña luburiga; sagarügü huméi lidoun larugounga. 12 Ruti busiganu íbini lun ladimurehóuniwa luagu burí katei le hadügübei aramudaguarügü; 13 gama lumoun arihúati sun katei dan le lafuranguagüdüni larugounga, 14 ladüga larugounga afuranguagüdübalin sun katei. Ligía lariñawagúnbei:

Agaguduabá, buguya le arumugubei;

saraba hádangiñe hilaaña,

ábame larugoungadagüdün Kristu bau.

15 Góunigi humá lubeiti buidu ida liña lan hóuserun. Mabagarida humá kei ibidiougua tau, habagarida kei chu tau. 16 Yusu huméi hidaani lidan katei buiti, lugundun wuribaali dan. 17 Mabidiounigadalá hau; houcha humá gunfuranda humani ka lan lugundanbei Wabureme. 18 Mabacharuada humá, lugundun barǘ lumutiña lira gürigia lidoun féridi; lubaragiñe lira, buin humá lau Sífiri Sandu. 19 Adimureha humá húmagua luagu luéirigun Bungiu, lau sálumu luma uremu; heremuha lun Wabureme alawaha humeime tidan hanigi. 20 Ru humá eteingiruni lun Bungiu Úguchili súnwandan luagu sun katei lidan liri Wabureme Hesukrístu.

21 Gaganbadi humá húniwagua, ítara luba harufuduni lineben Kristu hun.

22 Lunti deregeguñu tan würi tungua lun túmari kei lun Wabureme Hesukrístu, 23 lugundun wügüri tichügüdinabei lúmari ítara kei Kristu lan tichügüdinabei liligilisin, hameme lúgububaña ani Kristu giñe Hasalbaragülebei. 24 Ítara kei haganbadi afiñetiña lun Kristu, ítara liña giñe lunti lan gaganbadi hamá würiña houn hámarigu lidan sun katei.

25 Hínsiñeta lúmari wügüri lun kei lueirin wínsiñe lun Kristu, wagía le liligilisin, aba líchuguni libagari wawagu. 26 Ladügünbalin lira lun lanúadirunu lun Bungiu, lun larumadagüdünu lídangiñe le binadubei lau duna luma giñe lau lererun, 27 lun larufudunu ligibugiñe keisi aban ligilisi sándutu, aranseñu, úouga ni kata dáseiti tuagu, ua ni kata mégeiti tuagu, lun sandu tan ani úaragua tuguyame. 28 Ítara liña lunti lan tínsiñedun lúmari wügüri lun kei línsiñe lúgubu guánarügü lun. Le hínsiñehabuti tun lúmari hínsiñeguati lungua. 29 Úati gürigia meberesenti lau lúgubu guánarügü; hóugüdarügü lumuti, góunigilei. Ítara liña giñe ladüga Kristu tun liligilisin, 30 ladüga lúgubu tan, ani wagía líbiri úgubu ligía. 31 Lariñahare tidan Lererun Bungiu: «Ligía lígirubei lubéi wügüri lúguchi tuma lúguchu lun lamarieidun tuma lúmari, ábame hayabin lun ítara hamá kei ábanrügü gürigia». 32 Anihein aban óunwenbu inarüni aramudaguati lidan dimurei ligía. Ariñagatina luagu luáguti lan Kristu tuma liligilisin. 33 Lariñaguña giñe dimurei ligía luagu kada lan aban hídangiñe lunti lan hínsiñe tan lúmari lun kei línsiñegua lungua, lun giñe inebe lan túmari würi tun.