1 Isaanigu, le lunbei hadügüni keisi afiñetiña lun gaganbadi humá houn hagübürigu, lugundun ligía richabei. 2 Anihán aban gumadi wéiriti lídangiñe lugumadin Bungiu le anügübei buiti woun lau wagunfuliruni: «Inebelá búguchi tuma búguchu bun 3 lun buidu lan dan bun ani migife ligíame bibagari ya ubouagu».

4 Huguya agübürigu, magañidagüda humaña hisaanigu, agüriaharügü humaña buidu lun gaganbadi hamá, arufudaheina houn kei labusenruni Wabureme.

5 Ubúeingu, gaganbadi humá houn hiyubudirigu ya ubouagu lau inebesei, lau duari. Huádigimarida buidu lau sun taruman hanigi kamá hamuga lun Kristu heseriwida. 6 Seriwi humaña buidu, mámarügü dan le aríagu haña lan hun lun herederun buidu hama, seriwi humaña buidu súnwandan kei eseriwidutiña lun Kristu, adügeina lugundan Bungiu tau sun hanigi. 7 Adüga huméi huádigimari lau ugundani, kamá hamuga lun Wabureme hadügei mama houn gürigia, 8 ladüga subudi humaali luagu kada lan aban hídangiñe, dandu idamuni kei líbüretiña, lafayeirubei lan Wabureme según buiti le ladügübei.

9 Huguya iyubudirigu, buidulá giñe hóuseruniña hubúeingu, masíadira humaña. Haritagua humá luagu dandu lan huguya kei hagía, lábugiñeñadün lan lagumadihan Wabureme le siélubei, ani aban lan lau lanügüniña Bungiu sun gürigia.

10 Guentoti niduheñu, here humá lídanñu aban luma Wabureme, lau lubafu le mébehabei. 11 Daü humóun sun daüguaü to líchuguboun Bungiu houn sun lánigu lun deregüdagu humá luéi leyeedagunün Mafia. 12 Lugundun mama hama gürigia ha láutiña ǘgürügü luma abun wageindagua, hama burí sífirigu gabafutiña ha lánina wuribani yágüta iñu wageindagua, luma hama gumadi, lúrudugu luma ubafu lánina luburiga lidan ubóu le. 13 Ragǘ humóun lubeiti sun daüguaü lánina asudarahani to líchuguboun Bungiu hun lun gayara lan hawanduni wuribani lídanme weyu le wuribabei, ani lárigiñeme lásügürün dan ligía, lun derebugumeme humá. 14 Derebugu humá lubeiti, daügu lau inarüni keisi lau aban béliti le güragu umuti buidu luagu hiranaagua, areidúañu lau ísuruni kei lau katei le adouragubei lau laniguagu súdara. 15 Aranseñu humá súnwandan lun hapurichihani uganu luáguti Wasalbaragüle, le íchugubei darangilaü, keisi laranserun súdara dan le ladaürünu lisabadun. 16 Lóugiñe sun katei, barǘ huméi hafiñen kei lárügüdüni súdara lidaüdina ligibugiñe, lun hararamunu sun gimara durunguatu to lachüühaboun Mafia huagun. 17 Barǘ huméi hemenigidun luagu hasalbarun kei ladaürüni súdara lubunidin lun lóunigiruni lichügü; barǘ humeime Lererun Bungiu kei eféin to líchuguboun Sífiri hun. 18 Adüga huméi sun le lau saragu ayumuraguni lun Bungiu lun líderagunün; afurieida humá lun Bungiu súnwandan lau lubafu Sífiri. Agagudúañu humá, gaguraasun humá, afurieida humá hawagu sun ha lánigubaña Bungiu. 19 Afurieida humá giñe nuagu lun líchugun Bungiu dimurei nun dan le nadimurehan, lun giñe nadimurehan lau manufudei lun nasubudiragüdüni uganu aramudaguati le luáguti Kristu. 20 Óunaha láadina Bungiu lun napurichihani uganu le, le uéigiñebei nadaürǘwa guentó. Afurieida humá lun napurichihani uganu le lau manufudei, keisi lubudubu.

21 Tíkiku, waduhe hínsiñeti woun, le íderagubaliwa buidu lidan luadigimari Wabureme, ligíaba íchiga uganu hun nuagu luma luagu le nadügübei. 22 Ligía nóunahanbalin hun lun lariñaguni hun ida waña lan, lun líchugun dǘgüdaguaü hun.

23 Rula Bungiu Úguchili luma Wabureme Hesukrístu darangilaü luma ínsiñeni lau afiñeni houn waduheñu luéigiñe Hesukrístu; 24 biní láñame Bungiu sun ha hínsiñehabubaña lun Wabureme Hesukrístu lau aban ínsiñeni le masansiraguaditi. Ítarala.