1 Katorusu irumu lárigiñe, ábaya nidin Herusalén úara luma Berünawé; barǘ numuti giñe Titu númagua. 2 Nídinbei ñein ladüga arufuda laali lan Bungiu nun luagu lunti lan nidin. Aba nadamuridagun ñein hámarügü ábutigu afiñetiña, aba nabahüdaguni houn ida liña lan napurichihan houn ha mámabaña huríu, luéi lerederun náfaagun kei ni kata. 3 Ani ni Titu, le nóubabei, mafosurun hamuti lun leresibirun seini luagu lúgubu, lau sun mama lan huríu. 4 Añahein íbirigu ha mama tímatimaatiña ebelurutiña waganaguóun aramudaguarügü; lun haríaahani ligaburi líbüre wamá lidan Hesukrístu, busentiña yebe lunya hadügün lun idamuni wamá lun lúrudu. 5 Gama lumoun mígiraguagüdüntiwa woungua houn ladüga busén wamá lun humaméme lan inarüni le lánina uganu luáguti asalbaruni.

6 Ha asubudirúabaña keisi ábutigu, lau sun meberesen nan lau kátañanu lan ladüga masuesihanti Bungiu gürigia—míchuguntiña ábutigu hagía ni aban iseri luwuyeri arufudahani nun. 7 Lubaragiñe lira, subudirügü hamuti luagu Bungiu lan íchugubalin wadagimanu le lánina lapurichihóun uganu luáguti asalbaruni houn ha mámabaña huríu nun, ítara kei buga líchuguni wadagimanu lun Féduru lun lapurichihani uganumeme ligía houn huríu. 8 Ariha hamaali luagu Búngiumeme lan le nadagimeinbei lídangiñe Féduru keisi apostolu hadan huríu, ligiaméme lan giñe nadagimeinbei nídangiñe keisi apostolu hadan ha mámabaña huríu.

9 Keisi subudi lani Santiagu, Féduru luma Huan, ha anügǘbaña kei wéirigutimatiña, luagu Bungiu lan fuleseibalina lun líchuguni ubafu le nun, aba híchuguni háhabu woun, au luma Berünawé, keisi hánigu lidan luadigimari Kristu, luagu giñe gunda hamá lun woudin nadagimein hageira ha mámabaña huríu, sun añaha lan nadagimein hadan huríu. 10 Amuriaharügütiña wama lun waritagun hawagun gudemetiña; anihánti katei le nóuchubei nadügün lau saragu góunigi.

11 Dan le lídinbei Féduru uburugu Antiokía, aba nadeinhan lun ligibuagun, lugundun mabuidun lan le ladügübei. 12 Furumiñe meha, houti meha hama afiñetiña ha mámabaña huríu. Ánheinti lárigiñe hachülürün gürigia lóunahan Santiagu, aba lagumeserun Féduru adiseda hawéi ha mámabaña huríu, aba méiginhali lan hama ladüga lanufude luéi le gayaraabei hariñagun huríu. 13 Hati híbiri huríu ha afiñebaña luagu Kristu, aba húaradun luma Féduru lau biangua lan ligibu; aba giñe lúaradun Berünawé hama lidan katei ligía. 14 Dan le narihinbei luagu méibugun hamá úara luma inarüni le larufudahabei uganu luáguti asalbaruni, aba nariñagun lun Féduru ligibugiñe sun adamurini: «Buguya le huríu, bawinwanduña kei ha mámabaña huríu. Ida liñati babusenrubei bafosuruniña ha mámabaña huríu lun habagaridun kei huríu?»

15 Aba nasigirun ariñaga houn:

—Huríu wagía lúmagiñe wágurahoun; mama wagía gafigountiña kei ha mámabaña huríu, ha águrahoubaña bóugudi luéi lúrudu. 16 Lau sun lira, subudi wamuti luagu úabei lan ni aban aricharaguti luagu ladügüni le lubeibei lúrudu; láurügübei lafiñerun luagu Hesukrístu laricharagua. Ligía giñe lébubei wafiñerun luagu Hesukrístu, lun gayaraabei lan waricharagun lídangiñe afiñeni le, mama lídangiñe wadügüni le lubeibei lúrudu; lugundun úabei ni aban aricharaguti luágurügü ladügüni le lubeibei lúrudu.

17 Ítara liña lubeiti, anhein wáluahaña lubéi werederun richagu ligibugiñe Bungiu lídangiñerügü Hesukrístu, aba warihin luagu gafigounmeme wamá. Afigougüda lumutiwa lubéi Kristu? Uá mítaranti! 18 Ladüga ánhana agünrinchagua aban katei, ñéingiñe naranseraguei; au guánarügü gadurunbei. 19 Au, luéigiñe lilurudun Moisesi, hilaadina lun lúrudu; lun gayara lan nabagaridun lun Bungiu. Dáwaguaadina luma Kristu luagu gurúa. 20 Mámaadina lubeiti aumeme abagarida; Krístuhali abagarida nidan. Ibagari le nabagaridubei lidan núgubu, nabagariduñein lau sun nafiñen luagu Liráü Bungiu le hínsiñehabubei nun, aba lederegeragun lungua lun lounwen nuagu. 21 Mabusenruntina lubeiti namaharun lun lareini Bungiu, lugundun lun hamuga gayara lan laricharagun gürigia lau lagunfulirun luma lúrudu ligía, úati hamuga hu lan lounwen Kristu.