1 Lidan meha dan le sügühalibei, adimurehati meha Bungiu houn wagüchagu saragu wéiyaasu luma lidan saragu luwuyeri, hádangiñe profetagu; 2 guentó, lidoun burí lagumuhóun dan le, adimurehaali woun lídangiñe Liráü, le ídangiñebei ladügei ubóu, ani rulei lun ligíaba lan galagantei sun katei. 3 Arufuda lumuti Liráü Bungiu luéirigun Lúguchi luougua; ligiaméme Búngiubei; ligía ágüdahabalin sun katei lau lererun le gabafubei. Lárigiñe lachibuni wafigoun, aba lañuurun luéigiñe lóunwenren lala Bungiu, le Suntigabafu, sielu.

4 Ñǘbuinhali Liráü Bungiu lun wéirigubei lan hawéi ánheligu, resibihali keisi alagan aban iri íñugutimati hawéi. 5 Mariñagunti Bungiu ni aban wéiyaasu lun ni aban ánheli:

«Niráü buguya;

uguñe, Búguchihadina».

Mariñagun ligía luagu ni aban ánheli:

«Ábanbadina Úguchi lun,

ligíame aban isaani nun».

6 Ánheinti dan meha le lóunahanbalin Lígirama ubouagun, ariñagati:

«Hudugua hamá sun nani ánheligu lun».

7 Lariñaga hawagu ánheligu:

«Adügati lun ítara hamá lani ánheligu kamá garabali,

adüga ligía lun ítara hamá eseriwidutiña lun kamá watu gemeti».

8 Ánheinti lun Liráü ariñagati ítara:

«Bungiu, magumuchaditi barúeihan;

ani aban arúeihani le lánina richaguaü.

9 Hínsiñeti le buídubei bun, iyereegu ligía le wuribabei bun;

ligía níchugunbei, au le Bubungiute, gíbetima ugundani bidoun sügǘ hau bíbirigu».

10 Ariñagati giñe:

«Buguya, Aburemei, lidan lagumeseha, adüga bumuti ubóu;

lau búhabu badügei sielu.

11 Lagumuchuba sielu luma ubóu; anhein buguya, berederuba lun sun dan.

Laweiyaduba burí kei daüguaü;

12 babaruchagubei kei aban idáü,

lasansirúaba kei daüguaü.

Anhein buguya, ábanmemebadibu; magumuchunbei bibagari».

13 Mariñagunti Bungiu ni aban wéiyaasu lun ni aban ánheli:

«Ñuruba luéigiñe nóunwenren

darí níchuguniña báganiñu lábugiñoun bugudi».

14 Sun ánheligu, sífirigu eseriwidutiña lun Bungiu hagía; ounahóutiña lun híderaguniña ha lúnbaña heresibiruni asalbaruni keisi alagan.