1 Ligía lubeiti kei añaha lubéi saragu gürigia ha arufuda hamaalibei hafiñen geyegu wau, gidá waméi sun le eredehabaliwa wawariua, luma figóu le agüragubaliwa, adüga waméi éibaaguni le wabaabei lau erei, 2 lau warihin luagun Hesusu, le ídangiñebei liabin wafiñen, le giñe abuiduragüdübalin wafiñen sunsuinagubei. Súfuriti Hesusu luagu gurúa, meberesenga ligía lau nibusigarídüna lan luwuyeri óunweni ligía, lugundun subudi lani luagu lásurun lanme lasufurirun, lagundaaruba lan; aba lañuurun luéigiñe lóunwenren Bungiu.

3 Samina humá lubeiti luagun lani Hesusu hénpulu, luagu lawanduni saragu súfuri hámagiñe gafigountiña; ligía mabuchadalá lubéi huagu, meferidirun humeime huguraasun. 4 Machülügidün lumoun óunweni lidan hageindagun luma figóu kei ligía. 5 Bulíei humá san dimurei le líchugubei Bungiu hun keisi lirahüñü? Lariñahare tidan Lererun:

«Niráü, míchigaba mabahüdüni luagu abeichúni le líchugubei Babureme Bungiu buagu,

meferidirunbeime buguraasun.

6 Lugundun arufudahati Bungiu houn ha hínsiñebaña lun,

bei laña ha leresibirubaña keisi lirahüñü».

7 Hasufuriruña lun haranseragun, lugundun lóuseruñadün Bungiu keisi lirahüñü. Anihein funagia úguchili mabeichun lumuti lisaani? 8 Anhaün mabeichun lan Bungiu keisi labeichuniña sun lisaanigu, mámarügü hiña lisaanigu ha tímatimaatiña. 9 Dan meha le ñǘbürigidiwa, bei hamutiwa meha wagübürigu, ani inebetiña meha woun. Lúntimati waganbuni Wáguchi le siélubei, lun gabagaribadiwa lan. 10 Habeichuniwa meha wagübürigu ya ubouagu lúnrügü murusun ibagari le, lun hagüriahaniwa buidu según habafu; ánheinti Bungiu, lun wasagarun buiti lídangiñe labeichuniwa; labeichawa lun ladügüniwa lun sandu wamá ítara kei sandu lan. 11 Inarüni luagu ua lan abeichúni auti wagundaara lidan le weresibiruni, gárirügüti woun; ánheinti ha afurendeirubaña lídangiñe abeichúni, ibihatiña aban ibagari lánina ísuruni luma darangilaü.

12 Ru humá lubeiti iseri erei lun harüna le buchaalibei uagu lárigi asufuriruni, luma lun burí higachürügü le débilihalibei; 13 ani áluaha huméi üma le surubei lun hugudi, lun máluguchagun lan ugudi le damadamabei, lubaragiñe lira lun areidaguarügü lan.

14 Houcha humá lun lidan humá darangilaü hama sun gürigia, abagarideina aban ibagari le sánduti; lugundun úabei arihiti Aburemei sin lira. 15 Houcha humá lun ua lan ni aban erederuti bóugudi luéi lareini Bungiu, ábame leferidiragüdüni hafiñen híbiri keisi ladügüni híduru gífiti le abiñaragubalin sun le aguurubei luagu. 16 Ualá ni aban hídangiñe agamariduti mamarieidunga, míchugun ligíame mebereseni luagu katei luáguti Bungiu, kei ladüga Esaú, aba laluguruni liricha keisi íbugañaü luagu aban asiedu éigini. 17 Subuseti hun luagu lárigiñe lan buga ladügüni, busengili yebe leresibiruni labinirun lúguchi keisi íbugañaü, gama lumoun mibihin laali; siñaali lasansiraguni lúguchi le adüga láalibei lau sun layahuahan Esaú lau igarigu.

18 Huguya, mayarafaduntün lun katei le gayaraabei hasandiruni keisi hayarafadun Ísüraelina lun wübü le Sión, le durungubei lau watu gemeti, le ñein lubéi anihein lan meha luburiga luma luribouga; 19 maganbun humuti giñe tamuri fidu luma lumalali Bungiu le adimurehabei houn. Ha aganbubalin umalali ligía, ayumuraguatiña lun hebé lan ladimurehan houn. 20 Hadügünbalin lira lugundun lueirin hanufude luéi lagumadihan Bungiu, ladüga lariñahare: «Le íchuguti lugudi luagu wübü, afarualá hilagubei lau dübü o tau lan aban eféin, íbini aban lan animaalu». 21 Wéiriti lanufunehabu katei le harihubei, darí lun lariñagun Moisesi guánarügü: «Nadadagaruña lau anufudei».

22 Anhein huguya, lábugiñe iseri daradu, yarafaadün lun wübü Sión le siélubei, lílanaadün luburugute Bungiu le wínwanbei, le Herusalén le siélubei, le ñein lubéi haganawa saragu ánheligu. 23 Lídanñadün hadamurin lirahüñü Bungiu ha bürüwañubaña iri sielu. Lun Bungiu le aguseragüdübaliña sun gürigia hayarafada; lídanñadün aban hama ha óunwegubaña ha buídubaña igaburi ubouagu, ani buíngüda lumuti Bungiu lubuidun hagaburi sielu. 24 Ñǘbuinhadün lun Hesusu, le buyei lun iseri daradu, chibawaadün lau lita Hesusu, le adimurehabei woun buidu sügǘ lau lita Aweli.

25 Ligía mamahara humá lubéi haganbuni le adimurehabei woun. Ladüga mesefuhaña ligía meha Ísüraelina dan le híchuguni hanagan luagun le adeinhabei houn ya ubouagu; gúbume wesefura anhein wíchiga wanagan luagun le adeinhabei woun lúmagiñe siélugiñe. 26 Adadagaragüda lumuti meha lumalali Bungiu ubóu lidan dan ligira; ánheinti guentó lariñahare: «Nadadagaragüdayabei mámarügü ubóu, íbini giñe sielu». 27 Dan le lariñagun «nadadagaragüdayabei», mini lan luagu lagidarúba lan burí katei le márügüdünbei luagu ebu derebuguti, ábame lerederun le siñabei lánhingichuniwa. 28 Arúeihani le líchugubei Bungiu woun siñati lánhingichun. Ru wamá lubeiti eteingiruni lun Bungiu luagu lira, hudugua wamá lun lau inebesei luma gúnfuli keisi labusenrun; 29 lugundun aban watu gagumuchaguagüdaditi Wabungiute.