1 Anihán uganu le líchugubei Bungiu lun Malakíasi, lun líchuguni houn lílana Ísüraeli.

2 Lariñahare Aburemei:

—Hínsiñetün nun.

Gama lumoun huguya aba hóunabun, hariñaga:

—Ida liñagia wasubudiruni luagu hínsiñe wamá bun?

Lóunaba Aburemei, lariñaga:

—Hínsiñetün nun, ladüga lau sun meha gamulenugua hamá Esaú luma Hakobu, hínsiñeti meha Hakobu nun, 3 leyereeguda Esaú nun. Lageira Esaú, le meha ñein lubéi dabíara, aba nadügüni fulasume mageirawati, adüganéi lumúan lun hóunrügü lan animaalugu áraabuna leseriwida.

4 Ánhaña hamuga ariñaga Edomuna ha ladügawagun Esaú: «Günrinwaguaadiwa, gama lumoun wararamagüdayabei wageira», lóunabuña hamuga Aburemei, lariñagame: «Hagía hábunaguayaba, gama lumoun nagünrinchaguayabaña. "Lageira wuribani", luma "linechanin ligañi Bungiu le magumuchaditi", ligíaba liri hageira».

5 Huguya, harihubei lau hagu, hariñagame:

—Wéiriti luéirigun Bungiu darí lun lánhiñuraguni láfadaragun Ísüraeli.

6 Lariñahare Aburemei houn fádirigu:

—Rútiña isaanigu inebesei houn hagübürigu, inebe hagía iyubudirigu houn hamusun. Ánheinti au lubéi Húguchibei, kagia uagu michu hubéi uéiriguni nun? Anhein Habureme nubéi, kagia uagu míchugun hubéi inebesei nun? Barǘ humutina kei ni kata, ani ariñagagidün: "Ida liña wanügünibu kei ni kata?" 7 Barütün fein to moun lumuti hanügünu luagun nani latarü, ani álügüdahagidün: "Ida liña wanabagunibu?" Anabagua humutina lau hasaminarun gayara lan lanügǘn nani latarü kei ni kata, 8 ani ua lan ni kata wuribati lau hadagaragüdün animaalu marihintiña, o danimatiña o sánditiña nun.

Barǘ humaña houn hábutigu, ariha humaamuga ánhaña heresibira lau ugundani! 9 Amuriaha humá lubeiti luma Bungiu lun gudemehabu lan woun. Gama lumoun anhaün anüga libe idewesei le lun, maguraba humá leresibirunün lau ugundani. Lariñahare Aburemei Suntigabafu:

10 —Ladoureidügü hamuga aban hídangiñe tubenari ténpulu, lun mébedun humani líleme nani latarü mébunouga! Lugundun magundantina hau, ani masigibadina eresibirei hidewese. 11 Rúati inebesei nun hadan sun néchanigu ha ubouagubaña, gudaguatiña kupali lidan burí fulasu lidan niri ani ru hagía idewesei gadünamati nun. 12 Ánheinti huguya anabagua humutina, dan le hasaminarun garicha humá lun hanabaguni nani latarü, luma giñe mala lan adagaragüdüni le ichugúbei ñein. 13 Hariñagati: "Buchá wawagu lubá sun le!" Aba héherahan nau óusera humana lau mabahüdüni. Lau sun lira saminatün nagundaaruba lan dan le hiabin adagaragüda aban animaalu íweruhouarügüti o aban lan bágasu danimatu o sánditu nun. 14 Íñaragua numuti marasualuguti le füramaseti nun líchuguba lan aban animaalu le úati mégeiti luagu hádangiñe lilügüniña, lárigiñe ladagaragüda aban animaalu le danimati. Au Urúeibei gabafuti, ani rútiña sun néchanigu inebesei nun. Au, le Aburemei Suntigabafu ariñagubalin.