1 Lariñahare Bungiu Suntigabafu:

—Yarafaali weyu le sübei kei aban régigi, danme le hágudun sun ha barüguabaña houngua hama ha wuribabaña kei sagadi sáühali lidan watu gemeti. Háguduba lidan weyu ligía, meredebei ni kata hádangiñe. 2 Ánheinti hun huguya le inebehabubei nun, larugoungadagüdüba naricharagun keisi larugoungadagüdün weyu, le anügübei átuadi lidan lárouga. Hachubahaba lau ugundani kei bágasu ñǘbürigiña dan le háfuridun hábiñegiñe. 3 Lídanme weyu ligía, le naransehabei guentó hadügüragubaña wuribatiña kamá hamuga kaliki.

4 —Haritagua humá luagu lúrudu le meha níchugubei lun Moisesi luagu wübü Orebü. Gumadi meha le lunbei yebe lagunfuliruni sun Ísüraeli!

5 —Ariha humá: Nóunahabei Elíasi le profeta hun lubaragiñe lachülürün luéyuri Aburemei, le lunbei ábanbei lan weyu wéiriguti ani hanarime ligía. 6 Ladügüba lun harandarun agübürigu hama isaanigu. Anhein madügün hamá ítara, niábinba ábame nabeichuni hageira, lau nagünrinchaguni sunsuinagubei.