Lucas 10

ಬರ್‍ಯಾ ಸಮಾರಿಯಾಗಾರಾಚಿ ಕಾನಿ

25 ಹೆಚ್ಯಾ ಮಾನಾ, ಎಕ್ ಖಾಯ್ದೆ ಶಿಕ್ವುತಲೊ ಮಾನುಸ್, ಜೆಜುಕ್ ಸಿರ್ಕುನ್ ಘಾಲುಸಾಟ್ನಿ ಮನುನ್ "ಗುರುಜಿ, ಕನ್ನಾಚ್ ಮರಾನ್ ನಸಲ್ಲೆ ಜಿವನ್ ಮಾಕಾ ಗಾವುಚೆ ತರ್ ಮಿಯಾ ಕಾಯ್ ಕರುಚೆ?" ಮನುನ್ ಇಚಾರುಲಾಲೊ.

26 ತನ್ನಾ ಜೆಜುನ್ ತೆಕಾ "ಖಾಯ್ದ್ಯಾಚೆ ಪುಸ್ತಕ್ ಕಾಯ್ ಸಾಂಗ್ತಾ? ತೆ ತಿಯಾ ಕಶೆ ಕಳ್ವುನ್ ಘೆತೆಯ್?" ಮನುನ್ ಜವಾಬ್ ದಿಲ್ಯಾನ್.

27 ತ್ಯಾ ಮಾನ್ಸಾನ್ "ಸಗ್ಳ್ಯಾ ತುಜ್ಯಾ ಕಾಳ್ಜಾನ್,ಸಗ್ಳ್ಯಾ ತುಜ್ಯಾ ಜಿವಾನಿ, ಸಗ್ಳ್ಯಾ ತುಜ್ಯಾ ತಾಕ್ತಿನ್, ಅನಿ ಸಗ್ಳ್ಯಾ ತುಜ್ಯಾ ಮನಾನ್; ಸರ್ವೆಸ್ವರಾ ತುಜ್ಯಾ ದೆವಾಚೊ ಪ್ರೆಮ್ ಕರ್, ಅನಿ ತಿಯಾ ತುಕಾಚ್ ಕಸೊ ಪ್ರೆಮ್ ಕರ್‍ತೆ, ತಸೆ ತುಜ್ಯಾ ಸೆಜಾರ್‍ಯಾಚೊಬಿ ಪ್ರೆಮ್ ಕರ್, ಮನುನ್ ಖಾಯ್ದ್ಯಾಚೆ ಪುಸ್ತಕ್ ಸಾಂಗ್ತಾ" ಮಟ್ಲ್ಯಾನ್.

28 ತನ್ನಾ ಜೆಜುನ್ ತೆಕಾ "ಸಮಾ ಸಾಂಗ್ಲೆ" ತಿಯಾ "ಹೆ ಕರ್ ಅನಿ ತುಕಾ ನಿರಂತರ್ ಝಿತ್ತೊ ರ್‍ಹಾತಲೆ ಜಿವನ್ ಗಾವ್ತಾ", ಮಟ್ಲ್ಯಾನ್.

29 ಖರೆ ತೊ ಮಾನುಸ್ ಅಪ್ನಿಚ್ ಖರೊ ಮನುನ್ ದಾಕ್ವುಸಾಟ್ನಿ "ಮಾಜೊ ಸೆಜಾರಿ ಮಟ್ಲ್ಯಾರ್ ಕೊನ್?" ಮನುನ್ ಜೆಜುಕ್ ಇಚಾರುಲಾಲೊ.

30 ತನ್ನಾ ಜೆಜುನ್ "ಎಕ್ ಮಾನುಸ್ ಹೊತ್ತೊ, ತೊ ಜೆರುಜಲೆಮಾಕ್ನಾ, ಜೆರಿಕೊಕ್ ಜಾವ್‍ಲಾಗಲ್ಲೊ, ತನ್ನಾ ಚೊರಾನಿ ತೆಕಾ ಧರ್‍ಲ್ಯಾನಿ,ಅನಿ ತೆಚ್ಯೆಕ್ಡೆ ಹೊತ್ತೆ ಸಗ್ಳೆ ಕಾಡುನ್ ಘೆಟ್ಲ್ಯಾನಿ, ಅನಿ ತೆಕಾ ಮಾರುನ್ ಅರ್‍ದೊ ಜಿವ್ ಕರ್‍ಲ್ಯಾನಿ", 31 ಹೆ ಹೊಲ್ಲ್ಯಾ ಎಕ್ ಉಲ್ಲ್ಯಾ ಎಳಾನ್, ಎಕ್ ಯಾಜಕ್ ಥೈತ್ನಾ ಪಾರ್ ಹೊವ್ನ್ ಜಾವ್‍ಲಾಗಲ್ಲೊ, ತೆನಿ ತ್ಯಾ ಮಾನ್ಸಾಕ್ ಬಗಟ್ಲ್ಯಾನ್, ಅನಿ ಕಡೆಕ್ನಾಚ್ ತೆಚ್ಯಾ ವಾಟೆನ್ ದಾಟುನ್ ಗೆಲೊ. 32 ತ್ಯಾಚ್ ವಾಟೆನ್ ಎಕ್ ಲೆವಿತ್ ಯೆಲೊ, ತೆನಿ ಧುರ್‍ನಾಚ್ ತ್ಯಾ ಮಾನ್ಸಾಕ್ ಬಗಟ್ಲ್ಯಾನ್, ಅನಿ ಎಕ್ ಬಾಜುನ್ ಹೊವ್ನ್, ತೊ ದಾಟುನ್ ಗೆಲೊ. 33 ಖರೆ ಎಕ್ ಸಮಾರಿಯಾಚೊ ಮಾನುಸ್ ತ್ಯಾ ವಾಟೆನ್ ಜಾವ್‍ಲಾಗಲ್ಲೊ, ಅನಿ ತೆನಿ ತ್ಯಾ ಮಾನ್ಸಾಕ್ ಬಗಟ್ಲ್ಯಾನ್, ತೆಕಾ ಬಗುನ್, ತೆಕಾ ತೆಚೊ ಪಾಪ್ ದಿಸ್ಲೊ. 34 ತೊ ತೆಚ್ಯಾ ಜಗ್ಗೊಳ್ ಗೆಲೊ, ಅನಿ ತೆಚ್ಯಾ ದುಕ್ಕಾಕ್ನಿ ತೆಲ್‍ ಅನಿ ವಾಯ್ನ್ ಲಾವ್ಲ್ಯಾನ್, ಅನಿ ದುಕ್ಕಾಕ್ನಿ ಫಾಳಿಯಾನಿ ಭಾಂದ್ಲ್ಯಾನ್. ಅನಿ ಅಪ್ನಾಚ್ಯಾ ಜನಾವರಾ ವರ್‍ತಿ ಬಸ್ವುನ್ ಘೆವ್ನ್, ತೆಕಾ ಎಕ್ ಘರಾಕ್ ಘೆವ್ನ್ ಗೆಲ್ಯಾನ್. ಅನಿ ತೆಚಿ ಉಳ್ಗಿ ಕರ್‍ಲ್ಯಾನ್. 35 ದುಸ್ರ್ಯಾ ದಿಸಿ ತ್ಯಾ ಘರಾಚ್ಯಾ ಧನಿಯಾಕ್, ದೊನ್ ಚಾಂದಿಚೆ ಪೈಸೆ ದಿಲ್ಯಾನ್, ಅನಿ "ತೆಕಾ ಬರೆ ಕರುನ್ ಬಗಾ ಅನಿ ಜಾಸ್ತಿ ಖರಚ್ ಹೊಲ್ಯಾರ್, ಮಿಯಾ ಹ್ಯಾ ವಾಟೆನ್ ಯೆಲ್ಲ್ಯಾ ತನ್ನಾ ತುಮ್ಕಾ ಹಾನುನ್ ದಿತಾ" ಮನುನ್ ಸಾಂಗುನ್ ಗೆಲೊ.

36 ತನ್ನಾ ಜೆಜುನ್ "ತುಜ್ಯಾ ಪರ್‍ಕಾರ್, ಹ್ಯಾ ತಿಗ್ಯಾನಿತ್ನಿ, ಹ್ಯಾ ಚೊರಾನಿ ಮಾರಲ್ಲ್ಯಾ ಮಾನ್ಸಾಕ್ ಕೊನ್ ಸೆಜಾರಿ ಹೊಲೊ?" ಮನುನ್ ಇಚಾರ್‍ಲ್ಯಾನ್.

37 ಖಾಯ್ದೆ ಶಿಕ್ವುತಲ್ಯಾನ್ "ಜೆ ಕೊನ್ ತೆಚಿ ಉಳ್ಗಿ ಕರ್‍ಲ್ಯಾನ್ ತೊ", ಮನುನ್ ಜಬಾಬ್ ದಿಲ್ಯಾನ್.

ತನ್ನಾ ಜೆಜುನ್ ತೆಕಾ "ತಸೆ ಜಾಲ್ಯಾರ್, ಜಾ, ಅನಿ ತಿಯಾಬಿ ತಸೆಚ್ ಕರ್", ಮಟ್ಲ್ಯಾನ್.