Marcos 7

ಅದ್ಲ್ಯಾ ಲೊಕಾಂಚೆ ಖಾಯ್ದೆ

1 ಥೊಡೆ ಫಾರಿಜೆವ್ ಅನಿ ಥೊಡೆ ಖಾಯ್ದೆ ಪಾಳ್ತಲೆ ಶಾಸ್ತ್ರಿ ಜೆರುಜಲೆಮಾತ್ನಾ ಜೆಜು ಹೊತ್ತ್ಯಾಕ್ಡೆ ಯೆವ್ನ್ ಜಮಾ ಹೊಲೆ. 2 ತನ್ನಾ ಜೆಜುಚಿ ಶಿಸಾ ಹಾತ್ ಧುಯ್‍ನಸ್ತಾನಾ ಮ್ಹೆಳ್ಕ್ಯಾ ಹಾತಾನಿ ಜೆವಾನ್ ಕರ್‍ತಲೆ ತೆನಿ ಬಗಟ್ಲ್ಯಾನಿ.ಕಶ್ಯಾಕ್ ಮಟ್ಲ್ಯಾರ್ ತೆನಿ ಖಾಯ್ದ್ಯಾ ಪರ್‍ಕಾರ್ ಹಾತ್ ಧುವ್ನಸಲ್ಲ್ಯಾನಿ.

3 ಫಾರಿಜೆವ್‍ ಅನಿ ಜುದೆವ್ ಧರ್ಮಾಚಿ ಲೊಕಾ ತೆಂಚ್ಯಾ ಅದ್ಲ್ಯಾ ಲೊಕಾಂಚ್ಯಾ ಪದ್ದತಿ ಪರ್‍ಕಾರ್ ಹಾತ್ ಧುಯ್ನಾಸ್ತಾನಾ ಜೆವಾನ್ ಕರಿನಸಿತ್. 4 ಅನಿ ಬಾಜಾರಾಕ್ನಾ ಖಾವ್ಕ್ ಹಾನಲ್ಲೆ ತರ್ ಧುಯ್ನಾಸ್ತಾನಾ ಖಾಯ್ನಸಿತ್. ವಾಟ್ಕಿ,ಗಾಡ್ಗಿ, ತಾಂಬ್ಯಾ, ಆಯ್ದಾನಾ, ಹಾತ್ರಾನಾ ಧುತಲೆ, ಅಸ್ಲಿ ಲೈ ಪದ್ದತಿಯಾ ಪಾಳಿತ್.

5 ತೆಚೆ ಸಾಟ್ನಿ ಫಾರಿಜೆವಾನಿ ಅನಿ ಶಾಸ್ತರಾ ಶಿಕ್ವುತಲ್ಯಾನಿ ಜೆಜುಕ್ಡೆ ಯೆವ್ನ್ "ತುಜಿ ಶಿಸಾ ಅದ್ಲ್ಯಾ ಲೊಕಾನಿ ಕರಲ್ಲ್ಯಾ ಖಾಯ್ದ್ಯಾ ಪರ್ಕಾರ್ ಚಲಿನಸ್ತಾನಾ ಮ್ಹೆಳ್ಕ್ಯಾ ಹಾತಾನಿ ಜೆವಾನ್ ಕರ್‍ತ್ಯಾತ್ ಕಶ್ಯಾಕ್?" ಮನುನ್ ಇಚಾರ್‍ಲ್ಯಾನಿ.

6 ತನ್ನಾ ಜೆಜು ಕುಸ್ಡ್ಯಾ ಲೊಕಾನು, ಇಸಾಯಿಯಾನ್ ತುಮ್ಚ್ಯಾ ವಿಶಯಾತ್ ಹಿ ಲೊಕಾ ಅಪ್ನಾಚ್ಯಾ ತೊಂಡಾಂಚ್ಯಾ ಗೊಸ್ಟಿಯಾನಿ ಮಾಕಾ ಮಾನ್ ಕರ್‍ತ್ಯಾತ್, ಖರೆ ತೆಂಚಿ ಕಾಳ್ಜಾ ಮಾಜೆಕನ್ನಾ ಲೈ ದುರ್ ಹಾತ್‍,

7 ಹಿ ಮಾನ್ಸಾ ಮಾಜಿ ಭಜನ್ ಕರುನ್ ಕಾಯ್ ಫಾಯ್ದೊ, ಕಶ್ಯಾಕ್ ಮಟ್ಲ್ಯಾರ್ ದೆವಾಚೆ ಖಾಯ್ದೆ ಸೊಡುನ್ ಮಾನ್ಸಾನಿ ಕರಲ್ಲೆ ಖಾಯ್ದೆ ಹೆನಿ ಸಗ್ಳ್ಯಾಕ್ನಿ ಶಿಕ್ವುತ್ಯಾತ್.ಮನುನ್ ಸಾಂಗಲ್ಲೆ ಖರೆ ಹಾಯ್,

8 "ತುಮಿ ದೆವಾನ್ ಸಾಂಗಲ್ಲೆ ಖಾಯ್ದೆ ಸೊಡುನ್, ಮಾನ್ಸಾನಿ ಕರಲ್ಲ್ಯಾ ಪದ್ಧತಿಯಾ ಪಾಳುನ್ಗೆತ್ ರ್‍ಹಾತ್ಯಾಶಿ" ಮನುನ್ ಸಾಂಗ್ಲ್ಯಾನ್.

9 ಅನಿ ಫಿಡೆ ಬೊಲುನ್ಗೆತ್ ಜೆಜುನ್ "ತುಮಿ ತುಮ್ಚೆ ಖಾಯ್ದೆ ಪಾಳು ಸಾಟ್ನಿ ದೆವಾಚೆ ಖಾಯ್ದೆ ತಿರಸ್ಕಾರ್ ಕರ್‍ತಲ್ಯಾತ್ ಉಶಾರ್ ಹಾಸಿ!"ಮಟ್ಲ್ಯಾನ್ 10 "ತುಮ್ಚ್ಯಾ ಬಾಯ್-ಬಾಬಾಕ್ನಿ ಮಾನ್ ದಿವಾ, ಕೊನ್ ತರ್ ಎಕ್ಲೊ ಮಾನುಸ್ ಅಪ್ನಾಚ್ಯಾ ಬಾಯ್-ಬಾಬಾಕ್ನಿ ಸರಾಪ್ಲ್ಯಾರ್, ತೆಕಾ ಮರ್‍ನಾಚಿ ಶಿಕ್ಷಾ ದಿವ್ಕ್ ಪಾಜೆ ಮನುನ್" ಮೊಯ್ಜೆನ್ ಸಾಂಗ್ಲ್ಯಾನಾಯ್. 11 ಜರ್ ಎಕ್ಲೊ ಮಾನುಸ್ ಅಪ್ನಾಚ್ಯಾ ಬಾಯ್ -ಬಾಬಾಕ್ ಅದಾರ್ ದಿವ್ಕ್ ಮನುನ್ ಹೊತ್ತೆ ಸಗ್ಳೆ ದೆವಾಕ್ ದೆನ್ಗಿ ಮನುನ್ ದಿಲಾ, ಮನುನ್ ಸಾಂಗ್ಲ್ಯಾರ್, 12 ತಸ್ಲ್ಯಾ ಮಾನ್ಸಾನ್ ಅನಿ ಫಿಡೆ ತೆಚ್ಯಾ ಬಾಯ್-ಬಾಬಾಕ್ ಕಸ್ಲೊಬಿ ಆಧಾರ್ ದಿವ್ಕ್ ತುಮಿ ಸೊಡಿನ್ಯಾಶಿ. 13 ಅಶೆ ತುಮಿ ಶಿಕ್ವುತಾನಾ ದೆವಾಚ್ಯಾ ಬರ್ಯಾ ಖಬ್ರೆಚಿ ತಿರಸ್ಕಾರ್ ಕರುನ್ ತುಮ್ಚೆಚ್ ಖಾಯ್ದೆ ಶಿಕ್ವುತ್ಯಾಸಿ. ಅನಿ ಅಸ್ಲಿ ಲೈ ಕಾಮಾ ತುಮಿ ಕರ್ತ್ಯಾಶಿ. ಮನುನ್ ಸಾಂಗ್ಲ್ಯಾನ್.

ಎಕ್ ಮಾನ್ಸಾಕ್ ಬುರ್ಶೆ ಕರ್‍ತಲಿ ಕಾಮಾ

14 ಜೆಜುನ್ ಅನಿ ಎಗ್ದಾ ಸಗ್ಳ್ಯಾ ಲೊಕಾಕ್ನಿ ಅಪ್ನಾಕ್ಡೆ ಬಲ್ವುನ್.ಕಾಯ್ ಸಾಂಗ್ಲ್ಯಾನ್ ಮಟ್ಲ್ಯಾರ್ "ಮಿಯಾ ಸಾಂಗ್ತಲೆ ಆಯ್ಕಾ ಅನಿ ಕಳ್ವುನ್ ಘೆವಾ 15 ಜೆ ಕಾಯ್ ಭಾಯ್ನಾ ಎಕ್ ಮಾನ್ಸಾಚ್ಯಾ ಭುತ್ತುರ್ ಜಾತಾ ತೆ ಕಾಯ್ಬಿ ಮಾನ್ಸಾಕ್ ಅಶುದ್ದ್ ಕರಿನಾ, ಮಾನ್ಸಾಚ್ಯಾ ತೊಂಡಾತ್ನಾ ಜೆ ಕಾಯ್ ಭಾಯ್ರ್ ಯೆತಾ ತೆ ಮಾನ್ಸಾಕ್ ಅಶುದ್ದ್ ಕರ್ತಾ", 16 ಹಿ ಗೊಸ್ಟ್ ಮುಳಾಚ್ಯಾ ಜಾಸ್ತಿಚ್ಯಾ ಪ್ರತಿಯಾತ್ನಿ ನಾ.ತೆ ಕಾಯ್ ಮಟ್ಲ್ಯಾರ್ ಕೊನಾಕ್ ತರ್ ಆಯ್ಕುಕ್ ಕಾನಾ ರ್‍ಹಾಲ್ಯಾರ್ ಆಯ್ಕುಂದಿತ್,ಮನ್ತಲೆ.

17 ಮಾನಾ ಜೆಜು ಲೊಕಾಕ್ನಿ ಸೊಡುನ್ ಘರಾತ್ ಗೆಲೊ. ತನ್ನಾ ಶಿಸಾನಿ ಜೆಜುಕ್ ತೆನಿ ಸಾಂಗಟಲ್ಲ್ಯಾ ಗೊಸ್ಟಿಯಾಂಚ್ಯಾ ವಿಶಯಾತ್ ಇಚಾರ್‍ಲ್ಯಾನಿ. 18 ತನ್ನಾ ಜೆಜುನ್ "ತುಮಿ ದುಸ್ರ್ಯಾಚ್ಯಾನ್ಕಿ ಬುದ್ದ್ವಂತ್ ನ್ಹಯ್? ಅನಿ ತುಮ್ಕಾ ಕಳಿನಾ ಕಾಯ್? ಎಕ್ ಮಾನ್ಸಾಚ್ಯಾ ಭುತ್ತುರ್ ಜಾತಲೆ ಕಾಯ್ಬಿ ತೆಕಾ ಮ್ಹೆಳ್ಯಿ ನಾ." 19 ಜೆವಾನ್, ಖಾತಲೆ ಖಾನ್ ಮಾನ್ಸಾಚ್ಯಾ ಕಾಳ್ಜಾತ್ ಜಾಯ್ನಾ, ಪೊಟಾತ್ ಜಾತಾ. ಅನಿ ಮಾನಾ ಭಾಯ್ರ್ ಜಾತಾ.ಮಟ್ಲ್ಯಾನ್. ಅಶೆ, ಸಗ್ಳೆ ಖಾತಲೆ ಮನುನ್ ಅಸಲ್ಲೆ ಬರೆಚ್ ಮನುನ್ ಜೆಜುನ್ ದಾಕ್ವುನ್ ದಿಲ್ಯಾನ್.

20 ಅನಿ ಫಿಡೆ ಜೆಜುನ್ "ಎಕ್ ಮಾನ್ಸಾಚ್ಯಾ ಭುತ್ತುರ್ನಾ ಜೆ ಕಾಯ್ ಭಾಯ್ರ್ ಯೆತಾ, ತೆ, ತೆಕಾ ಮ್ಹೆಳ್ವುತಾ". 21 ಎಕಾ ಮಾನ್ಸಾಚ್ಯಾ, ಕಾಳ್ಜಾತ್ ಹಿ ಸಗ್ಳಿ ಬುರ್ಶಿ ಕಾಮಾ ಉಪಾಜ್ತ್ಯಾತ್ ಅನಿ ತೆಕಾ ಬುರ್ಶಿ ಕಾಮಾ ಕರುಕ್ ಉತ್ತೆಜನ್ ಕರ್‍ತ್ಯಾತ್. ತಿ ಖಲಿ ಕಾಮಾ ಮಟ್ಲ್ಯಾರ್, ಬುರ್ಶಿ ಯೆವ್ಜನ್ಯಾ, ರಾಂಡ್ಗೆಪಾನ್, ಚೊರಿ ಕರ್‍ತಲೆ, ಜಿವಾನಿ ಮಾರ್‍ತಲೆ, 22 ವ್ಯೆಭಿಚಾರ್ ಜಾಸ್ತಿಚಿ ಆಶ್ಯಾ, ಅಸಂ, ಝುಟೆ ಬೊಲ್ತಲೆ, ಬುರ್ಶೆಪಾನ್, ಕುಸ್ಡೆಪಾನ್, ಚಾಡ್ಗೆಪಾನ್, ಪಿಶೆಪಾನ್, ಅನಿ ಅಹಂಕಾರ್ ಹಿ ಸಗ್ಳಿ ಬುರ್ಶ್ಯಾ ಕಾಮಾ ಮಾನ್ಸಾಕ್ ಮ್ಹೆಳ್ಕೊ ಕರ್‍ತ್ಯಾತ್. 23 ಹೆ ಸಗ್ಳೆ ಮಾನ್ಸಾಚ್ಯಾ ಭುತ್ತುರ್ನಾ ಭಾಯ್ರ್ ಯೆತಾ ಅನಿ ತ್ಯಾ ಮಾನ್ಸಾಕ್ ಮ್ಹೆಳ್ಕೊ ಕರ್‍ತಾ ಮನುನ್ ಸಾಂಗ್ಲ್ಯಾನ್.

ಎಕ್ ಬಾಯ್ಕೊಮನ್ಸಿಚೊ ವಿಶ್ವಾಸ್

24 ಜೆಜು ತೊ ಜಾಗೊ ಸೊಡುನ್, ತಿರ್ ಮನ್ತಲ್ಯಾ ಪ್ರಾಂತ್ಯಾಕ್ ಗೆಲೊ. ಥೈ ತೊ ಎಕ್ ಘರಾತ್ ಗೆಲ್ಲೊ, ಅಪ್ನಿ ಥೈ ಹೊತ್ತೆ ಕೊನಾಕ್ಬಿ ಕಳ್ತಲೆ ತೆಕಾ ನಕ್ಕೊ ಮನುನ್ ಘೆವ್ನ್ ಹೊತ್ತೊ. ಖರೆ ತೆಕಾ ಲೊಕಾನಿಕ್ನಾ ನಿಪುನ್ ರ್‍ಹಾವ್ಕ್ ಹೊವ್ಕ್ ನಾ. 25 ಎಕ್ ಬಾಯ್ಕೊಮನ್ಸಿಚ್ಯಾ ಲೆಕಿಕ್ ಗಿರೊಲಾಗಲ್ಲೊ, ಜೆಜು ತ್ಯಾ ಘರಾತ್ ಅಸಲ್ಲೆ ತಿಕಾ ಕಳ್ಳೆ, ತಸೆ ಮನುನ್ ತಿ ತನ್ನಾಚ್ ಜೆಜುಕ್ಡೆ ಯೆಲಿ ಅನಿ ತೆಚ್ಯಾ ಪಾಂಯಾತ್ ಪಡ್ಲಿ. 26 ತಿ ಎಕ್ "ಗ್ರಿಕ್" ಬಾಯ್ಕೊಮನುಸ್, ಸಿರಿಯಾಚ್ಯಾ ಪೊಯಿನಿಕ್ಯಾ ಮನ್ತಲ್ಯಾ ಜಾಗ್ಯಾರ್ ಜಲಮಲ್ಲಿ, ತೆನಿ ಅಪ್ನಾಚ್ಯಾ ಲೆಕಿಕ್ ಲಾಗಲ್ಲೊ ಗಿರೊ ಕಾಡ್ ಮನುನ್ ಜೆಜುಕ್ಡೆ ಮಾಗ್ಲಿನ್. 27 ತನ್ನಾ ಜೆಜುನ್ "ಪೊರಾಕ್ನಿ ದಿತಲಿ ಭಾಕ್ರಿ ಕುತ್ರ್ಯಾಕ್ನಿ ತಾಕ್ತಲೆ ಸಮಾ ನ್ಹಯ್, ಅದ್ದಿ ಪೊರಾ ಖಾಂವ್ದಿ" ಮಟ್ಲ್ಯಾನ್.

28 ತನ್ನಾ ತ್ಯಾ ಬಾಯ್ಕೊಮನ್ಸಿನ್ "ತೆ ಖರೆ ಮಾಜ್ಯಾ ಧನಿಯಾ, ಖರೆ ಪೊರಾ ಖಾತಾನಾ ಪಡಲ್ಲೆ ಭಾಕ್ರಿಚೆ ತುಕ್ಡೆ ತರ್ಬಿ ಕುತ್ರಿ ಖಾತ್ಯಾತ್ ನ್ಹಯ್!" ಮನುನ್ ಉತ್ತರ್ ದಿಲಿನ್.

29 ತನ್ನಾ ಜೆಜುನ್ "ತಿಯಾ ಲೈ ಬರಿ ಜಾಬ್ ದಿಲೆ,ತುಜ್ಯಾ ಲೆಕಿಚೊ ಗಿರೊ ತಿಕಾ ಸೊಡುನ್ ಗೆಲೊ ಅತ್ತಾ ತಿಯಾ ತುಜ್ಯಾ ಘರಾಕ್ ಜಾ" ಮಟ್ಲ್ಯಾನ್.

30 ತಿ ಘರಾಕ್ ಜಾವ್ನ್ ಪಾವಲ್ಲ್ಯಾ ತನ್ನಾ ತಿಚಿ ಲೆಕ್ ಹಾತ್ರಾನಾತ್ ಆರಾಮ್ ಆಡ್ ಪಡಲ್ಲಿ ತಿಕಾ ದಿಸ್ಲಿ, ತಿಕಾ ಲಾಗಲ್ಲೊ ಗಿರೊ ಸೊಡುನ್ ಗೆಲ್ಲೊ.

ಜೆಜು ಕಿಂವ್ಡ್ಯಾಕ್ ಅನಿ ಮುಕ್ಕ್ಯಾಕ್ ಬರೆ ಕರ್‍ತಾ

31 ಮಾನಾ ಜೆಜು ತಿರ್ ಶಾರಾಚೊ ಜಾಗೊ ಸೊಡುನ್, ಸಿದೊನ್ ಮನ್ತಲ್ಯಾ ಶಾರಾಕ್ ಜಾತಲ್ಯಾ ವಾಟೆನ್ ಹೊವ್ನ್ ದೆಕಾಪೊಲಿ ಧಾ ಶಾರಾಂಚೆ ಗಾಂವ್ ಮನ್ತಲ್ಯಾ ಜಾಗ್ಯಾ ವೈನಾ ಪಾರ್ ಹೊವ್ನ್ ಗಾಲಿಲಿಯಾ ಸಮುಂದರಾಕ್ಡೆ ಜವ್‍ಲಾಗಲ್ಲೊ. 32 ತನ್ನಾ ಎಕ್ ಉಲ್ಲಿ ಲೊಕಾ ಎಕ್ ತೊದಲ್ತಲ್ಯಾ ಅನಿ ಕಿಂವ್ಡ್ಯಾ ಮಾನ್ಸಾಕ್ ಜೆಜುಕ್ಡೆ ಘೆವ್ನ್ ಯೆವ್ನ್ ತೆಚೆ ವರ್‍ತಿ ಹಾತ್ ಥವ್ನ್ ತೆಕಾ ಗುನ್ಕರ್ ಮನುನ್ ಮಾಗ್ಲ್ಯಾನಿ. 33 ತನ್ನಾ ಜೆಜುನ್ ತ್ಯಾ ಮಾನ್ಸಾಕ್ ಲೊಕಾನಿಕ್ನಾ ಕಡೆಕ್ ಬಲ್ವುನ್ ಘೆವ್ನ್ ಗೆಲ್ಯಾನ್, ಅನಿ ಅಪ್ಲಿ ಬೊಟಾ ತೆಚ್ಯಾ ಕಾನಾತ್ ಘಾಟ್ಲ್ಯಾನ್, ಅನಿ ಥುಕುನ್ ತೆಚ್ಯಾ ಜಿಬ್ಲಿಕ್ ಅಪಡ್ಲ್ಯಾನ್ 34 ಸರ್‍ಗಾಕ್ ದಿಸ್ಟ್ ಲಾವುನ್ ಉಸ್ಕಾರುನ್ "ಎಫ್ಫತಾ" ಮಟ್ಲ್ಯಾನ್ ಮಟ್ಲ್ಯಾರ್ ಉಗಡ್

35 ತನ್ನಾಚ್ ತೆಚಿ ಕಾನಾ ಉಗಡ್ಲಿ ಅನಿ ತೆಚಿ ಜಿಬ್ ಸಡಲ್ ಹೊಲಿ ತೊ ಸ್ಪಸ್ಟ್ ಬೊಲುಕ್ಲಾಲೊ. 36 ಹಿ ಖಬರ್ ಕೊನಾಕ್ಬಿ ಸಾಂಗುನಕಾಸಿ ಮನುನ್ ಜೆಜುನ್ ತ್ಯಾ ಲೊಕಾಕ್ನಿ ಸಾಂಗ್ಲ್ಯಾನ್ ಜೆಜು ಅಪ್ನಾಚ್ಯಾ ವಿಶಯಾತ್ ಕವ್ಡೆ ಸಾಂಗುನಕಾಸಿ ಮನುನ್ ಸಾಂಗಿ, ತವ್ಡೆ ಲೊಕಾ ತೆಚಿ ಖಬರ್ ಫರ್ಗಟಿತ್. 37 ಹೆ ಸಗ್ಳೆ ಆಯ್ಕಲ್ಲಿ ಲೊಕಾ ಲೈ ಅಜಾಪ್ ಹೊಲಿ ಹ್ಯೊ ಸಗ್ಳೆ ಬರೆ ಕರ್‍ತಾ! ಕಿಂವ್ಡ್ಯಾನಿ ಆಯ್ಕಿ ಸರ್ಕೆ ಕರ್‍ತಾ, ಮುಕ್ಕ್ಯಾನಿ ಬೊಲಿ ಸರ್ಕೆ ಕರ್‍ತಾ ಮನುನ್ ಮನುಕ್ಲಾಲಿ.