1 Yeti, ɛmɔgyi ɛhemɔ mukoraati bɛgua: bɔne, nnaka-naka, nyaatwom, anyeborolɛ, ɔne dwudwolɛ bɔ ɔttemaye. 2 Ɛmɔyɛ kyɛ ngwalaa bɔ bawo bɛ foforɛ ne, ná ɛmɔma ɛmɔ nye gye edwirɛ ne bɔ wayɛ kyɛ nyɔfonesue bɔ enu api* nanwo, na wamaa ɛmɔ anyi bahɔ ngoa nu, 3 mmerɛ bɔ ɛmɔ anwu kyɛ Awurade te pa ne.

4 Ɛmɔ bra Ye berɛ, ye yeɛ ole ngoa nyɔboɛ* bɔ mmenia gyi tole ne, nakoso Nyameɛ fale, ofikyɛ ɔsom bo ma ye. 5 Ɛmɔ koso, ɛmɔte kyɛ ngoa nyɔboɛ bɔ bɛfa ɛmɔ besi honhom nu sua maa ɛmɔyɛ sɔfo kue bɔ ɔte krongron, kyɛbɔ ɔkɔyɛ a, ɛmɔ kɔfa Yesu Kristo so bɛkɔbɔ afɔleɛ bɔ ɔsɔ Nyameɛ nye ɔ. 6 Na Tworɔnzɛm ne ka kyɛ:

"Nea, maye ahameɛ nyɔboɛ titire bie,

na mefa meto Zion;

ebiala bɔ okonya yenu gyidie ne,

ye nyunu ngogua ase lle."

7 Ɛmɔ bɔ ɛmɔle gyidie ne de, ɔsom bo ma ɛmɔ, nakoso bɛ bɔ belle gyidie ne de,

"Nyɔboɛ bɔ brekyafoɛ* ne gyi tole ne,

ɛhene yeɛ waayɛ nyɔboɛ bɔ ye nwo hia paa ne."

8 Ɔte

"Nyɔboɛ bɔ ɔto sintidua,

ne nyɔboɛ bɔ ɔmaa bɛfi ase."

Ɔto bɛ sintidua, ofikyɛ bandie edwirɛ ne. Na sɔ ala yeɛ ɔkɔto bɛ ɔ.

9 Nakoso ɛmɔ de, ɛmɔte mmenia bɔ baye ɛmɔ, dehyeɛ asɔfo kue, maen krongron, mmenia bɔ Nyameɛ afa ɛmɔ ayɛ ye agyapadeɛ, kyɛ ɛmɔha Bɔ ɔfrɛle ɛmɔ fili awosii nu wale kanea nu né nneyɛɛ pa nanwo dwirɛ. 10 Mmerɛ bie, né ɛmɔtte maen, nakoso ɛnɛ, ɛmɔte Nyameɛ maen, mmerɛ bie, né Nyameɛ nnwu ɛmɔ anwunvo, nakoso ɛnɛ, onwu ɛmɔ anwunvo.

11 Adɔfo, mesrɛ ɛmɔ, ɛmɔte ɛwɔfoɛ ne amanfrafoɛ, yeti ɛmɔhwe ɛmɔ nwo bɛfi anwoɔnaen akɔnnɔ nwo, ofikyɛ ɔkõ tia ɛmɔ. 12 Ɛmɔbɔ bra pa wɔ maen-maen nanu, na sɛ bɛbɔ ɛmɔ sommoɛ kyɛ ɛmɔte nnipa-bɔnefoɛ po a, bekonwu ɛmɔ bra pa ne, ná bali ye nwo adanzeɛ bahyɛ Nyameɛ anuonyam, kyẽa bɔ ɔkɔɔnea kyɛbɔ nningyein kɔ ne.

13 Awurade ti, ɛmɔbrɛ ɛmɔ nwo ase bɛma sona nhyehyɛɛ* biala; kyɛ ɔte ɔhene bɔ ole tumi, 14 anaa bɛ bɔ* ɔhene soma bɛ maa bɛkɔtwe abɔnefoɛ so, na bɛkamvo bɛ bɔ bɛyɛ nikye pa ne. 15 Ofikyɛ bɔ Nyameɛ kuro yeɛ ole kyɛ, ɛmɔ kɔyɛ nikye pa, kyɛbɔ ɔkɔyɛ a, bɛ bɔ bɛnde dwirɛ bo ne kɔyakyi bɛ ngwasea-keka ne. 16 Ɛmɔlɛ́ fahodie, nakoso, nnɛmɔfa ɛmɔ fahodie ne bɛkata ɛmɔ nyunu bɛyɛ bɔne, mmom ɛmɔfa bɛsõ Nyameɛ kyɛ ye ngoaa. 17 Ɛmɔfa nidie bɛma sona biala, ɛmɔnya ɔdɔ bɛma aliemaa mɔ mukoraati, ɛmɔsuro Nyameɛ, ɛmɔbu ɔhene.

18 Ɛmɔma ngoaa brɛ bɛ nwo ase bɛma bɛ wura mɔ, na bɛfa nidie bɛma bɛ. Nná bɛ bɔ bɛte pa na bɛte edwirɛ bo ne ngome yeɛ odikyɛ bɛyɛ bɛma bɛ ɔ, mmom bɛ bɔ bɛ ti anu yɛ se ne koso. 19 Ahonim* pa bɔ ebie le wɔ Nyameɛ nyunu nati, sɛ onwu amaneɛ, anaa bɛtane ye nye na omia ye nye gyina nu a, ɔte pa. 20 Sɛ ɛmɔyɛ bɔne maa bɛbo ɛmɔ, na ɛmɔmia ɛmɔ nye begyina nu a, mvasoɛ beni yeɛ ɔwɔ so ɔ? Nakoso, sɛ ɛmɔyɛ nikye pa, na ɛmɔmia ɛmɔ nye bɛnwu amaneɛ wɔ ye nwo a, ɛhene yeɛ ɔsɔ Nyameɛ nye ɔ.

21 Ɛhe ati yeɛ bɛfrɛle ɛmɔ ne, ofikyɛ Kristo po nwuni amaneɛ mane ɛmɔ, na ɔfa yɛle nneasoɛ kyɛ ɛmɔli ye gyasi pɛɛ.

22 "Wanyɛ bɔne biala,

na bannwu ngondombo biala koso wɔ ye noa nu."

23 Mmerɛ bɔ bɛpepɛle ye nzoaa ne,

wambɛ bɛ bie,

onwu amaneɛ ne, wanwuna-nwuna ebiala,

mmom ɔfale ye nwo wurale Bɔ obu atɛn tenenee ne sa.

24 Ye bɔbɔ yeɛ ɔfale ye nipadua soale yɛ bɔne wɔ bakaa naso,

kyɛbɔ ɔkɔyɛ a yɛkɔ yakyi bɔne,

na yatena ase yayɛ bɔ ɔtengyɛ.

25 Né ɛmɔ ayɛ kyɛ mmoan bɔ bamini ne, nakoso kesaalae de, ɛmɔ asa bawa bɔ ɔnea ɛmɔ kra so, na ɔbɔ ɛmɔ nwo waen ne berɛ.