1 Mbanyi bɔ bɛwɔ ɛmɔ nu ne, me koso nde panyi kyɛ bɛ ala, na nde Kristo amanehunu nanwo adanzeniɛ, afei anuonyam bɔ bɛbaala ye ali ne, ngosa ngonya nu kyɛfa, yeti metu bɛ fo kyɛ: 2 Ɛmɔnea Nyameɛ mmoan bɔ bɛwura ɛmɔ sa naso yé, nnɛmɔ maa ɔyɛ kyɛ bɛhyɛ ɛmɔ, mmom ɛmɔfia ɛmɔ kunu bɛyɛ bɛma Nyameɛ; nná adufudeɛ ti ɔ, mmom ɛmɔfa anigye bɛyɛ, 3 nnɛmɔ di Nyameɛ agyapadeɛ naso bakoma,* mmom ɛmɔyɛ nikye pa ma bɛsuesua. 4 Na sɛ bɛda boan-neafoɛ panyi ne ali a, ɛmɔ konya anuonyam abotire bɔ ɔnzɛkye.

5 Sɔ ala yeɛ mmrandeɛ koso, ɛmɔbrɛ ɛmɔ nwo ase bɛma bɛ bɔ bayɛ mbanyi ne. Na ɛmɔ nu biala brɛ ye nwo ase ma ye mmango, ofikyɛ,

"Nyameɛ si bɛ bɔ bɛte dwɛɛ ne atee,

ná anwobraseɛfoɛ de, ɔdo bɛ."

6 Ɛmɔbrɛ ɛmɔ nwo ase bɛwura Nyameɛ sa bɔ tumi wɔ nu nabo, na mmerɛ bɔ ɔsɛ nu ne, ɔkɔma ɛmɔ so. 7 Na ɛmɔfa ɛmɔ dadwene mukoraati bɛgua ye so, ofikyɛ ɔdwene ɛmɔ nwo. 8 Ɛmɔbrɛ ɛmɔ nwo ase, na ɛmɔma ɛmɔ nye la berɛ. Ofikyɛ ɛmɔ tamfo Abɔnzam di akɔ-ne-aba te kyɛ gyata bɔ opo, ná ɔpena ebie kye ye ne. 9 Nakoso ɛmɔgyina berɛ pindinn wɔ gyidie nanu, na ɛmɔ ne ye hõ; ofikyɛ ɛmɔse kyɛ amanehunu komapɛ nala yeɛ ɛmɔ aliema mɔ bɔ bɛwɔ wiase mukoraati ne fa nu ɔ. 10 Na sɛ ɛmɔnwu amaneɛ kaa a, adom mukoraati Nyameɛ, bɔ ɔnate Kristo so frɛle ɛmɔ wale ye daa anuonyam nu ne kɔmaa ɛmɔ koli mu.* Ɔkɔmaa ɛmɔ bo kotimu, ɔkɔmaa ɛmɔ kɔyɛ se. 11 Ye yeɛ ole tumi daa. Amen.

12 Silas,* yeɛ ɔbokale me maa ndworɔle krataa kaa he mmerɛle ɛmɔ ɔ; ɔte aliemaa bɔ mese kyɛ odi nahorɛ paa. Mefa krataa he mehyɛ ɛmɔ nguraen, na me maa ɛmɔnwu ye kyɛ, ɛhe yeɛ ɔte Nyameɛ adom paa ne. Yeti, ɛmɔgyina nu pindinn.

13 Brasua bɔ ɔwɔ Babilon, bɔ baye ye kyɛ ɛmɔ ne, yenwa ɔkyea ɛmɔ, na Marko koso nwa ɔkyea ɛmɔ.

14 Ɛmɔfe ɛmɔ noa nwo wɔ ɔdɔ nu bɛfa bɛhyeɛhyea ɛmɔ nwo.

Ɛmɔ bɔ ɛmɔ wɔ Kristo Yesu nu namukoraati, Asomdwie ha ɛmɔ.