1 Aliemaa mɔ, ɛmɔ bɔbɔ ɛmɔse kyɛ, ɛwalɛ bɔ yɛwale ɛmɔ berɛ ne, wanyɛ mbaen. 2 Kyɛbɔ ɛmɔse ne, yɛli moa yɛnwuni amaneɛ, na bɛbɔle yɛ alapaa wɔ Filipi. Nakoso, ɔmva ye nwo kyɛ né mmenia dwɔso tia yɛ ne, Nyameɛ mane yɛ akukuduro maa yɛhane nzɛmba ne yɛhyirele ɛmɔ. 3 Na afutuo bɔ yɛfa yɛmane ɛmɔ ne, oggyi ngondombo dwirɛ, nikye bɔ ye nwo nde, anaa nnaka-naka biala so, 4 mmom Nyameɛ alɛ́ yɛ ato nu kyɛ yɛfata, na wafa nzɛmba ne wawura yɛ sa, yeti sɛ yɛdwudwo a, yɛmva yɛnzɔ sona nye, mmom yɛfa yɛsɔ Nyameɛ bɔ ɔneɛnea y’ahone nu ne nye. 5 Nahorɛ dwirɛ yeɛ ole kyɛ, ɛmɔse kyɛ yanga edwirɛ biala yanlaka-laka ɛmɔ, na yamva atee biala so yannidi ɛmɔ nwo lle. Nyameɛ di ɛhe anwo adanzeɛ. 6 Na sɔ ala koso yeɛ yambena sona nyunu anuonyam biala wɔ ɛmɔ ne afoforɛ berɛ, ɔwɔ nu, Kristo asomafoɛ de, né ahaa yɛkɔhora yɛkɔfa yɛ haw yɛkogua ɛmɔ so. 7 Nakoso, mmerɛ bɔ ne yɛwɔ ɛmɔ berɛ ne, yɛkrɔkrɔle ɛmɔ te kyɛ bɔ brataen yɛ ye mmaa ne. 8 Na ɔnate kyɛ yɛkuro ɛmɔ dwirɛ nati, nná Nyameɛ dwirɛ na ngome yeɛ yɛyerele yɛ nwo yɛha yɛhyirele ɛmɔ ɔ, mmom yɛhuni yɛ nwo yɛmane ɛmɔ, ofikyɛ né yɛkuro ɛmɔ dwirɛ paa.

9 Aliemaa mɔ, medɛ́ medi kyɛ ɛmɔkaye adwuma serɛ bɔ yɛyɛle, ɔne fɛɛ bɔ yɛfɛle ne. Né yɛyɛ adwuma kɔngɔen ne eyia, kyɛbɔ ɔkɔyɛ a yɛngɔfa adesoa biala yɛngɔto ɛmɔ so mmerɛ bɔ yɛka Nyameɛ nzɛmba ne yɛkyire ɛmɔ ne. 10 Ɛmɔdi adanzeɛ, na Nyameɛ koso di adanzeɛ kyɛ, né yɛdi nahorɛ, yɛte ateneneefoɛ, na né edwirɛ biala nne yɛ nwo wɔ ɛmɔ bɔ ɛmɔte gyidifoɛ nanu. 11 Ɛmɔse ye paa kyɛ, yɛtule ɛmɔ fo, yɛkyekyele ɛmɔ wora, na yɛlili ɛmɔ nu biala adanzeɛ kyɛbɔ baba yɛ ye mmaa mɔ ne, 12 kyɛbɔ ɔkɔyɛ a, ɛmɔ kɔhɔ so bɛkɔbɔ bra bɔ ɔfata Nyameɛ bɔ ɔfrɛ ɛmɔ ba ye Ahennie ne ye anuonyam nu ne.

13 Ɛhene ati yeɛ yɛ koso, daa yɛda Nyameɛ ase ne, ofikyɛ mmerɛ bɔ ɛmɔlɛle Nyameɛ dwirɛ bɔ yɛha yɛhyirele ɛmɔ ne, ɛmɔ annɛ ye kyɛ sona dwirɛ, mmom ɛmɔlɛle ye kyɛ Nyameɛ dwirɛ, na sɔ ala yeɛ te ɔ; na ɛhene yeɛ ɔyɛ adwuma wɔ ɛmɔ bɔ ɛmɔte gyidifoɛ nanu ne. 14 Aliemaa mɔ, ɛmɔ suesuane Nyameɛ asafo ahoroɛ bɔ ɔwɔ Kristo Yesu nu wɔ Yudea ne, ofikyɛ kyɛbɔ ɛmɔ nwuni amaneɛ wɔ ɛmɔ bɔbɔ ɛmɔ mmenia sa nu ne, sɔ ala yeɛ bɛ koso bɛnwuni amaneɛ wɔ Yudafoɛ sa nu ɔ. 15 Yudafoɛ hemɔ yeɛ bɛhuni Awurade Yesu ne adiifoɛ nemɔ ne, na bɛ ala yeɛ bɛtane yɛ nye ne. Afei koso, bɛnyɛ bɔ ɔsɔ Nyameɛ nye, na bɛdwɔso betia sona ebiala, 16 ofikyɛ né bɛpena kyɛ bɛsi yɛ atee, kyɛbɔ ɔkɔyɛ a yɛngɔha edwirɛ ne yɛngohyire maen-maen, ná wamaa balɛ́ bɛ ngoa. Bɛyɛ sɔ ne, né bɛ bɔne ne sone, na ye yaa awa bɛ so.

17 Nakoso aliemaa mɔ, mmerɛ bɔ yɛfili ɛmɔ nwo kaa (wɔ anwoɔnaen nu, nná ahone nu) ne, ɔnate kyɛ né yafe ɛmɔ paa nati, yɛyɛle bɔ yɛkɔhora biala kyɛ yɛ konwu ɛmɔ nyunu. 18 Yeti, né yɛpena kyɛ yɛba ɛmɔ berɛ, me Paul po de, mmɔle mmɔden pɛn nyɔ kyɛ ngɔwa ɛmɔ berɛ, nakoso Abɔnzam sili me atee. 19 Sɛ y’Awurade Yesu ba a, nzu yeɛ ɔte y’anidasoɛ, y’anigye, anaa y’abotire bɔ yɛkɔfa yɛkɔ-hoɔhoa yɛ nwo ɔ? Nná ɛmɔ? 20 Amba, ɛmɔ yeɛ ɛmɔte y’anuonyam ne y’anigye ɔ.