1 Aliemaa mɔ, mmerɛ ne ngyẽa ne de, ye nwo nhia kyɛ yɛtworɔ nikye biala wɔ ye nwo yɛberɛ ɛmɔ. 2 Ofikyɛ ɛmɔ bɔbɔ, ɛmɔse ye paa kyɛ, Awurade kyẽa ne kɔwa kyɛbɔ awieniɛ ba kɔngɔen ne. 3 Sɛ benya bɛka kyɛ yanya "Asomdwie ne ahotɔ" a, mvum nu yeɛ bɛkɔsɛkye bɛ komapɛ, kyɛbɔ aworɛ ka brasua bɔ ɔnwonzɛ ne, na bɛngɔhora nwati. 4 Nakoso aliemaa mɔ, ɛmɔ de, ɛmɔnne awosii nu, né sɔ kyẽa ne afu ɛmɔ nu kyɛ awieniɛ, 5 ofikyɛ ɛmɔ mukoraati ɛmɔte kanea ne aleheneɛ mmaa. Yɛtte kɔngɔen anaa awosii deɛ. 6 Yeti, nnɛmɔ maa yɛda, kyɛbɔ bɛ bɔ baha ne da ne, mmom, ɛmɔma yɛnea yé,* na yɛ nye la berɛ. 7 Ofikyɛ bɛ bɔ bɛda ne da kɔngɔen, na bɛ bɔ bɛbo ne bo kɔngɔen. 8 Nakoso yɛ de, yɛte aleheneɛ mmaa, yeti ɛmɔma yɛ nye la berɛ, na yɛfa gyidie ne ɔdɔ yɛyɛ buralɛ yɛkata yɛ hue so, na yɛfa daa ngoa nwo anidasoɛ ne yɛyɛ buralɛ kyerɛ. 9 Ofikyɛ Nyameɛ anye yɛ kyɛ ɔbaahwe yɛ so, mmom ɔyele yɛ kyɛ yɛfa Awurade Kristo Yesu so yɛnya ngoa. 10 Owu mane yɛ, yeti sɛ yɛte ase* oo, sɛ yawu* oo, yɛne ye kɔtena ngoa nu. 11 Yeti, ɛmɔ hyehyɛ ɛmɔ nwo nguraen, na ɛmɔboka-boka ɛmɔ nwo, kyɛbɔ ɛmɔyɛ nala.

12 Aliemaa mɔ, yɛsrɛ ɛmɔ, ɛmɔfa obuo bɛma bɛ bɔ bɛyɛ adwuma serɛ wɔ ɛmɔ nu, na bɛdi ɛmɔ nyunu wɔ Awurade nu bɛtu ɛmɔ fo ne, 13 adwuma bɔ bɛyɛ nati, ɛmɔfa nidie bɔ ɔkɔ siɛ bɛma bɛ, na ɛmɔlɔ bɛ. Ɛmɔ ne ɛmɔ nwo tena asomdwie nu. 14 Afei aliemaa mɔ, yɛtu ɛmɔ fo kyɛ, bɛ bɔ bɛnate basabasa ne, ɛmɔbɔ bɛ kɔkɔ, ɛmɔkyekye bɛ bɔ b'abanu abu né wora, ɛmɔboka bɛ bɔ bayɛ mmerɛ ne, ɛmɔnya sona biala nwo aboterɛ. 15 Ɛmɔnea kyɛ ebiala ngɔfa bɔne ngotua ye mmango bɔne so kerɛ, mmom ebiala yɛ bɔ ɔte pa ma ye mmango ne mmenia bɔ baha namukoraati. 16 Ɛmɔli ahurusi daa. 17 Nnɛmɔ yakyi mbaebɔ lle. 18 Nikye biala nu, ɛmɔla Nyameɛ ase, ofikyɛ ɛhe yeɛ Nyameɛ pena kyɛ ɛmɔyɛ wɔ Kristo Yesu nu ɔ. 19 Nnɛmɔ nua honhom ne see ne. 20 Nnɛmɔbu ngɔmhyɛ animtia, 21 mmom ɛmɔsɔ nikye biala bɛnea, na bɔ ɔte pa ne, ɛmɔsɔ nu yé. 22 Ɛmɔhwe ɛmɔ nwo bɛfi bɔne biala nwo.

23 Yɛsrɛ kyɛ asomdwie Nyameɛ ne te ɛmɔ nwo koraa, na ɔnea ɛmɔ honhom, ɛmɔ kra, ne ɛmɔ nipadua bɔ dɛm nne ye nwo naso yé, na edwirɛ biala amma ɛmɔ nwo mmerɛ bɔ y'Awurade Yesu Kristo kɔwa ne. 24 Bɔ ɔfrɛle ɛmɔ ne di nahorɛ, na kyɛbɔ ɔte biala ne, ɔkɔyɛ.

25 Aliemaa mɔ, yɛ koso, ɛmɔbɔ mbaeɛ bɛma.

26 Ɛmɔfa mveanoɛ bɔ ɔte krongron bɛhyeɛhyea aliemaa mɔ mukoraati.

27 Mehyɛ ɛmɔ kitii wɔ Awurade nu kyɛ, ɛmɔkenga krataa he behyire aliemaa mɔ mukoraati.

28 Y'Awurade Yesu Kristo adom ha ɛmɔ mukoraati.