1 Krataa he fi Paul, Silwano,* ne Timoteo berɛ,

yɛfa yɛkɔma Tɛsalonika asafo bɔ bɛne Baba Nyameɛ ne Awurade Yesu Kristo ayɛ kõ ne:

Adom ne asomdwie ha ɛmɔ.

2 Mmerɛ biala bɔ yɛkɔbɔ ɛmɔ mukoraati dumaa wɔ yɛ mbaeɛ nu ne, ɛyɛ a yɛda Nyameɛ ase daa, 3 ofikyɛ yɛkaye adwuma bɔ ɛmɔ yɛle ye wɔ gyidie nu, adwuma serɛ bɔ ɛmɔ yɛle ye wɔ ɔdɔ nu, ɔne animia bɔ ɛmɔfa begyina ɔhaw nu, ɔnate anidasoɛ bɔ ɛmɔle ye wɔ y'Awurade Kristo Yesu nu wɔ yɛ Baba ne yɛ Nyameɛ nyunu ne. 4 Aliemaa mɔ bɔ Nyameɛ dɔ ɛmɔ, yɛse kyɛ Nyameɛ yeɛ waye ɛmɔ ɔ, 5 ofikyɛ nná yɛ noa ngome yeɛ yɛfa yɛhane nzɛmba ne yɛhyirele ɛmɔ ɔ, mmom yɛfale tumi, honhom krongron, ne gyidie bɔ enu yɛ se yɛbokale so. Na mmerɛ bɔ ne yɛwɔ ɛmɔ berɛ ne, ɛmɔ bɔbɔ ɛmɔ nwuni kyɛbɔ ɛmɔ ti, né yɛbɔ yɛ bra ne. 6 Ɛmɔ suesuane yɛ, yeɛ ɛmɔ suesuane Awurade, ofikyɛ ɛmɔ fale anigye bɔ honhom krongron ne fa mane ɛmɔ ne bɛlɛle edwirɛ ne wɔ amanehunu pee nu. 7 Yeti ɛmɔ ayɛ nneasoɛ pa bama gyidifoɛ bɔ bɛwɔ Makedonia ne Akaia namukoraati. 8 Ofikyɛ nná Awurade dwirɛ ne ngome yeɛ watrɛ wafi ɛmɔ berɛ wahɔ Makedonia ne Akaia ɔ, mmom gyidie bɔ ɛmɔle ye wɔ Nyameɛ nu ne adwu nekaa biala, yeti ye nwo nhia kyɛ yɛka edwirɛ biala. 9 Ofikyɛ bɛ bɔbɔ bɛka mmerɛ bɔ yɛli moa yɛ wale ɛmɔ berɛ nanwo dwirɛ, ɔne kyɛbɔ ɛmɔ yakyile ɛmɔ statu * nemɔ berɛ bɛwale Nyameɛ berɛ, kyɛ ɛmɔ baasõ Nyameɛ teasefoɛ komapɛ bɔ odi nahorɛ ne, 10 ná ɛmɔ nwondɛ kyɛ Ɔwa bɔ otingyele ye fili ewue nu ne kofi anwuro kɔwa, ye yeɛ ole Yesu bɔ odɛ́ yɛ fi ɛyaa bɔ ɔba nanu ne.